¹ Pyɔ̀ w jíl mó nwə̃́. À zhẽ̌ à yé a ce pyàr rɛ́ səta… Wɔ́ gàà mɔ́ à kúrhí sãɔ̃ mɔ́ m’a shí ní ? ² À kúrhí y sãɔ̃ mɔ́ n’ê shí wɔ́ Bə-zhɔ-zhe sono, ńmyɛ̌ mɔ̀bɔ́ ń wɛ̀rhɛ́ dɛ̃̌ ǹdə́ cɛ y mɔ́ sono. ³ Ń tá ń la shɔ̀nɔ́ ń mà ǹ nà gaga yé, bə̀ mɔ̀bɔ́ ń nə́ yìlì mú mú tá ń dɛ̀ɛ̀ gaga yé. ⁴ Nyǐ mɔ̀bɔ́ ń nə́ ń yìlì mú mú, tá ń dɛ̀ɛ̀ yé, ń tá ń zhír myɛ yé, ńmyɛ̌ ń nə́ ń yìlì Esərayɛl nɛ. ⁵ Wɔ́ Bə-zhɔ-zhe ń wɔ́ ǹ yìlnə mó, wɔ́ Bə-zhɔ-zhe ń wɔ́ ǹ ywə́l mó ǹ jə̀-jĩ́ ni mú. ⁶ Ce cɛ gə lɔ́wá, nə̀nyɛ́nɛ́ t’â la mɔ́ mǎ gaga, cəcɛ̃ nɛ myɛ, cànà y t’â la mɔ́ mǎ yé gaga. ⁷ Bə-zhɔ-zhe mà n yìlì mú lwɛlɛ dwí gakó wẽ́, n yìlì ǹ myə̌l ré ; ⁸ Bə-zhɔ-zhe mà n yìlì ǹ du mú ǹdə́ ǹ kwãɔ̃ mɔ́, kɔn zhì zà è m’e la byinə nə̀ bə zhɔ̌ zhe.