¹ Nə́ y’à jě Babyəlɔlɛ bwǐsí nyí ni, nə́ n’é kúrhə́, nə́ m’é bùl Səyɔ̃ yò. ² Nə́ y’ǎ jele nə́ bwàárɛ dɛ̃̌ cɔ w sɔlɛbá yó. ³ Rə̀myɛ́ yó né, byɛ̀bɛ́ bə̀ ŋwɛ̀nɛ́ nə́ba búlə́ né wẽ́ mó, zɛ̃̀ bə̀ n’ê lwə̀l nə́ba bə̀ nə́ nún nwíísí, byɛ̀bɛ́ bə̀ n’ê nwɛ̀nɛ̀ nə́ba mɔ́, zɛ̃̀ bə̀ n’ê lwə̀l nə́ba bə̀ nə́ wɛ̀rhɛ́ wu-nyɔ̃̀ bə̀ zhe : Nún-nə Səyɔ̃ nwíísi màngɛlɛ́ á byili nə́ba ! ⁴ Wɔ́ etər Bə-zhɔ-zhe nwíísí dwí nə́ m’ǎ zɛ̃̀ nə́ n’é nún zhəəle jè y myɛ wẽ́ né ? ⁵ Zhərəzalɛm, à gə swě ǹ yò, sə jə̀-jĩ́ swě àmyɛ yò ! ⁶ À gə yə̀ ǹ yò lyǐrh, sə à mə̀jòlò w dɛ̃ à nyì-pǎ nɛ, ǹdə́ à gə yə̀ Zhərəzalɛm zal a yə̀ à wu-nyɔ̀ kɔn mɔ́ ! ⁷ Bə-zhɔ-zhe, lyǐrh Edɔm byǎ bɛ́ yò, bə̀myɛ́ byɛ̀bɛ́ Zhərəzalɛm dɛ̃ rɛ́ yù wə̀, bə̀ y’a j’a zhe : wǔr-nə wə, wǔr-nə wə, á ló tɛ̃́ o vò zə ò nə̀ kùr-jì y ni ! ⁸ Bayəlɔnɛ bə̀kɔ́, ǹmyɛ́ cɔ̀, sə wu-nyɔ̀ m’a yə̀ nɛ́ ǹdə́ lò mɔ̀bɔ́ ń la mɔ́ kɔn rɛ́ tɛ̀bɛ́ ǹ wɛ̀rhɛ́ mɔ́ cìcì mú cǎrh mɔ́, lwɛlɛ rɛ́ tɛ̀bɛ́ ǹ wɛ̀rhɛ́ nə́ba mɔ́ ! ⁹ Wu-nyɔ̀ m’a yə̀ nɛ́ ǹdə́ lò mɔ̀bɔ́ ń la ǹ byǎ bɛ́ zal, n cĩ́ pàtá nə́kulu yó n mà n bɔbwɛlɛ mɔ́ !