¹ Nwə̃́ə̃́ wɔ́ Dəvyidi nyǎ. Bə-zhɔ-zhe ! À kwè à cìn a pə ǹmyɛ́ nɛ. ² À Yi ! Wɔ́ ǹmyɛ́ nɛ à zhí ; mùnì ga cìzhìl bə̀k’a pú ni yé ! Mùnì ga à bə̀k’a yə̀ mɔ̀n kɔn à zwə̀ bé yil yé ! ³ Bə̀ lyì bí byɛ̀bɛ́ gakó bə̀ n’ê dɛ̃̀ kɔn ń sono mó t’â jí cìzhìl gaga yé ; Sə byɛ̀bɛ́ bə̀ t’â zwẽ ǹ nyə́ né, e jà è bə kùr zhe mó, wɔ́ cìzhìl rə̀-ná-cìnə́ bé n’ê jí. ⁴ Bə-zhɔ-zhe ! Byili ni ǹ sɔ́msɛ́ y párá, sə́ cèrhè ne a lwar ǹ sɔ́má y kɛ̀bɛ́ à mə̌ s’a tó mó párá. ⁵ Zə nɛ a vò ǹ zhə̀n rɛ́ wẽ́, sə́ cèrhè ne re ; bə̀ wɔ́ ǹmyɛ́ ǹ wɔ́ à Yi rí rə̀ n’ê vwǎrh nɛ mɔ́, wɔ́ ǹmyɛ́ sono à n’â dɛ̃̀ kɔn nɛ́ twéé gakó. ⁶ Bə-zhɔ-zhe ! Lyǐrh ǹ nɔ̀nɔ̀ dǔr mó ǹdə́ wu-bɔ̀nɔ̀ w rə̀ j’â ŋwɛ́nɛ́ byinə nə̀ bə zhɔ̌ zhe mó yò ; ⁷ Bə-zhɔ-zhe ! Tə̀ ǹ nɔ̀nɔ̀-dǔr mó ǹdə́ wu-bɔ̀nɔ̀ yil sə́ lyǐrh à yò ; sə ǹ bə̀ká lyǐrh à bə̀sɔ́nɛ́ ga dwə́ə́ ré ǹdə́ à yə̀-bəlwàálɛ́ yò yé. ⁸ Bə-zhɔ-zhe wɔ́ wu-bɔ̀nɔ̀ ǹdə́ cángá cə́bal, wɔ́ rə̀myɛ́ è ce ń nə́ ń byili ń sɔ́má y yə̀-bəlwàálɛ́ cìnə́ ne. ⁹ Ń nə́ ń byili cángá tũ̀-twə̃̀ə̃̀ né cìn-lwəl cìnə́ bé ne, n cèrhè be ń sɔ́má y ń kɛ̃ n pə mɔ́ bə lwar. ¹⁰ Bə-zhɔ-zhe sɔ́msɛ́ gakó wɔ́ nɔ̀nɔ̀-dǔr ǹdə́ zhə̀n sɔ́msɛ, lyì bí byɛ̀bɛ́ bə̀ n’ê zhə̀l ǹdə ń dɔbrɛ́ ǹdə́ ń nyə́ né gə́ n’ê byili ní mú yilə. ¹¹ Bə-zhɔ-zhe ! Nyǐ wɔ́ ǹ yil ré yilə, ǹ nə́ ǹ pɛ nɛ sǔbri à lwɛlɛ rɛ́ yilə, bə̀ à lwɛlɛ rɛ́ já dɛ̃́dɛ̃́. ¹² Wɔ́ numbyíní kɛ̌ è n’ê nyàm Bə-zhɔ-zhe mó ? Wɔ́ rə̀-ná-cí mú ni Bə-zhɔ-zhe nə́ ń byili sɔ́má y kɛ̀bɛ́ ń mə̌ sə n kwè mó. ¹³ N zɛ̃̀ ń nə́ ń shǐrh wu-nyɔ̃̀ wẽ́, rə̀-ná-cí nɛ̀mɛ́ nɛ́ nə̀ b’a cìní tənà yá. ¹⁴ kɔn rɛ́ tɛ̀bɛ́ rə̀ ŋwɛ́nɛ́ Bə-zhɔ-zhe wẽ́ mó, wɔ́ lyì bí byɛ̀bɛ́ bə̀ n’ê nyàm mɔ mɔ́ nɛ ń nə́ ń pɛ rɛ, ń dɔbrɛ́ zɛ̃̀ rə̀ n’ê cèrhè be. ¹⁵ Wɔ́ Bə-zhɔ-zhe yó à pyìrhí à yírhə́ né a pyǎ nɛ́ dɛ̃ gakó, bə̀ wɔ́ ńmyɛ̌ ń mà n vùr à nèsé pɔ̀mɔ̀ w wẽ́. ¹⁶ Bə-zhɔ-zhe, nyǐ ni sə́ dùr à nɔ̀nɔ̀, bə̀ à zhǐ à dúdú, à jǐrh zúzúnú cí. ¹⁷ À wu w sú ǹdə́ zwini, vǔr ne à yiyuru mú wẽ́. ¹⁸ Nyǐ à nɔ̀nɔ̀ w ǹdə́ à lyààrɛ́ mawé, sə́ pɛ̃ à yə̀-bəlwàálɛ́ gakó sǔbri. ¹⁹ Nyǐ à zwə̀ bé gə́ já dɛ̃́dɛ̃́ nɛ́ mawé, bə̀ súl ne, zɛ̃̀ ń nyǐ bə̀ gə́ pú à kùr ǹdə́ jàn dúdú bə̀ n’ê jì ní. ²⁰ Bə-zhɔ-zhe, yìlì ni, sə vwǎrh nɛ ! à bə̀k’a nə cìzhìl yé, bə̀ wɔ́ ǹmyɛ́ sono à n’â pyà à shòò jàà nɛ́ ! ²¹ Bə̀ bə dóó zhe ǹdə́ cángá tũ̀-twə̃̀ə̃̀ né yìlì ni, Bə-zhɔ-zhe, wɔ́ ǹmyɛ́ sono à n’â dɛ̃̀ kɔn nɛ́ ! ²² Ǎ Yi, vwǎrh Esərayɛl, ń lyààrɛ́ gakó wẽ́.