¹ Nwíísí yé né cə́bal, «cə-lár ta» yilə. Dəvyidi swíísi. ² À Yi, à Yi, wɔ́ bə̀kɔ́n yil ǹ yẽ̌ ne, ń vò yé né ǹ yə̀ nɛ sɛ̃, ǹ tá ǹ cili à búbwéé yə́ ? ³ À Yi, nə̀nyɛ́nɛ́ nɛ à n’â búbwéé, ǹ tá ǹ lyár nɛ yé, cəcɛ̃ nɛ à bə shìrhə́ zhe yé. ⁴ È jà ǹ wɔ́ Yi rí páá mɔ́, ǹ jě ǹ pyɛ̀lɛ̀ də̀gwã́ y yó, ǹ còrhó w Esərayɛl lyì byǎ bɛ́ n’ê cèrhé mó mó cəcəl wə. ⁵ Wɔ́ ǹmyɛ́ nɛ nə́ dabá y’à zhí ; bə̀ y’à zhí mú, ń zɛ̃̀ ǹ nə́ ǹ vwǎrh bɛ. ⁶ Bə̀ gə y’à wǔrh bə búbwéé bə ce mó, ǹ nə́ ǹ zwẽ be ; bə̀ y’à zhí mú, bə̀ t’â nɛ cìzhìl yé. ⁷ Sə àmyɛ́ wɔ́ ka è n’ê nàn tɛ̃́, à də̀ numbyíní yé, cìzhìl kɔn numbyínsi ǹdə́ dwí rí n’ê pɔ̀ɔ́sɛ. ⁸ Lyì byɛ̀bɛ́ gakó bə̀ n’ê nɛ mɔ́ gakó n’ê mɔ̀n nɛ, Bə̀ y’à zɔ̀m à yò, bə zhízhí bə̀ ywẽ bə̀ wɔ́ : ⁹ Pə ǹ cìn Bə-zhɔ-zhe ne ! Bə̀ Bə-zhɔ-zhe mà n zwẽ mó, Bə-zhɔ-zhe mà n zwẽ mo, bə̀ ń só mó ! ¹⁰ Zhə̀nà, Bə-zhɔ-zhe, ǹ ce a du à ná pwǐ wə, ń yìlì ni kaka yə̀ nɛ zal à ná gə́ lùl ne yi ní ga ; ¹¹ Ǹ yìlì ǹdə́ à ŋwɛ́nɛ́ à ná wẽ́, ǹ yàl à Yi à ná pwǐ y wẽ́. ¹² Sə èlǎsɛ̃́, zúzúnú bwəlse ne, Ce ǹ bə̀ká vò yé né ń yẽ̌ ne yé, e jà lò lò tɛ̀nɛ́ ń la nɛ sãɔ̃ yé ! ¹³ Bə̀cùúli nánzhəzhɔ̌ kə́kɛ́lɛ́ nɛ, Basanɛ bə̀cùúlí cə́r ne rə ce rə̀ cəcəl wə. ¹⁴ Rə̀ kǎl rə̀ nyə́ rə̀ la nɛ dɔ́m ǹdə bwaarɛ rə̀ n’ê swər rə̀ m’ê vwar rə̀ zhəzhɛrɛ ta. ¹⁵ À nyɛ̌ ǹdə́ wɔ́ nɛ̃̌ mə̀ n’ê dùr tɛ̃́ ta, à kúr rí gakó pɔr dwã nɛ ; à wu w jǐrh ǹdə́ wɔ́ tù-nwə̃̌ ta ò n’ô yə̌l à wẽ́. ¹⁶ À byã mə́gɔ̀lɔ́ w j’a kù ǹdə́ wɔ́ dɔ ta, à mə̀jòlò w dɛ̃ à nyì-pǎ nɛ ; Ǹ ce a k’a wɔ́ cùù shó wə. ¹⁷ Kǔlsi tú sə kə́kɛ́lɛ́ nɛ, lyì-bəlwǎlsɛ kùkùl tú rə kə́kɛ́lɛ́ nɛ sə̀ n’ê