¹ Nún-nə bé yé né cə́bal mɔ́. Nyǐ Bə-zhɔ-zhe tùntùnnə Dəvyidi mú, wə̃́ə̃́ y kɛ̀bɛ́ ń nún n pə Bə-zhɔ-zhe ne, ǹdə́ Bə-zhɔ-zhe gə́ vwǎrh mɔ́ ń zwə̀ bé gakó ǹdə́ Səyuuli jɔ̃̀ w mɔ́ yi ní mú : ² Bə-zhɔ-zhe, à só mó, ǹ wɔ́ à jàn rɛ́ ! ³ Bə-zhɔ-zhe wɔ́ à pàtá nəkuku, à yùlù jàà, à zwennə mó ! Ǹ wɔ́ à Yi, à pàtá nə́kulu, gàà mɔ́ à n’â nɛ à shòò jàà nɛ́ ! Ǹ wɔ́ ku kɔ̀bɔ́ ò n’ô cə̀r à yé ne búlə́ yi ní, jàn tɛ̀bɛ́ rə̀ n’ê vwǎrh nɛ mɔ́, à shìrhə́ nánfɔ̀lɔ̀ jàà. ⁴ À n’â búbwéé à wẽ́, à zhe : Cèrhé Bə-zhɔ-zhe ! Bə̀ à nɔ vwǎrh à zwə̀ bé jɔ̃̀ wa. ⁵ Cu mú y’à lyẽ né ǹdə́ mə̀ lyẽẽ́sé, ywẽ y’à zhe ne rə̀ n’ê zɛ̃̀ à wu ni ǹdə nə̀-wùlmə ta ; ⁶ Lú-bɔ̀l y’à lyẽ né ǹdə́ mə̀ lyẽẽ́se, cu pǎm rɛ y’à jàr nɛ. ⁷ Sə à zúzúnú w wẽ́, à byẽ̀ Bə-zhɔ-zhe, à búbwéé a ce à Yi rí ni ; rə jòm rə̀ pyə̀-kɛ̀lɛ́ w rə nyɛ̀ɛ̀ à cəl ré, à búbwéé vò e tu rə zhɛ̃̌ wa. ⁸ Cɛ y dom, e zhízhǐ, pyàr rɛ́ zhì tɛ̃́ rə̀ kùrə̀ né wẽ́ rə dom, wɔ́ Bə-zhɔ-zhe lyim rí gə́ zɛ̃̀ mɔ́ è ce rə dom. ⁹ Bə-zhɔ-zhe zɛ̃̀ n ce nyɛ̀rh ń myə̀lə́ w sə du, myǐn mɔ̀bɔ́ mə̀ n’ê cɔ̀ j’a du ń nyú wə : Mə kwɛ̃́ myǐn-cala nə̀ zhe. ¹⁰ Bə-zhɔ-zhe ce dɛ̃̌ yi rí ń kùr w mó bə̀ tɛ̃́, n só tɛ̃́ : Ébɔ̃ nã́-ekoro òdù y’à ŋwɛ́nɛ́ ń nèrh kùr wə. ¹¹ Ń yà ń jě màlɛ́ka èdù yó, e zə mɔ e zɛ̃̀ è ŋwɛ́nɛ́ dɛ̃̌, zho kwè mo o cĩ́ ò vɔ̀mɛ̀ yó ń mə́ ń wɔ dɛ̃̌. ¹² N zɛ̃̀ n ce cə-byín rí jǐrh ń shòò jàà, ń kòrhó w cəcəl wə, nɛ̃̌ nàmbyṹ ǹdə́ éban rə̀ pú bùrə̀ə̀m mɔ́lɛ́ mɔ. ¹³ Bə́ban rɛ́ pyi pwẽ̀ ré rə̀ jɛ̀rɛ̀ rə̀ tó ń yé rə̀ ŋwɛ́nɛ́ ń yé né mó ne, myìn-cala ǹdə́ búlə́ shú já rə du. ¹⁴ Bə-zhɔ-zhe j’a n zhì dɛ̃̌ yi w n dom cəl, Dɛ̃̌dɛ̃̌ cə́bal mɔ́ ce ń cəl du, ǹdə́ búlə́ shù ǹdə́ myìn-cala. ¹⁵ N tə ń cama nɛ́, n làà ń zwə̀ bé dwã nɛ, n ce dwà y kwɛrhɛ e súlí è byɛɛ́sɛ́, ń zwə̀ bé kwɛ̃̀ bə dùr. ¹⁶ Bə-zhɔ-zhe, ǹ gə́ nyáásɛ ń ce dome ré shí ǹ myə̀lə́ w rə du mú, ce bwǐsí wĩ sə̀ kùrə̀ né kù lyì yírhə́ na. ¹⁷ Bə-zhɔ-zhe zɛ̃̀ n zhì dɛ̃̌ yi w n zə ń jɛ̃̀ n zə nɛ, n vǔr ne nɛ̃̌ mɔ́ nánfɔ̀lɔ̀ w wa. ¹⁸ N vwǎrh nɛ à zù-bal mɔ́ ń zhe jàn dɛ̃́dɛ̃́ mɔ́ jɔ̃̀ wa, n vwǎrh nɛ à zwə̀ bé bə̀ zhe jàn du ni mú jɔ̃̀ wa. ¹⁹ À zwə̀ bé y’à jàr nɛ à zúzúnú w yi ní, sə Bə-zhɔ-zhe yàl à sanna. ²⁰ Ń zwẽ ne zwini rí wẽ́ n cĩ́ kwã nɛ́, ń gə só ne mó yilə. ²¹ Bə-zhɔ-zhe wɛ̀rhɛ́ nɛ kɔn tó ǹdə à cángá tumə né ta, ń kwɛ̃̌ nɛ à jɛ̃̀sɛ́ gə́ bə jìmdi zhe mó yilə. ²² Bə̀ à wɛ̀rhɛ́ ǹdə Bə-zhɔ-zhe nyə́ né gə́ byili ní, à bə dóó zhe à Yi rí yé né gaga yé, ²³ Ń sɔ́msɛ́ gakó y’à ŋwɛ́nɛ́ à yé né, sə à yə̀ ń nyí rə̀dù ga nɛ yẽ̌ yé. ²⁴ À yə̀ dóó zal ń yé né n byili yé, à yìlì à cìn ni ǹdə́ lwɛlɛ wɔ̀rhɔ́. ²⁵ Wɔ́ rə̀myɛ́ è súlí e ce, Bə-zhɔ-zhe kwɛ̃̌ nɛ kɔn tó ǹdə à cángá tumə né ta, kɔn tó ǹdə à jɛ̃̀sɛ́ gə́ bə jìmdi zhe ń yé né mó myɛ ta. ²⁶ Lò mɔ̀bɔ́ ń wɔ́ wu-bɔ̀nɔ̀ cə́bal, ǹ nə́ ǹ wɛ̀rhɛ́ mɔ kɔn tó ǹdə ń wu-bɔ̀nɔ̀ gə́ wɔ́ nɛ́, lò mɔ̀bɔ́ ń tũ̀twə̃̀ə̃̀ né wɔ́ cángá mɔ́, ǹ nə́ ǹ wɛ̀rhɛ́ ńmyɛ kɔn tó ǹdə nə̀ gə́ mə̌ nɛ́, ²⁷ Bə-zhɔ-zhe, lò mɔ̀bɔ́ ń bə jìmdi zhe mó, ǹmyɛ nə́ ǹ byili bə̀ rə̀- ná-cí myɛ bə jìmdi zhe yé ; sə lò mɔ̀bɔ́ ń ń wɔ́ lwɛlɛ cə́bal, ǹ nə́ ǹ wɛ̀rhɛ́ rə̀-ná-cí kɔn tó ǹdə ń lwɛlɛ rɛ́ gə́ mə̌ nɛ́. ²⁸ Ǹ nə́ ǹ vwǎrh dwí tɛ̀bɛ́ rə̀ n’ê lwəl rə̀ cìn tɛ̃́ mɔ́, ń zɛ̃̀ ǹ nə́ ǹ lwəl cìn-byilu cìnə́ yírhə́ né tɛ̃́. ²⁹ Zhə̀nà, ǹ nə́ ǹ yə̌r à pwẽ̀ ré, Bə-zhɔ-zhe, à Yi, ce à cə-byín rí yə̌r. ³⁰ À gə ŋwɛ́nɛ́ ǹdə́ ǹmyɛ́, à n’â twi shə̀dɛ́ɛ́sɛ sə̀ lyẽ bɛlɛ búlə́ yil wẽ́, sə ǹdə́ à Yi rí jàn rɛ́ yilə, à n’â gar byílí à lyɛ̃. ³¹ Yi sɔ́msɛ́ wɔ́ pwɛ̃́pwɛ̃́, Bə-zhɔ-zhe zɔ̀mɛ̀ rɛ́ cìcì mú byili bə̀ rə̀ wɔ́ zhə̀nà ; Bə-zhɔzhe wɔ́ búlə́ ku kɔ̀bɔ́ ò n’ô cə̀r lò yé né búlə́ jàà wa, lyì byɛ̀bɛ́ bə̀ zhí mu mú yilə. ³² Wɔ́ mɔ̌ lò dõ ń wɔ́ Yi, ǹdə́ è gə də̀ Bə-zhɔ-zhe mó, mɔ̌ lò dõ ń wɔ́ pàtá nə́kulu, ǹdə́ è də̀ nə́myɛ̌ Yi rí ? ³³ Wɔ́ Yi rə lyẽ jàn cã̌-tɔ̀nɔ̀ à cã̌ nɛ, rə̀ n’ê zə nɛ à zhə̀l sɔ́má kɛ̀bɛ́ è wɔ́ cángá mɔ́ yó. ³⁴ Wɔ́ ńmyɛ̌ jàn yil à n’â dùr ǹdə nɛ̀mɛ̀ ta, ń kwè ne n cĩ́ à jàà w dɛ̃̌. ³⁵ Wɔ́ ǹmyɛ̌ ń ce à n’â zə à jɛ̃̀sɛ́ à bwí búlə́ né, ń nə́ ń zə à jɛ̃̀sɛ́ à m’a zal kàmɔ̃ twã y à m’a tɛ. ³⁶ Ǹmyɛ́ ǹ nə́ ǹ pɛ nɛ à vwǎrh mɔ́ ku à m’a cə̀r à cìn yé né búlə́ jàà wa, ǹ jə̀-jĩ́ y è n’ê kwẽ́ nɛ, a jǐrh lyì-fɔ̀lɔ̀ ǹ wu-bɔ̀nɔ̀ w jàn yilə. ³⁷ Ǹmyɛ́ ǹ nə́ ǹ wɛ̀lɛ̀ sɔ́má y à nèrh kùr à m’a zhə̀lə̀, ce à k’â t’â mà à nà gaga. ³⁸ À zɛ̃̀ a pú à zwə̀ bé kùr à n’â jì, a cĩ́ jɛ̃̀ bə̀ yó, à t’â kwɛ̃̀ ǹdə́ à yə̀ be cɔ̀ lyɛ́lyɛ́ yé. ³⁹ À n’â nɔ̀m bɛ tɛ̃́ a bɔbwɛlɛ à nèrh kùr wə, bə̀ k’ê wàr bə̀ zɛ̃̀ dɛ̃̌ yé. ⁴⁰ Ǹ nə́ ǹ lyẽ jàn cã̌-tɔ̀nɔ̀ à cã̌ nɛ búlə́ né yilə, ń ce à zwə̀ bé dùr à yé né. ⁴¹ Ǹ nə́ ǹ ce à zwə̀ bé dùr à yé né, à zhìlì byɛ̀bɛ́ bə̀ n’ê súl ne mó yò lyɛ́lyɛ́. ⁴² Bə̀ gə n’ê búbwéé myɛ lò lò tá ń twí ń zwẽ be yé ! Bə̀ gə búbwéé bə̀ co Bə-zhɔ-zhe ne myɛ, ń tá ń lyár bɛ yé ! ⁴³ À n’â nɔ̀m bɛ bə jǐrh bwɛ̃́bwɛ̃́ ǹdə shó ta, zho pwà o m’o lyɛ̃, à n’â nɔ̀m bɛ tɛ̃́ ǹdə wɔ́ sɔ́má nyí ni bɔ̀bɔ̀rɔ̀ ta. ⁴⁴ Dwí rí gə tú rə̀ jǐrh lyì byɛ̀bɛ́ bə̀ t’â zwẽ nyí ni, ǹ nə́ ǹ vwǎrh nɛ rə̀ cəcəl wə ; ń kwè ne ń cĩ́ tənèrh shɛ̀bɛ́ à yə̀l sə̀ pár yó à cìní si sə yə̀ à tùntùnnə sə twĩ̀ sə pɛ̃. ⁴⁵ À gə púr à nyí a pə nyí twər rə̀dù sá, ǹdə́ bə̀ wɛ̀rhɛ́ ǹdə à gə́ byili ní, sə zhə-bal mɔ́ byǎ bɛ́ n’ê myìnì ni ; ⁴⁶ zhə-bal mɔ́ byǎ bɛ́ gə́ du bə̀ jàn rɛ́ jàà w kwã nɛ́ bə̀ n’ê pə́pǎ, ⁴⁷ Bə-zhɔ-zhe wɔ́ nã́nyì, à pàtá y yil ré nə còrhó ! Bə̀ Yi rí rə̀ vwǎrh nɛ mɔ́ yil ré còrhó w du, ⁴⁸ wɔ́ Yi rí rə̀ n’ê zwẽ à nyí ni mú, rə̀ pɔ nɛ dwə́ né à cǐ, ⁴⁹ rə̀ vwǎrh nɛ à zwə̀ bé jɔ̃̀ wa ! Ǹ zhẽ̌ à yó dɛ̃̌ a dwini à zwə̀ bé, n vwǎrh nɛ jàn cə́bal mɔ́ ń wu w bárhɛ́ mɔ́ jɔ̃̀ wa. ⁵⁰ Bə-zhɔ-zhe, wɔ́ rə̀myɛ́ è ce à n’â nún à cèrhé mó tənèsé cəcəl wə ! À m’a nún à cèrhé ǹ yil ré.