¹ Zǔl-nə Bə-zhɔ-zhe, bə̀ nyǐ ń càn ! bə̀ ń nɔ̀nɔ̀-dǔr mó t’â zhɛ̀ yé ² Wɔ́ èta lyì bí byɛ̀bɛ́ bə̀ nɔ Bə-zhɔ-zhe vwǎrh mɔ́ mɔ́ n’ê wə̀l né, byɛ̀bɛ́ ń zwẽ zù-bal mɔ́ jɔ̃̀ w mɔ́, ³ n zɛ̃̀ n ce bə shí tənèsé gakó wẽ́, yi-púrhí ǹdə́ yi-zùr, lũ jə-jə̀jĩ́ sõ ǹdə́ lũ jə̀gwã̀ sõ, n cĩ́ dwã yó ! ⁴ Bə̀myɛ́ byɛ̀bɛ́ bə̀ y’à n’ê yiyiri dɛ̃̌ gɔ-elũ èpòlò w bə̀ dúdú, bə̀ bə cɔ nɛ sə bə̀ jòm ò wẽ́ mó, ⁵ nɔrh ǹdə́ nə̀nyɛ̀lɛ̀ n’ê gwi bi, bə̀ jàn rɛ́ y’à n’ê yǎl rə zhɛ̀ mɔ́. ⁶ Sə bə̀ zúzúnú w wẽ́, bə̀ búbwéé bə ce Bə-zhɔ-zhe ne, n bə̀ n vwǎrh bɛ ; ⁷ n zə bɛ n kwè sɔ́má cángá, bə m’e yí cɔ kɔ̀bɔ́ numbyínsí wɔ̌ sə̀ m’a jòm ò wẽ́ mó wə. ⁸ Bə zɛ̃̀ bə zǔl Bə-zhɔ-zhe, ń wu-bɔ̀nɔ̀ w ǹdə́ ń tũ̀-fwààlɛ́ numbyíní byǎ bɛ́ yil mó yilə ! ⁹ Bə̀ ń pɔ nɛ̃̌ numbyíní y kɛ̀bɛ̀ nə̀nyɛ̀lɛ̀ y’à zhe mó ne e nyɔ̃̀ e gu è nə̀nyɛ̀lɛ̀, n pə numbyíní y kɛ̀bɛ́ nɔrh mɔ́ y’à zhe mó ne kùjú e jí e sú. ¹⁰ Byɛ̀bɛ́ bə̀ y’à ŋwɛ́nɛ́ cə-byín ǹdə́ cu ywə́l wẽ́ mó ! bə̀ y’à ŋwɛ́nɛ́ yómre jè ǹdə́ nyáná wẽ́ mó, ¹¹ bə̀ gə́ y’à cẽ Yi zɔ̀mɛ̀ rɛ́ zõ yò mó, bə zhɛ̃̀ Dɛ̃̌Dɛ̃̌ cə́bal mɔ́ cícú mú yil mó. ¹² Yi zɛ̃̀ rə ce nɔ̀nɔ̀ zə bɛ bə̀ wun zhìlì ; bə̀ yə̀ lò nɛ n sɛ̃ bə̀ kúrhí yé. ¹³ Bə̀ zúzúnú w wẽ́, bə̀ zɛ̃̀ bə búbwéé bə ce Bə-zhɔ-zhe ne, n vwǎrh bɛ bə̀ wu-zhìlù w wẽ́ ; ¹⁴ n ce bə du cə-byín rí ǹdə́ cu mú ywə́l mó wə, n sə́ bə̀ nyáná nɛ́. ¹⁵ Bə zɛ̃̀ bə zǔl Bə-zhɔ-zhe, ń wu-bɔ̀nɔ̀ w ǹdə́ ń tũ̀-fwààlɛ́ numbyíní byǎ bɛ́ yil mó yilə ! ¹⁶ bə̀ ń kɔ́ kàmɔ w bwə̀ə̀lé, n sə́ cɛ̌brɛ́ sàfɔ̌r rɛ́. ¹⁷ Bə surhə zhe cìnə́ bé dwə́ə́ré tumə né ǹdə́ bə̀ lwɛlɛ rɛ́ tumə né ce bə jǐrh zúzúnú cìnə́. ¹⁸ Bə̀ y’à n’ê jí kùjúr tɛ̀bɛ́ gakó rə̀ wɔ́ súsúlú kùjúr rí mú, ce bə̀ y’à n’ê dwə̀rh cu mú bwə̀ə̀lé ne. ¹⁹ Sə bə̀ zúzúnú w wẽ́, bə̀ zɛ̃̀ bə búbwéé bə ce Bə-zhɔzhe ne, n vwǎrh bɛ bə̀ wu-zhìlù w wẽ́ ; ²⁰ N twĩ̀ ń zɔ̀mɛ̀ rɛ́ rə bə̀ rə wárh bɛ, n ce bə lú bə̀ yə gɔ́rɔ́ w twi yé. ²¹ Bə zɛ̃̀ bə zǔl Bə-zhɔ-zhe, ń wu-bɔ̀nɔ̀ w ǹdə́ ń tũ̀-fwààlɛ́ numbyíní byǎ bɛ́ yil mó yilə ! ²² Bə zwə́l nə̀bán-co vwə̃̀ bə pə Yi, bə búbwéé wu-nyɔ̃̀ búbwéése bə m’e bwə̀l Yi tũ̀-fwààlɛ́ yò bə̀ byili ! ²³ Lyì