¹ Pyɔ̀ w jíl nwə̃́ə̃́ yə́. Wu-nyɔ̀ zhe ne ǹdə́ bə̀ gə wò ne : Bə̀ ń lyɛ̃ nə́ vò Bə-zhɔ-zhe jì y wə ! ² Zhərəzalɛm ! nə́ tú nə́ zhǐ ǹ bwə̀rsé nyí ni. ³ Zhərəzalɛm ! nyǐ bə̀ lù mú ǹdə́ cɔ kɔ̀bɔ́ bə̀ lù ò jààsɛ́ bə ce dwã w námpúm mú ta. ⁴ Wɔ́ gàà mɔ́ kwálsɛ n’ê jìl sə̀ zhə̀l né, Bə̀-zhɔ-zhe kwálsɛ́ n’ê jìl sə̀ zhə̀l né, ǹdə nyə́ né gə́ byili ní, sə̀ n’ê zhə̀l né sə̀ cèrhé Bə-zhɔ-zhe. ⁵ Bə̀ wɔ́ gàà mɔ́ bùrsí cángá mɔ́ pyɛ̀lɛ̀ də̀gwésé ŋwɛ́nɛ́, gàà mɔ́ Dəvyidi kɛ̀lɛ́ y pyɛ̀lɛ̀ də̀gwésé ŋwɛ́nɛ́. ⁶ Lwə̌l-nə Zhərəzalɛm yə̀-zùlə́ né. Nyǐ byɛ̀bɛ́ bə̀ só mó mó b’a jòm bə shǐrh ! ⁷ Bə̀ yə̀-zùlə́ yál jààsɛ́ ǹ lú byílsí ń mə́ kə́kɛ́lɛ́ mɔ́ wẽ́, sə pyɔ̌-kǎlsɛ́ jòm ǹdə́ yə̀-zùlə́ shɛ́ɛ́ ! ⁸ Wɔ́ à da-byǎ bɛ́ ǹdə́ à dɔwa bá yil à n’â yǎl sə yə̀-zùlə́ jòm ǹ sono ; ⁹ wɔ́ Bə-zhɔ-zhe, nə́ Yi rí jì y yil à n’â dwì wu-nyɔ̀ nyí ǹ yilə.