¹ Nwíísí yé né cə́bal mɔ́. Dəvyidi nyǎ. Yi, wɔ́ ǹmyɛ́ à n’â zùlə́, ce ǹ bə̀k’á shĩ̌ ń nyí gaga yé ! ² Nyǐ bə̀ zɔ nyìnù nyə́ né námməlwǎlsɛ́ bə̀ la m’e bú ǹdə́ nɛ, bə̀ zɔ kɔma mə̀jòlò bə̀ m’ê zɔ̀m ǹdə́ nɛ. ³ bə zɔ zɔ̀mà ǹdə́ nə̀ swẽ̌ bə m’e kə́kɛ́lɛ́ nɛ, bə̀ m’ê bwí ǹdə́ nɛ nánfò rə̀ bə kùr zhe yé. ⁴ bə̀ wɔ́ à zwə̀, sə ǹdə́ rə̀myɛ́ ga, à j’à só be ; sə àmyɛ́ wɔ́ Yi cã̌ nɛ à zhe né à yi-co wẽ́. ⁵ Wɔ́ lwɛlɛ bə̀ n’ê càrh nɛ cɛ̀nɛ̀ rɛ́ yilə, bə̀ n’ê càrh nɛ zùùri à sónó w yilə. ⁶ Pə-na mɔ lyì-bəlwɛ̀lɛ́ nɛ e cìní, sə cà cir-nə bə̀ n zhì ń jə̀jĩ́ ni ! ⁷ Bə̀ gə tú bə̀ tú ń bùrsi kɔ́ yi ni, sə́ pɔ̃ dóó, rə̀myɛ́ yi ní ń yi-co w m’a jǐrh yə̀-bəlɔ̀lɔ̀ ń yilə ⁸ ce ń dwã nɛ́ t’â la nánzhəzhɔ̌ yú yé, sə lò dõ kwè ń jàà y n twĩ̀ ń jàà wa ! ⁹ mùnì ga ń bə̀sɔ́ná jǐrh bə̀tǎlsɛ, sə ń kɛ̃ jǐrh ejə̀-kɛ̃ ! ¹⁰ Sə ń bə̀sɔ́ná bɛ́ zɛ̃̀ bə̀ n’ê yiyiri tɛ̃́ bə̀ m’ê lwə̀lə̀, bə̀ vò kwã gaga bə̀ jì-bwə̀r ré nyí ní, bə pyà kùjú bə jí ! ¹¹ Sə ń jim cə́bal bə̀ n zə mɔ n zwẽ ń kɔn dɛ̀bɛ́ ń zhe mó, sə zhələ myɛ shí ní bə b’e búbú ń wẽ̀ ré tɛ̀bɛ́ ń twĩ̀ n nə mɔ́ ! ¹² Sə lò lò bə̀ká n cĩ́ ń yə́-zhìl ń wẽ́, ń bə̀tǎlsɛ́ myɛ nɔ̀nɔ̀ bə̀k’a zə lò lò yé ; ¹³ Sə ń nɛ̀mɛ́ nɛ́ jé tɛ̃́ cɛ yó, lò lò bə̀ká n zɔ̀m bə̀ yil ré lyì byɛ̀bɛ́ bə̀ bàn rə̀myɛ́ kwã nɛ́ sono yé ! ¹⁴ Sə ń dabá lwɛlɛ rɛ́ yò w j’â n’ê lyǐrh Bə-zhɔ-zhe yé né, sə bə ná myɛ yə̀-bəlɔ̀lɔ́ w bək’a shàrh gaga yé ! ¹⁵ Sə dɛ̃ gakó bə̀ lwɛlɛ rɛ́ j’â zhǐ Bə-zhɔ-zhe yé né, ń yò lyǐrh j’a jé tɛ̃́ cɛ yó. , ¹⁶ Bə̀ ń yə̀ nɔ̀nɔ̀ dǔr zal yé, ń nwɛ̀nɛ̀ zúzúnú ǹdə́ bə