¹ Dəvyidi yi-co. Bə-zhɔ-zhe, cili à lwə̌l mó, bə̀ à lwə̌l mó wɔ́ cángá, pyèrhè ǹ zhɛ̃̌ ń cili à yi-co wə́, bə̀ zɔ̀mà nɛ́ à n’â púr à nyú w mú wɔ́ wu-pyõ̀ nyə̀ná. ² Bə̀ à cángá tumə né bə̀ ǹ yé né, mùnì ga ǹ yírhə́ nə à wu-põ̀ wə́ ! ³ Ǹ gə gwɛ̃ à wu w wə, ǹ gə byɛ́lɛ́ w cəcɛ̃ nɛ, ǹ mà ń pwírí à t’â bùl kɔn dõ yé, wɔ́ kɔn rɛ́ dɛ̀bɛ́ à n’â púr à nyú w mú mú. ⁴ È gə wɔ́ tumə né nyɛ̀bɛ́ lyì bí dwã n’ê wɛ̀rhɛ́ mɔ́ yilə, à t’â nyǐ rə̀myɛ́ sõ yé, àmyɛ́ wɔ́ ǹmyɛ́ zɔ̀mɛ̀ rɛ́ wẽ́ à zhǐ ní kẽkẽ, à n’â yìlì à cìn ǹdə́ jàn wə̌r ré cinə́ sɔ́msɛ́ ; ⁵ À zhǐ sɔ́má y kɛ̀bɛ́ ǹ byili mú yó kẽkẽ, ce à t’â mà à nà yé. ⁶ À Yi, wɔ́ ǹmyɛ́ à n’â byẽ̀ ! pyèrhè ǹ zhɛ̃̌ ń cili à zɔ̀mà nɛ́ ! ⁷ Byili ǹ wu-bɔ̀nɔ̀ wá, ǹmyɛ́ mɔ̀bɔ́ ń wɔ́ byɛ̀bɛ́ bə̀ n’ê pyà mɔ́ mɔ́ shòò jàà mɔ́, ǹ nə́ ǹ zwẽ be bə̀ zwə̀ bé jɔ̃̀ w mɔ́ ! ⁸ Yìlì ni ǹdə ǹ yə́-byǐ rí wu w ta ; pyìlì ni ǹ vɔ̀mɛ̀ nɛ́ ywə́l mó wə, ⁹ lyì-bəlwǎlsɛ́ sə̀ n’ê nwɛ̀nɛ̀ nɛ mɔ́ yé né, à zwə̀ bé bə̀ lyìmə né zɛ̃̀ bə kə́kɛ́lɛ́ nɛ mɔ́ yé né. ¹⁰ Bə̀ pyi bə̀ wun ní ǹdə́ nɛ, bə̀ n’ê zɔ̀m cìn-byilu zɔ̀mà. ¹¹ Bə̀ ŋwɛ́nɛ́ nə́ nə̀-gwárá yó bə̀ n’ê jì, bə̀ kə́kɛ́lɛ́ nə́ba bə̀ zhɛ̀, bə̀ cĩ́ pɔ̀mɔ̀ tɛ̃́ bə̀ la nə́ba tɛ̃́ ju. ¹² Bə̀ nyɛ̌ ǹdə wɔ́ bɔrɔ ò zɔ kɔn ò la dɔ́m ta, ǹdə wɔ́ bwar-byǐ è shèè sɔ́má yó è n’ê yìlì kɔn è la zal ta. ¹³ Bə-zhɔ-zhe, zɛ̃̀ dɛ̃̌, zhəl ń jəl wə, zə w ń ji tɛ̃́ ! Zwẽ ne lyì-bəlwǎlsɛ́ jɔ̃̀ w ǹdə́ ǹ búlə́ shù wə́. ¹⁴ Bə-zhɔ-zhe, zwẽ ne numbyínsí jɔ̃̀ w ǹdə́ ǹ jɛ̃̀ yá, zwẽ ne lũ w kɔ̀bɔ́ lyì bí jɔ̃̀ wa ! Wɔ́ lũ w kɔ̀bɔ́ nyǔ mú mə̀ wɔ́ bə̀ cəl kɔn rɛ́, ǹ pɔ bɛ ǹmyɛ́ wẽ̀ ré bə jí bə ce bə̀ sǔl ní w bə sú ; bə̀ byǎ bɛ́ jú bə sú, bə dàl tɛ̀bɛ́ bə̀ bə rə̀ tum zhe mó bə cĩ́ bə̀ nɛ̀mɛ́ nɛ. ¹⁵ Sə è gə wɔ́ àmyɛ́ yilə, à bə dóó zhe yé, rə̀myɛ́ ce à yírhə́ b’a nə mɔ́ ; à gə tú à zɛ̃̀ à jan rɛ́ wa, à gə nɔ ǹ yé yə́, à m’a sú.