¹ Nwíísí yé né cə́bal. Dəvyidi nwíísi. Bə surhə cə́bal nə́ wə̀l ń wẽ́ : Bə̀ Yi tɛ̀nɛ́ nɛ́ gaga ! Lyì bí wɔ́ lwɛlɛ cìnə́, bə̀ twĩ̀ pwara tumə, mə̀dù ga tɛ̀nɛ́ ń nə́ ń wɛ̀rhɛ́ cɛ̀nɛ̀ yé. ² Bə-zhɔ̌-zhe zhǐ dɛ̃̌ Arəzana w ń nə́ ń nyǐ numbyíní byǎ bɛ́, ń la nyǐ ǹdə́ lò gə ŋwɛ́nɛ́ ń zhe surhə, ń nə́ ń pyà Yi. ³ Bə̀ gakó jé, bə̀ gakó wɔ́ lwɛlɛ cìnə́; mə̀dù ga tɛ̀nɛ́ ń nə́ ń wɛ̀rhɛ́ cɛ̀nɛ̀ yé, bá mə̀dù cìcì ! ⁴ Byɛ̀bɛ́ gakó bə̀ n'ê wɛ̀rhɛ́ lwɛlɛ rɛ́ mɔ́, nə yə̀ bə̀ cìn dwĩ̀ nà ? Bə̀ n'ê dɔ̀m à dwí rí, bə̀ n'ê zə rɛ rə̀ yàl bə̀ kùjú. ⁵ Wɔ́ rə̀myɛ́ è ce bə̀ la pəpǎ ǹdə́ wu-zhìlù, ǹdə́ Yi gə tú dwí rí rə̀ wɔ́ cángá mɔ́ cəcəl wə. ⁶ Pə-na cìzhìl kɔn rɛ́ dɛ̀bɛ́ zúzúnú cə́bal nə́ ń dɛ̃̀ mɔ́ shò-kwã nɛ́... ⁷ Wɔ́ mɔ̌ ń mà n ce Esərayɛl vwǎrh mɔ́ shí Səyɔ̃ mɔ́ ? Wɔ́ ǹdə́ Bə-zhɔ̌-zhe gə tú ń ká ń zɔ ń dwí rí bə̀ y'a zɔ bə vò yómre mó rə̀ túwə́, Zhakɔbɛ mà n fùù, Esərayɛl mà n wɛ̀rhɛ́ wu-nyɔ̃̀.