¹ Zǔl-nə Bə-zhɔ-zhe ! Wu-nyɔ̃̀ ŋwɛ́nɛ́ ǹdə́ lò mɔ̀bɔ́ ń nə́ ń nyàm Bə-zhɔ-zhe, ń wu nyɛ̀ dɛ̃́dɛ̃́ ǹdə́ ń nyə́ né, n zɛ̃̀ ń nə́ ń wɛ̀rhɛ́ ǹdə nə̀ gə́ n’ê byili ní mú. ² Rə̀-ná-cí nɛ̀mɛ́ nɛ́ m’a zə jàn cɛ yó, Yi m’a cĩ́ bwəl wu-cángá cə́bal byǎ bɛ́ yó. ³ Ń sõ kɛ̀lɛ́ y w wɔ́ cìn-nɛrɛ́ ǹdə́ nə̀cɛ̀ndɛ rə̀ m’a yə̀ è wẽ́, sə wu-cángá tumə né m’a j’â ŋwɛ́nɛ́ twéé twéé gaga yilə. ⁴ Pwẽ̀ m’a du cə-byín wẽ́ wu-cángá cìnə́ yilə, ǹdə́ lò mɔ̀bɔ́ ń wɔ́ nɔ̀nɔ̀ dùrnə, ǹdə́ kúrhí sanna bɛ́ yilə. ⁵ Wu-nyɔ̃̀ ŋwɛ́nɛ́ ǹdə́ lò mɔ̀bɔ́ ń nə́ ń dùr lò nɔ̀nɔ̀, n já ń nə́ ń jìmì ń dõ né mó, ń nə́ ń twĩ̀ ń tumə né nə̀ tó ǹdə Yi zɔ̀mɛ̀ rɛ́ gə́ n’ê byili ní ! ⁶ Bə̀ rə̀-ná-cí tá ń la ń nà mǎ gaga yé, bə̀ t’â swě wu-cángá cə́bal yò gaga yé. ⁷ Ń gə nyɛ̀ɛ̀ bə̀ yò kɔ̀bɔ́ ò bə càn gə bànà, ń wu t’â zɛ̃̀ yé ; bə̀ ń wu w zhǐ kẽkẽ ; ń zhe Bə-zhɔ-zhe zhə̀nà. ⁸ Ń wu w zhǐ kẽkẽ ; ń tá ń dùr ywẽ gaga yé, ń já ń zhǐ ń mə́ ń nyǐ ń zwə̀ bé ń yé né. ⁹ Ń nə́ ń pɛ ń kɔn nánzhəzhɔ̌ nə̀mwà nɛ ; ń cángá tumə né jà nə̀ ŋwɛ́nɛ́ twéé twéé gaga ; ń yó n’ô zhẽ̌ dɛ̃̌ ǹdə́ zùwə́. ¹⁰ Lyì-bəlwɛ̀lɛ́ gə n’ê nyǐ mu, è lyim zɛ̃̀ rə̀ n’ê yì, è n’ê dɔ̀m è yə́lə́ dwã nɛ, myǐn n’ê jí è wẽ́ ; wẽ̀ ré tɛ̀bɛ́ lyì-bəlwǎlsɛ́ n’ê yǎl mɔ́ n’ê jé tɛ̃́.