bí byɛ̀bɛ́ bə̀ y’à n’ê jòm bǔ-bwələ né nə̀-fɔ̀lɔ̀ w wẽ́, bə̀ m’ê twĩ̀ nɛ̃̌ mɔ́ wẽ́ mɔ́, ²⁴ lyì bí bə̀myɛ́ mɔ́ nɔ Bə-zhɔ-zhe tũ̀-fwààlɛ́ gɔ́rɔ́ nánlyilyùmú w wə. ²⁵ Yi zɛ̃̀ rə zɔ̀m, zho nánfɔ̀lɔ̀ j’a shí tɛ̃́ o zɛ̃̀, o dom nə̀-fɔ̀lɔ̀ w nɛ̃̀ mɔ́. ²⁶ Mə n’ê zal bɛ mə̀ zɛ̃̀ mə̀ zhə̀l dɛ̃̌, mə̀ k’a zal bɛ mə̀ twí tɛ̃́ gɔ́rɔ́ w nánlyilyùmú w wə ; bə̀ kúr j’a cì tɔ̀rɔ̀ zwini rí rə̀ zhe be mó yilə ; ²⁷ bə̀ yérh zɛ̃̀ sə́ n’ê jíjílí, bə̀ n’ê tutwi tɛ̃́ ǹdə sɛ̃́ gə́ zhe lò ní ta, bə̀ lwar mɔ́ mɔ̀bɔ́ bə̀ y’à yě mó gakó j’a jé. ²⁸ Bə̀ zwini rí wẽ́, bə zɛ̃̀ bə búbwéé bə ce Bə-zhɔ-zhe ne, n vwǎrh bɛ bə̀ wu-zhìlù w wẽ́ ; ²⁹ n ce zho w zhì, cɛ jǐrh shɛ́ɛ́, dweme ré rə̀ y’à n’ê wùl mó j’a gu. ³⁰ 3Bə̀ zɛ̃̀ bə̀ n’ê fùù ǹdə́ wu-nyɔ̃̀ cɛ y gə́ jǐrh shɛ́ɛ́ mɔ́ yilə, rə̀myɛ́ yó, Bə-zhɔ-zhe já n zə bɛ́ n byɛrhɛ bə yí bù-cǔ w kɔ̀bɔ́ bə̀ y’à la ò yó mó yó. ³¹ Bə zɛ̃̀ bə zǔl Bə-zhɔ-zhe, ń wu-bɔ̀nɔ̀ w ǹdə́ ń tũ̀-fwààlɛ́ numbyíní byǎ bɛ́ yil mó yilə ! ³² Bə cèrhé Bə-zhɔ-zhe dwí rí dwã gùlú w wẽ́, bə zǔl mó náncɛsɛ́ dwã jóló jàà y wa. ³³ Ń nə́ ń ce bwǐsi wĩ, n ce sə jǐrh èpwə́rə́, n ce nə̀-bùlsi shĩ sə kù cə-kùlì. ³⁴ N ce tənà kɛ̀bɛ́ è cɛ y càn è zhe kwàl mɔ́, jǐrh tənà kɛ̀bɛ́ è cɛ y lyə́r è yə̀ nə̀kwə̃̌, ǹdə́ è lyì bí gə n’ê twĩ̀ wu-bárhɛ́ tumə. ³⁵ Ń nə́ ń lyə́r gɔ-elũ èpòlò o jǐrh jàà nɛ̃̌ n’ê dùr tɛ̃́ ò wẽ́, n ce cə-kùlì jǐrh nə̀-bùlsi jàà. ³⁶ N kwè nɔ̀rhna n cĩ́ è wẽ́. N ce e jǐrh cɔ bə̀ jòm. ³⁷ Bə zə cɛrh bə dù, bə zhele sɛ̃́-cèmé, nə byì nə ce byǎ bə kwẽ. ³⁸ N cĩ́ bwəl bə̀ yó, bə lù byǎ bə pù bə jǐrh nánjə̀jóló, bə̀ vwàmá nɛ́ t’â la kɔ̀rɔ̀ gaga yé. ³⁹ Zwini rí ǹdə́ nɔ̀nɔ̀ w ce jàlà bɔ̀ bə jǐrh námpɔ́lɛ́, ⁴⁰ Yi ce lyì-fwààlɛ́ jǐrh mɔ̀n kɔna, rə ce bə̀ n’ê yiyiri tɛ̃́ sɔ́má tɛ̀nɛ́ bə̀ la tó yé, ⁴¹ rə zɛ̃̀ zhẽ̌ nə̀mwà ǹdə́ zúzúnú cìnə́ yó dɛ̃̌, rə vwǎrh bɛ bə̀ nɔ̀nɔ̀ w wẽ́, rə ce bə dwə́ né pù ǹdə vwàmá ta. ⁴² Wu-cángá cìnə́ bé m’a nə rə̀myɛ́, bə̀ fùù ǹdə́ wu-nyɔ̃̀, sə lwɛlɛ rɛ́ nyí rí m’a pyi. ⁴³ Bə̀ lò mɔ̀bɔ́ ń zhe surhə sə rə̀-ná-cí dɛ̃̀ ń cìn ǹdə́ ywẽ̀ né nə̀myɛ́ mɔ́, sə n cili Bə-zhɔ-zhe wu-bɔ̀nɔ̀ yò w náàcɛ̀nɛ́.