¹ Dəvyidi nwə̃́ə̃́. Bə-zhɔ-zhe wɔ́ à pwẽ̀ ré ǹdə́ à vwǎrh mɔ́ : Wɔ́ mɔ̌ yé né à la nɛ́ dǔr ? Wɔ́ Bə-zhɔ-zhe jɔ̃̀ w à myə̌l ré ŋwɛ́nɛ́ : Wɔ́ mɔ̌ ywẽ rə̀ la nɛ zal ? ² Lyì-bəwǎlsɛ gə bàn bú ǹdə́ nɛ, sə̀ la à yala nɛ́ dɔ́m sə zhəzhɛrɛ, wɔ́ sə̀myɛ́ sə̀ wɔ́ à zwə̀ bé sə̀ n’ê nwɛ̀nɛ̀ nɛ mɔ́, wɔ́ sə̀myɛ́ sə̀ n’ê mà sə̀ nèrh sə̀ twi tɛ̃́. ³ Sə̀dɛ́ɛ́sɛ gə zɛ̃̀ sə̀ tú sə̀ kə́kɛ́lɛ́ myɛ, à wu t’â zɛ̃̀ námpɔ́lɛ́ də́-byǐ kə̀ ga myɛ yé ; Lyì gə zɛ̃̀ búlə́ ǹdə́ nɛ myɛ, ǹdə́ rə̀myɛ ga, à gwẽ̌ zhe Bə-zhɔ-zhe zhə̀nà. ⁴ À n’â lwə̀l kɔn rə̀dù, à bùlə̀ zhe re dɛ̃́dɛ̃́ Bə-zhɔ-zhe sono : À n’â yǎl a yə̀ ń kɛ̀lɛ́ w à nyǔ mú cɛ yó mó gakó wẽ́, mùnì ga a nyǐ ǹ cɛ̀nɛ̀ rɛ́, sə a lwar ń pár ń jì y wə. ⁵ Bə̀ ń nə́ ń yìlì ni ń jì y w ǹdə́ zwini gə tú rə̀ zhe ne, ń nə́ ń shèè ne ń kòrhó w wə ; n ce a zhì dɛ̃̌ pàtá yó kaka yír ne yé. ⁶ Sə kɔn zhì èlǎsɛ̃́, ń zhẽ̌ à yó dɛ̃̌ à zwə̀ bé bə̀ kə́kɛ́lɛ́ nɛ mɔ́ yó à cǐ bi ; Pɔ́lá y gə tú è wúl, à m’a zɛ̃̀ a zwə́l vwə̃̀ ń kòrhó w wə ; a nún a cèrhé Bə-zhɔ-zhe. ⁷ Bə-zhɔ-zhe ! à n’â byẽ̀ mó, cili à cəl ré : Dǔr à nɔ̀nɔ̀, sə́ vwǎrh nɛ ! ⁸ À n’â bùl ǹ yò, bə̀ ǹ wòwə̀ : Pyǎ-na nɛ ! Sə Bə-zhɔ-zhe ! Ǹ y’ǎ nyǐ, à n’â pyà mɔ́ ! ⁹ Ce ǹ bə̀ká pyìrhí ǹ kwã ń zǎ nɛ yé, ǹ bə̀ká zə lyim ń cìrh ǹ tùntùnnə mó ń ce kwã nɛ́ yé ! À Yi, ǹmyɛ́ ǹ wɔ́ à vwǎrhna mɔ́ ! ǹmyɛ́ ǹ nə́ ǹ sɛ̃ nɛ, ce ǹ bə̀ká yẽ̌ ne ń dwĩ̀ tɛ̃́ yé. ¹⁰ Bá à da ǹdə́ à ná gə y’à mə̌ sə bə yẽ̌ ne myɛ, Bə-zhɔ-zhe mà n zwẽ ne. ¹¹ Bə-zhɔ-zhe ! Cèrhè ne ǹ sɔ́má y a kwè, byili ni cángá sɔ́má y a kwè, à zwə̀ bé yilə. ¹² Ǹ bə̀ká yẽ̌ ne, à zwə̀ bé zə nɛ bə wɛ̀rhɛ́ ǹdə bə̀ gə́ n’ê yǎl nɛ́ yé, bə̀ lyì bí byɛ̀bɛ́ bə̀ n’ê gòm kɔma kɔn dɛ̀bɛ́ bə̀ yírh yə̀ nɛ yó mó, cìnə́ zɛ̃̀ à yó, bə̀myɛ́ ǹdə́ byɛ̀bɛ́ bə̀ tɔ́rɔ́ mɔ́ wɔ́ jàn tumə né mó, zɛ̃̀ bə̀ n’ê bwí ǹdə́ nɛ. ¹³ Zhə̀n zhə̀nà, sə à nə gə y’à yə̀l ǹdə́ Bə-zhɔ-zhe gə mà n wɛ̀rhɛ́ nɛ wu-bɔ̀nɔ̀, cɛ yó numbyínsí wẽ́ ! ... ¹⁴ Dɛ̃̌ kɔn Bə-zhɔ-zhe sono ! Zhǐ kẽkẽ, zə wu-jɔ̀ ! Dɛ̃̌ kɔn Bə-zhɔ-zhe sono !