lò zhe cìnə́, kɔn m’e vò e yí n gu numbyíní kɛ̀bɛ́ è wu w zhìlì mú ! ¹⁷ Wɔ́ bwəl námməlwɛ̀lɛ́ ń yà ń só : wɔ́ bwəl námməlwɛ̀lɛ́ è m’a jòm ń yó ! ń yà ń bə só sə n bwəl bwəl cɛ̀nɛ̀ n pə lò ne yé : Ce ń mà n zə nyan ǹdə́ bwəl náàcɛ̀nɛ́ ! ¹⁸ Ǹ mà n zù bwəl námməlwɛ̀lɛ́ y ǹdə ń gàmə̀zwǐ ta, rə zù ń wẽ́ ǹdə nɛ̃̌ ta, rə yə̀ ǹdə nwə̃̌ ta ń kúr rí wẽ́ ! ¹⁹ rə yə̀ gàmmə̀-lyɔ̀nɔ̀ n pyìlì, rə yə̀ cã̌-tɔ̀nɔ̀ n lyẽ ń cã̌ nɛ twéé twéé ! ²⁰ Bə̀ rəmyɛ́ yál kwǎndɛ, Bə̀-zhɔ-zhe la mə n kwɛ̃̌ à zwə̀ bé, ǹdə́ byɛ̀bɛ́ bə̀ n’ê zɔ̀m wu-bárhɛ́ zɔ̀mà bə̀ pɛ nɛ mɔ́ ! ²¹ Sə Bə-zhɔ-zhe, à Cǐnnə, ǹmyɛ́ twĩ̌ ǹ yil ré yil ń pə àmyɛ́ nɛ, vwǎrh nɛ, bə̀ ǹ wu-bɔ̀nɔ̀ w já ! ²² Àmyɛ́ wɔ́ zúzúnú ǹdə́ bə lò zhe cí, à wu w zhìlì à wẽ́. ²³ À n’â lyɛ̃ à la ǹdə wɔ́ ywə́l mə̀ círhí ta, bə̀ jì ni ǹdə səsɔ̃̀ ta. ²⁴ À lyẽ à nyí, a jòm à nə̀dwə́nə́ yó, a kwɛ̀rɛ̀, à jàn rɛ́ k’ê bə já yé, ²⁵ À jǐrh cìzhìl kɔn bə̀ yilə, nyǐ bə̀ n’ê zhízhí bə̀ ywẽ́. ²⁶ Bə-zhɔ-zhe, à Yi, bə̀ ń sɛ̃ nɛ, ń vwǎrh nɛ ǹ wu-bɔ̀nɔ̀ w wẽ́ ! ²⁷ Bə-zhɔ-zhe, mùnì ga bə lwar, bə̀ wɔ́ ǹmyɛ́ jɛ̃̀ y è wɛ̀rhɛ́ èta ! ²⁸ Bə̀myɛ́ gə bwəl bwelé námməlwɛ̀lɛ́, ǹmyɛ́ wɔ́ bwəlé náàcɛ̀nɛ́ ǹ nə́ ń bwələ ; bə̀ gə zɛ̃̀, bə̀ m’a jí cìzhìlə̀, sə ǹ tùntùnnə mó mà n fùù ǹdə́ wu-nyɔ̃̀. ²⁹ Bə̀ cìzhìl nánfɔ̀lɔ̀ zə à zwə̀ bé, sə bə zù bə̀ cìzhìl ré ǹdə kàmmə̀zù-èdɔ̀lɔ̀ ta ! ³⁰ À m’a zə à nyí a zǔl Bə-zhɔ-zhe a ce dɛ̃̌dɛ̃̌, à m’a cèrhé mó lyì nánjə̀jóló cəcəl wə ; ³¹ Bə̀ ń zhe nə̀mɔ̀ mɔ́ ń jə̀jĩ́ wə, mùnì n vwǎrh mɔ lyì bí byɛ̀bɛ́ bə̀ n’ê kɛ́ ń bùrsi bə̀ pɛ mɔ dóó mó jɔ̃̀ wa.