¹ Dəvyidi nwə̃́ə̃́. Bə-zhɔ-zhe wɔ́ à vwã̌-ènɔ̀n, kaka t’â la nɛ mùrù yé. ² Ń nə́ ń zə nɛ ń zhə̀l ń cĩ́ gɔ-lyɔ̀ jàà wa, n zə nɛ n vò nɛ̃̌ jàà kɛ̀bɛ́ è zhe yə̀-zùlə́ wẽ́. ³ Ń nə́ ń ce à nɛ jàn nándùl, ń nə́ ń zə nɛ ń zhə̀l sɔ́má kɛ̀bɛ́ è wɔ́ cángá yó, ń yil ré jàn yilə. ⁴ Bá à gə n’â byɛrhɛ cu cə-byṹ fúrí myɛ à t’â dùr lwɛlɛ də́-byǐ ywẽ yé, bə̀ ǹ ŋwɛ́nɛ́ ǹdə́ nɛ : Ǹ ku w ǹ mə́ ǹ byili ni à gə́ mə̌ s’a tó mə̀gã̌ mɔ́, ǹdə́ ǹ də̀-dɔ̀lɔ̀ w ce à wu w jě kẽkẽ. ⁵ Ǹ tɛnɛ kùjú jàà ń cĩ́ à yé né, à zwə̀ bé yírh wə ; ń ló nwə̃̌ à yó, à kǎ-zɔ̌m mɔ́ sú mə̀ n’ê bɔrha. ⁶ Zhənà, wu-nyɔ̃̀ ǹdə́ pɛnɛ́ y nánfò w ga ŋwɛ́nɛ́ à kwã nɛ́ rə̀ n’ê zhìì ni twéé gakó kɔn la m’e yí à cu, à ŋwɛ́nɛ́ Bə-zhɔ-zhe kɛ̀lɛ́ w kɔn la m’e yí à cu.