¹ Nwíísí yé né cə́bal Dəvyidi nwíísí. ² Bə̀ zwini dɛ̃, sə́ Bə̀ Bə-zhɔ-zhe zwẽ ǹ lwə̌l mó, bə̀ Zhakɔbɛ Yi rí yil ré b’a yìlì mú ! ³ Ń mà ń zhì ń jì y w n twĩ̀ sɛ̃ɛ̃́ ǹ yilə, ń mà n zhì Səyɔ̃ nɛ́ n sɛ̃ mɔ́ ! ⁴ Ń mà n lyǐrh ǹ paánsɛ́ gakó yò, n zwẽ ǹ vwə̃̀ né námpúmə́ né cɛ̃́ɛ̃́ mɔ́ ! ⁵ Ń mà n pɔ̃́ kɔn dɛ̀bɛ́ ǹ wu bùlə̀ né zhe mó, n pyìrh kɔn dɛ̀bɛ́ gakó ǹ nə́ ǹ yǎl mɔ́ ! ⁶ Nə́ n’é fùù ǹ gə́ nɔ vwǎrh mɔ́ yilə, nə́ n’é zhẽ̌ nə́ jɛ̀rh nə́ ce dɛ̃̌ nə́ byili bə̀ ǹ jú bɛlɛ nə́ Yi rí yil ré yilə ; Bə-zhɔ-zhe mà n zwẽ kɔn dɛ̀bɛ́ ǹ nə́ ǹ lwə̀l mo mó gakó. ⁷ À j’a mǎ a lwar bə̀ Bə-zhɔ-zhe nə́ ń vwǎrh mɔ̀bɔ́ ń cír mó ; ń zhǐ dɛ̃̌ Arəzana w ń nə́ ń zwẽ mɔ̀bɔ́ ń cír mó lwə̌l mó ǹdə́ ǹ jə̀-jĩ́ y jàn rɛ́ nánfɔ̀lɔ̀ wá. ⁸ Lyì jàlà ŋwɛ́nɛ́ wɔ́ bə̀ eshə-vwɛ̃tuuri jàn rɛ́ zhən bə̀ zhe, bə̀ dwã byɛ̀ myɛ wɔ́ bə̀ eshesé jàn rɛ́ zhə̀n bə̀ zhe ; sə nə̀myɛ̌ wɔ́ Bə-zhɔ-zhe, nə́ Yi rí yil ré nə́ n’é byẽ̀. ⁹ Bə̀myɛ́ mɔ́ n’ê mà bə̀ nèrh bə twi, sə nə́myɛ̌ zhǐ dɛ̃̌ nə́ nèrh yó kẽkẽ. 10 Bə-zhɔ-zhe, vwǎrh pyɔ̌ mɔ́ ! Mùnì ga nə́ gə tú nə́ lwə̀l mo sɛ̃ɛ̃́ sə n ŋwɛ̀nɛ́ n sɛ̃ nə́ba !