¹ Wɔ́ etər cɛ zhízhǔ dwí mə̀ n’ê zhǐ tənèsé wẽ́, bùlə̀ nyɛ̀bɛ́ nə̀ bə kùr zhe dwə́ né cəcəl w èta mɔ́ ? ² Bə̀kɔ́n yil cɛ yó pyǎ bɛ́ zɛ̃̀ bə nyáásɛ. Yó-cinə́ bé ce nyí bə̀ kwã nɛ́, bə̀ m’ê bwí ǹdə́ Bə̀-zhɔ̌-zhe ǹdə́ mɔ̀bɔ́ ń cír mó ? ³ Bà-nà nə́ sə́ bə̀ nyáná nɛ́, nə́ zwẽ nə́ cìnə̀ ! ⁴ Nyǐ mɔ̀bɔ́ ń jě pyɛ̀lɛ̀ rɛ́ yó Arəzana w mɔ́ nə́ ń mɔ̀nà, Cǐnnə mó nə́ ń mɔ̀n bɛ. ⁵ Ń zɛ̃̀ ń nə́ ń zɔ̀m ǹdə́ bɛ́ ǹdə́ lyim, ń nə́ ń pwupwriri tɛ̃́ ń zɛ̃̀ bə̀ wu ni ń zhe : ⁶ Wɔ́ àmyɛ́ à cír à pyɔ̌ mɔ́ a pɔ̃ ŋwɔ̀nɔ́ Səyɔ̃ w ò wɔ́ à pyɔ̀ w yó ! ⁷ À m’a bwə̀l nyí rí a byili ; bə̀ nyǐ Bə-zhɔ̌-zhe mó wò ne : Ǹ wɔ́ à byǐ ! À lùl mó zà. ⁸ Lwə̌l ne, à m’a pɔ̃́ tənèsé, lũ cə-yala nɛ́ gakó w mó sə yə̀ ǹ cəl kɔna ; ⁹ Ǹ b’ǎ zə cɔ̀bɔ́ də̀-də̀dɔ̀lɔ̀ ń mà sɛ ń bɔbwɛlɛ ǹdə də-mɔrna nə̀zhĩ̌ ta. ¹⁰ Pyǎ, èlǎsɛ̃́, zə-na surhə á m’á vò ! Cɛ yó bù-kárna, zwẽ-nə còrhò ! ¹¹ Tó-nə Bə-zhɔ̌-zhe ne, dǔrnə mó, s’á wɛ̀rhɛ́ wu-nyɔ̃̀ ǹd’á n’á kəkə ! ¹² Kwə̀ə̀le-nə byǐ mú, mùnì ǹ bə̀ká n kwè lyim, á yò zhìlì á sɔ̀má y yó yé, bə̀ ń lyim rí la zã̀ɔ̃̀ là là. Wu-nyɔ̀ cìnə́ bé gakó wɔ́ lyì byɛ̀bɛ́ bə̀ zhí mu.