¹ Zǔl-nə Bə-zhɔ-zhe ! À m’a zǔl Bə-zhɔ-zhe ǹdə́ à wu gakó, wu-càngá cìnə́ dwã joló w wẽ́, ǹdə́ dwã-gùlú w jàà wa. ² Bə-zhɔ-zhe tumə né wɔ́ tumə nánfwààlɛ, nə̀ n’ê pyà lyì bí byɛ̀bɛ́ gakó bə̀ só ne mó. ³ Bə-zhɔ-zhe tumə né wɔ́ jə́jɔ̀mɔ́ ǹdə́ cɛ̀nɛ̀ tumə, ń cángá tumə né j’â ŋwɛ́nɛ́ nɛ́ gaga nə̀ t’â zhɛ̀ yé. ⁴ Ń wɛ̀rhɛ́ wò-jààrɛ, rə̀ yò t’â la sǒ yé, Bə̀-zhɔ-zhe wɔ́ nɔ̀nɔ̀-dǔr ǹdə́ zúzúnú cə́bal sanna. ⁵ Ǹ pɔ kùjú lyì bí byɛ̀bɛ́ bə̀ n’ê nyàm mɔ mɔ́ nɛ ; ń nə́ ń lyǐrh ń dɔbrɛ́ ń zɔ mɔ́ yò twéé twéé. ⁶ Ń twĩ̀ tumə n byili ń dwí rí ni bə̀ ń zhe jàn, ń gə́ zwẽ tənèsé n pə rɛ, sə̀ wɔ́ bə̀ cəl kɔn mɔ́ yilə ; ⁷ Ń tumə né ń wɛ̀rhɛ́ mɔ́ n’ê byili bə̀ ń wɔ́ zhə̀n ǹdə́ cánga cə́bal ; ń nyə́ né ń pɔ mɔ́ gakó wɔ́ zhə̀nà, ⁸ nə̀ zhǐ nə̀ nà y yó byinə nə̀ bə zhɔ̌ yilə, ń pɔ nɛ zhə̀n ǹdə́ cángá wẽ́. ⁹ Ń twĩ̀ vwǎrh mɔ́ mə bə̀ mə zwẽ ń dwí rí, ń zə dɔbrɛ ǹdə́ rɛ n cĩ́ ri rə̀ zhǐ byinə nə̀ bə zhɔ̌ yilə ; ń yil ré càn rə̀ bə dõ zhe yé. ¹⁰ Bə-zhɔ-zhe nyɔ̀mɔ̀ w wɔ́ surhə né lwar nə̀ kùr-jirə́ yə́; lyì bí byɛ̀bɛ́ gakó bə̀ n’ê wɛ̀rhɛ́ ǹdə surhə né gə́ n’ê byili ní mú, wɔ́ lyì byɛ̀bɛ́ bə̀ lɔ́ lárma mɔ́ páá mɔ́. Bə-zhɔ-zhe zǔl mó j’a ŋwɛ́nɛ́ twéé twéé gaga yilə.