¹ Núnnə bé yé né cə́bal Dəvyidi. ² Dɛ̃̌ yi rí n’ê byili Yi zùwə́ yə́, ku w kɔ̀bɔ́ ò zhǐ dɛ̃̌ o kə́kɛ́lɛ́ cɛ y mɔ́ n’ê byili rə̀ jɛ̃̀ tum rí. ³ Cə-lár n’ê byili Yi tum rí, rə̀ dõ cə-lár rɛ́ nɛ, cəcɛ̃ myɛ n’ê byili ri, è dõ cəcɛ̃ y nɛ. ⁴ È də̀ zɔ̀mà nə̀ n’ê zɔ̀mà, è də̀ tɔ̀rhà è n’ê twìrhì, sə lò mə n wɔ̀ bə̀ ń zhã̌ yə̀ nyɛ̀ɛ̀ yé : ⁵ Ǹdə́ rə̀myɛ́ ga, Yi jɛ̃̀ tumə né dweme ré n’ê dom cɛ y gakó wẽ́, rə̀ yí lũ w cə-yala nɛ́ gakó wə, wɔ́ gàà mɔ́ Yi pú kòrhó né rə pə nə̀nyɛ́nɛ́ y nɛ. ⁶ Nə̀nyɛ́nɛ́ zɛ̃̀ è nyɛrhɛ ǹdə bal ń jú kɛ̃ ta, è y’a shí è sõ jù w è du ǹdə́ wu-nyɔ̃̀ ǹdə kã̀dɔ ta ; ⁷ È y’a zhì lũ w vɔ̃̀ òdù sõ e zɛ̃̀ e dùr n vò n gu yó lũ w vɔ̃̀ w dõ mó ne ; kaka də́-byǐ t’â shèè è pwẽ̀ ré yé né yé. ⁸ Bə-zhɔ-zhe nyə́ né wɔ́ pwɛ̃́pwɛ̃́, nə̀ n’ê kwɛrhɛ numbyíní yò ; ń zɔ̀mà nɛ́ wɔ́ zhə̀n zɔ̀mà, nə̀ n’ê pɛ surhə yə̀l nə̀kùrə̀ cí ni. ⁹ Bə-zhɔ-zhe nyɔ́ɔ́-tum nyə́ né ń nə́ ń pɛ mɔ́ wɔ́ cángá, nə̀ n’ê pɛ wu-nyɔ̃̀ numbyíní wu w wẽ́, Bə-zhɔ-zhe nyə́ né wɔ́ pwɛ̃́pwɛ̃́, nə̀ n’ê yə̌r numbyíní yírhə́. ¹⁰ Bə-zhɔ-zhe nyɔ̀mɔ̀ w wɔ́ pwɛ̃́pwɛ̃́, ò j’â ŋwɛ́nɛ́ twéé twéé ò t’â zhɛ̀ gaga yé, Bə-zhɔ-zhe nyə́ né ń kwè mó wɔ́ zhə̀nà, nə̀ wɔ́ cángá. ¹¹ Nə̀ càn du sánnə́má, nə̀ cán du sánnəmá mɔ̀bɔ́ mə̀ nyɛ̌ wárhgáá mɔ́ ; nə̀ nyɛ̀ du tùr, du tù-nwə̃̌. ¹² Bə-zhɔ-zhe, ǹ tùntùnnə nə́ ń tó nə̀ dɛnnɛ ń nɛ còrhò ; n cĩ́ ni ń wẽ́ n nə nə̀ kwǎndɛ. ¹³ Wɔ́ mɔ̌ lò ń yě sɔ̀má y kɛ̀bɛ́ ń jé è yó mó párá ? Pɛ̃ sǔbri sɔ́msɛ́ shɛ̀bɛ́ à jé sə̀ yó, è j’à k’â yə̀l sə̀ pár mɔ́ yilə. ¹⁴ Sɛ̃ ǹ tùntùnnə mó ne ń bə̀ká n tó cìn-byilu cìnə́ ne yé ; bə̀ bə̀k’a ce bə̀ nyə̀ná nɛ́ ń wẽ́ yé ! Èta à t’â la yə̀-bəlwàálɛ nánfwààlɛ wɔ̀rhɔ́ yé, a yə̀ wu-põ̀ ǹdə́ bə dóó zhe cí.