¹ Dəvyidi nwə̃́ə̃́. ² Ǎ Yi, à wu w jě ! À m’a nún, a dú à dɛ̀lɛ̀ wẽ̀ ré : wɔ́ àmyɛ còrhó wə́ ! ³ À dàkɔ̀nɔ́ ǹdə́ à zɔ̃̀, zɛ̃̀-na dɛ̃̌, à m’a zhàrh cə-lár rɛ́. ⁴ Bə-zhɔ-zhe ! à m’a zǔl mó dwə́ né cəcəl wə, à m’a nún mú tənèsé cəcəl wə. ⁵ Bə̀ ǹ wu-bɔ̀nɔ̀ w zhə̀l ò wɔ dɛ̃̌ yə né yə́-pɛ̀lɛ́ wa, ǹ zhə̀n rɛ́ vò gaga rə yí éban rɛ́ wa. ⁶ Ǎ Yi ! zɛ̃̀ ń zhì dɛ̃̌ yə né yó, sə ǹ zùwə́ y yə̀ cɛ y yó ! ⁷ mùnì ga ǹ byì-swěnnə bé nə vwǎrh, zwẽ nə́ba ǹdə́ ǹ jə̀jĩ́ yə́, sə zwẽ nə́ lwə̌l mó ! ⁸ Yi zɔ̀m rə̀myɛ́ yò rə̀ jì y w rə wɔ̀ : à m’a jí bɛlɛ, à m’a tə̀ Səshɛm, a mɛrhɛ Sucote vɔlɔ wá ; ⁹ Àmyɛ́ à cǐ Galadɛ ǹdə́ Manasɛ ; Efərayɛl wɔ́ à pyɛ̀lɛ̀ yə́-pú, Zhəda zɛ̃̀ ń wɔ́ à pyɛ̀lɛ̀ də̀-dɔ̀lɔ̀ wá ; ¹⁰ Mɔwabɛ wɔ́ à nɛ̃̌ shɔ nə̀bwɛ́nɛ́ à n’â shɛ nɛ̃̌ è wẽ́ ; wɔ́ Edɔm yó à n’â dol à nə̀cìlə́ né ne ; wɔ́ Fələsətɛ̃́bá yó à n’â bya à búbwéé ǹdə́ wu-nyɔ̃̀ nɛ́ ! ¹¹ Wɔ́ mɔ̌ lò ń mà n zə nɛ a vò cɔ w kɔ̀bɔ́ ò zhe jàn rɛ́ mɔ́ w mɔ́ ? Wɔ́ mɔ̌ ń mà n zə nɛ a vò Edɔm mɔ mɔ́ ? ¹² Ǎ à Yi ! è nə də̀ ǹmyɛ́ nà, ǹmyɛ́ mɔ̀bɔ́ ǹ yà ǹ cìrh nə́ba ń ce kwã nɛ́ mɔ́ nà, ǹ kə́ ǹ tá ǹ tó nə́ shə̀dɛ́ɛ́sɛ́ nɛ ǹ dwi mú nà ? ¹³ Bə̀ ń ń sɛ̃ nə́ kúrhí nə́ zwini rí wẽ́ ! Bə̀ numbyíní sɛ̃ɛ̃́ wɔ́ kɔn nánfò.