swər ǹdə bwaarɛ ta, sə zò à jɛ̃́sɛ́ ǹdə́ à nèsé sə pwə́r. ¹⁸ Rə̀myɛ́ ce à wɔ̌ à kúr rí à m’a gà. Bə̀myɛ́ zɛ̃̀ bə̀ n’ê myə̀lɛ́ nɛ, bə̀ m’ê nyǐ ni ; ¹⁹ Bə pwà à kàmə̀zwǐsí bə̀ tə dwã nɛ, bə zɛ̃̀ bə tə́ tɛ̃́tɛ́ɛ́ à kàmmə̀-zù èdɔ̀lɔ̀ w yó bə nyǐ wɔ́ mɔ̌ ń mà n jí wə. ²⁰ Sə ǹmyɛ́, Bə-zhɔ-zhe, ǹ bə̀ká vò yé né ń yẽ̌ ne yé ! Wɔ́ ǹmyɛ́ ǹ wɔ́ à jàn rɛ́, bə̀ làlà ń sɛ̃ à kúrhí ! ²¹ Yìlì ni búlə́ shù w yé né, zwẽ à nyǔ mú kǔlsí jɔ̃̀ wa ! ²² Vwǎrh nɛ bɔrɔ w nyú wə, zwẽ ne gɔ-nɔ̃ w nyimə né yé né. ²³ Èta, à m’a bwə̀l ǹ yil ré a byili à da-byǎ bɛ́ cəcəl wə, à cèrhé ǹ yil ré dwã-gùlú w wẽ́. ²⁴ Ámyɛ̌ byɛ̀bɛ́ á n’é nyàm Bə-zhɔ-zhe mó, cèrhé-nə mo ! Ámyɛ̌ Zhakɔbɛ nèmɛ́ nɛ́ gakó, zǔl-nə mo ! Ámyɛ̌ Esərayɛl lyì byǎ bɛ́ gakó, lwəl-nə à cìn tɛ̃́ ń yé né ! ²⁵ Bə-zhɔ-zhe tá ń pɔ̀ɔ́sɛ zúzúnú cə́bal yé, ń tá ń shèè ń cìn zúzúnú cə́bal yé né yé ; ń gə bubwéé ń co mo, ń nə́ ń cili. ²⁶ Bə-zhɔ-zhe, ǹ b’ǎ yə̀ còrhó kɔn dwã gùlú w nánfɔ̀lɔ̀ w wa, à m’a pyìrh à nyí-bwəl ré lyì bí byɛ̀bɛ́ bə̀ n’ê nyàm mɔ́ mɔ́ yé né. ²⁷ Zúzúnú cìnə́ b’a jí bə sú, byɛ̀bɛ́ bə̀ n’ê pyà Bə-zhɔ-zhe mó b’a cèrhé mo. ²⁸ Lũ cə-yala nɛ́ gakó lyì bí b’a lyǐrh Bə-zhɔ-zhe yò, bə k’a bə̀ ń sono ; Tənèsé dwə́ né gakó b’a wùlì ń yé né. ²⁹ Bə̀ wɔ́ Bə-zhɔ-zhe ń wɔ́ pyɔ̌ : ń cǐ tə̀sèsé. ³⁰ Lũ w jàn cìnə́ bé gakó myɛ b’a bə̀ bə wùlì ń yé né ; lyì bí byɛ̀bɛ́ bə̀ cù bə ce lú-bɔ̀là w shó w mó, bə̀ bə bə̀ nyǔ mú jàn zhe mó myɛ m’a bə̀ bə wùlì ń yé né. ³¹ Bə̀ dwí rí rə̀ la tà bə̀myɛ́ kwã nɛ́ rə̀ bə̀ mɔ́ myɛ b’a yə̀ Bə-zhɔ-zhe tùntùnnə ; bə̀ b’a zɔ̀m Cǐnnə mó yò bə byili dwí rí rə̀myɛ nɛ.