¹ Dəvyidi nwə̃́ə̃́. Ǎ Yi, yìlì ni ! Bə̀ wɔ́ ǹmyɛ́ sono è wɔ́ à shòò jàà. ² À n’â wə̀l Bə-zhɔ-zhe ne náà : Ǹ wɔ́ à Cǐnnə, ǹ wɔ́ à cɛ̀nɛ̀ rɛ́ Yó-cí námpúm ! ³ Lyì bí byɛ̀bɛ́ bə̀ wɔ́ ǹ lyì tə̀nà w wɔ́, byɛ̀bɛ́ bə̀ n’ê nyàm mɔ́ mɔ́, wɔ́ bə̀myɛ́ bə̀ wɔ́ à kɔn à só ǹdə́ à wu gakó. ⁴ Lyì n’ê zwẽ cèmé bə̀ bə̀ pyɛ̀lɛ́ dwã yó, bə̀ n’ê dùr yə né dwã bɛ́ kwã nɛ́ mɔ́ ; à t’â tó be à zwə́l bə̀ vwə̃̀ né yé, à t’â byẽ̀ bə̀ yə né yilə à nyú w yé. ⁵ Amyɛ́ wɔ́ Bə-zhɔ-zhe ń wɔ́ à cəl kɔna, ńmyɛ̌ kǎ-zɔ̌m mɔ́ wẽ́ à n’â nywɛ̀ nɛ́. Wɔ́ Bə-zhɔ-zhe jɔ̃̀ à cəl ré ŋwɛ́nɛ́ rə̀ t’â la zɔ̌ yé ; ⁶ À nɔ à cəl kɔn tɛ̀bɛ́ rə̀ nyɛ̀, bə̀ pɔ nɛ kɔn dɛ̀bɛ́ rə̀ càn. ⁷ À n’â ce Bə-zhɔ-zhe, à Cícírnə mó nə̀báná ; À gə pyě tɛ̃́ cəcɛ̃ nɛ, ń nə́ ń zal à wu ni. ⁸ Bə-zhɔ-zhe já ń ŋwɛ́nɛ́ à yírhə́ w twéé twéé ; ń gə ŋwɛ́nɛ́ à jə̀-jĩ́ sõ à t’â mà à nà yé. ⁹ À zhe wu-nyɔ̃̀ à wu wẽ́, à n’â fùù à éshirhə́ y wẽ́, à yala nɛ́ myɛ n’ê shìrhə́. ¹⁰ Ǹ tá ǹ la nɛ́ yõ̌ a mɛ̃ cùùri wẽ́ yé, ǹ tá ǹ la byì-sónó ne yõ̌ n dɛ̀rhɛ̀ yé. ¹¹ Ǹ mà ń ce a nə nyǔ sɔ́má y shò ; bə̀ wɔ́ ǹmyɛ́ sono wu-nyɔ̃̀ ŋwɛ́nɛ́ o bɔrh, ǹ jə̀-jĩ́ ni kùjú kɔ̀bɔ́ ò nyɛ̀ ŋwɛ́nɛ́ byinə nə̀ bə zhɔ̌ zhe yilə.