¹ Nwíísí yé né cə́bal Dəvyidi nwíísí. ² Bə-zhɔ-zhe ! Pyɔ̌ mɔ́ nə́ ń fùù ǹ yìlù mú jàn rɛ́ yilə. Nyǐwé ! pyɔ̌ mɔ́ wu w sú ǹdə́ wu-nyɔ̃̀ ǹ sãɔ̃ mɔ́ yilə ! ³ Ǹ pɔ mɔ kɔn dɛ̀bɛ́ ń wu bùlə̀ né zhe mó, ǹ yə̀ mɔ kɔn rɛ́ dɛ̀bɛ́ ń yà ń nə́ ń lwə̀l mó mó vòm yé—Pause. ⁴ Bə̀ ǹ yà ǹ dámǎ ń cĩ́ ǹ pɛnɛ́ y nánfò w bwəl ré yó, ń pú sánnə́má pyɛ̀lɛ̀ yə́-pú wárhgáá jìm ri tɛ̀nɛ́ ò nɛ ń yó wə. ⁵ ń yà ń lwə̀l mó nyǔ, sə ǹ pɔ mɔ wa, ǹ pɔ mɔ nyǔ mə̀ t’â la zhɔ̌. ⁶ Ń zùwə́ y já, ǹmyɛ́ sɛ̃ɛ̃́ y yilə ; ǹ ce ń nə́ ń jə́jɛ̀mɛ́ ǹdə́ zùwə́. ⁷ Ǹ ce ń wɔ́ bwəl cṹ kɔn byinə nə̀ bə zhɔ zhe yilə, ǹ ce n sú ǹdə́ wu-nyɔ̃̀ ǹ yé né. ⁸ Wɔ́ Bə-zhɔ-zhe ne pyɔ̌ mɔ́ zhí ; Dɛ̃̌ Dɛ̃̌ cə́bal mɔ́ wu-bɔ̀nɔ̀ yil pyɔ̌ mɔ́ tá ń mà ń nà yé. ⁹ Bə-zhɔ-zhe, ǹ m’ǎ zə ǹ jɛ̃̀ ń zə ǹ zwə̀ bé gakó, ǹ jə̀-jĩ́ jɛ̃̀ y b’a zə byɛ̀bɛ́ bə̀ n’ê súl mó mó. ¹⁰ Dɛ̃ rɛ́ tɛ̀bɛ́ ǹ la du mú yùwə̀, ǹ b’a ce bə kwɛ̃́ ǹdə́ wɔ́ myìn-cɔ̀lɔ̀ ta, Bə-zhɔ-zhe mà n ce bə jé tɛ̃́ lyɛ́lyɛ́ ń lyim rí wẽ́, myǐn b’a jí bi. ¹¹ Ǹ b’a ce bə̀ byǎ bɛ́ jé tɛ̃́ cɛ yó, bə̀ dwí rí t’â la numbyínsí byǎ bɛ́ cəcəl w yál yé. ¹² Bə̀ bə̀ pyà lyɛlɛ ǹdə́ mɔ́, bə̀ bùl bùlə̀ námməlwǎlsɛ, ce bə̀ t’â la ŋwɔ̀nɔ́ zal yé. ¹³ Ǹ bà ń pyìrhí ǹ kwã ń zǎ bɛ, ń zə ǹ twã y ń mə́ tə bɛ.