¹ Zǔl-nǝ Bǝ-zhɔ-zhe! Zǔl-nǝ Bǝ-zhɔ-zhe, bǝ̀ ń càn, ń nɔ̀nɔ̀-dǔr mɔ́ ŋwɛ́nɛ́ twéé twéé! ² Mɔ̌ lò ń mà n zɔ̀m Bǝ-zhɔ-zhe tùm-fwààlɛ́ n byili? Wɔ̌ ń mà n bwǝ̀l ń zǔl mó gakó n byili? ³ Wu-nyɔ̃̀ ŋwɛ́nɛ́ ǹdə́ lyì bí byɛ̀bɛ́ bə̀ n’ê zwẽ ń nyə́ né mó, bə̀ n’ê twĩ̀ cángá tumə né twéé twéé mó ! ⁴ Bə-zhɔ-zhe, tə̀ ǹ cɛ̀nɛ̀ rɛ́ ǹ nə́ ǹ wɛ̀rhɛ́ mɔ́ yil ń lyǐrh à yò ǹ dwí rí yilə ! tə̀ rə̀myɛ́ yil ń lyǐrh à yò, sə́ sɛ̃ ǹ dwí rí ni, ⁵ mùnì ga a nə ǹ lyì bí byɛ̀bɛ́ ǹ cír mó bə̀ zhe wu-nyɔ̃̀, sə ǹ dwí rí wu-nyɔ̃̀ w ce a tó re a fùù ǹdə́ wu-nyɔ̃̀ ! ⁶ Nə́ dówə́ ǹdə nə́ dabá ta, nə́ wɛ̀rhɛ́ lwɛlɛ, nə́ wɛ̀rhɛ́ kɔn dɛ̀bɛ́ rə̀ bə càn yé. ⁷ Nə́ dabá yə̀ bə̀ yala nɛ́ zhìlì bə sú màmyaarhɛ ǹ wɛ̀rhɛ́ Ezhipti ní mú kùr yé, bə̀ swě ǹ wu-bɔ̀nɔ̀ w nánfɔ̀lɔ̀ w yò, bə̀ yə̀ ǹ nyí ni zwẽ nə̀-fɔ̀lɔ̀ w nyí ni yé, nə̀kwə̃̀ y nə̀-fɔ̀lɔ̀ w nyí ni mú. 8 Sə Yi vwǎrh bɛ rə̀ yil ré jàn yilə, rə̀ m’e byili rə̀ jàn nánfɔ̀lɔ̀ wá. ⁸ Sə Yi vwǎrh bɛ rə̀ yil ré jàn yilə, rə̀ m’e byili rə̀ jàn nánfɔ̀lɔ̀ wá. ⁹ Rə zə lyim rə bú nə́kwə̃̌ nə̀-fɔ̀lɔ̀ wá, ò nɛ̃̌ mɔ́ wĩ o kù ; rə ce bə tó ò wẽ́ bə vò bə lyɛ̃ ǹdə wɔ́ gɔ-elũ èpòlò w ta. ¹⁰ Rə̀ vwǎrh bɛ lò mɔ́ mɔ̀bɔ́ ń yà ń nə́ ń bwí ǹdə́ bɛ mɔ́ jɔ̃̀ wa, rə̀ zwẽ be zù-bal mɔ́ ŋwɔ̀nɔ́ w jɔ̃̀ wa. ¹¹ Sə nɛ̃̌ mɔ́ zɛ̃̀ mə mɔ́lɛ́ bə̀ zwə̀ be, mə̀dù ga yə̀ lú yé. ¹² Bə zɛ̃̀ bə zwẽ nyí bə̀ Yi zɔ̀mɛ̀ rɛ́ wɔ́ zhə̀nà, bə̀ zɛ̃̀ bə nún bə zǔl ré. ¹³ Kɔn yə̀ dɛnɛ ǹdə́ bə̀ swě Yi tumə né rə̀ twĩ̀ ní mú yò, bə̀ t’â zwẽ nyí bə̀ Yi m’a pyìrh kɔn rɛ́ dɛ̀bɛ́ rə̀ byili bə̀ la wɔ̀rhɔ̀ mɔ́ yé. ¹⁴ Bə zhì gɔ-elũ èpòlò w gàà mɔ́, bə yẽ̌ shilə námməlwǎlsɛ́ zù bə̀ wẽ́, bə zɛ̃̀ bə zhẽ̀ Yi gɔ-elũ èpòlò w wẽ́. ¹⁵ Yi zɛ̃̀ rə pə bɛ kɔn rɛ́ dɛ̀bɛ́ bə̀ lwə̀l re mó ; rə̀myɛ́ kwã nɛ́ rə zɛ̃̀ rə ce címí kɛ̀bɛ́ è n’ê zal lò ǹ kwɛ̀rɛ̀ mɔ́ zə bɛ. ¹⁶ Bə zɛ̃̀ bə zhì bə̀ zúlə́ y gàà w bə̀ n’ê dùr Muyiisi ǹdə́ Arɔ̃ bwɛ̃̌, Muyiisi mú mɔ̀bɔ́ Bə-zhɔ-zhe cír mó. ¹⁷ Rə̀myɛ́ ce, cɛ y j’a kàr bɔ̀l e lyì Datã, e pú Abyəram myɛ lyì bí tɛ̃́ ; ¹⁸ Myǐn kwɛ̃́ bə̀ lyì bí, myìn-zhù jí lyì-bəlwǎlsɛ́ gakó. ¹⁹ Bə zhì Orɛbɛ nɛ́ bə zwìrhì nũ̌-bòlò, bə zɛ̃̀ bə wùlì nũ̌-bòlò w nyɔrhɔ w bə̀ zwìrhì mú yé né, ²⁰ bə zə nɔ̃ w ò n’ô dɔ̀m gɔ w mɔ́ bə m’e lyə́r bə̀ zùwə́ yə́. ²¹ Bə swě bə̀ Yi rí tɛ̀bɛ́ rə̀ vwǎrh bɛ mɔ́ yò, Yi rí tɛ̀bɛ́ rə̀ wɛ̀rhɛ́ tumə né nánfwààlɛ́ Ezhipti ní mú, ²² rə̀ wɛ̀rhɛ́ màmyaarhɛ́ Sham tənà y w mɔ́, rə̀ wɛ̀rhɛ́ wò-jààrɛ́ nə̀kwə̃́ nə̀-fɔ̀lɔ̀ w yó mó, bə̀ swě ywẽ̀ né rə̀myɛ́ mɔ́ gakó yò. ²³ Yi zɛ̃̀ rə wɔ̀ bə̀ rə̀ la bɛ gu lyɛ́lyɛ́ ; rə̀myɛ́ yò né, Muyiisi mú rə̀ cír mó, zɛ̃̀ n zhì rə̀ yé né n lwə̀l ré, mùnì ga n ce rə yẽ̌ rə̀ lyim rí nánfɔ̀lɔ̀ w rə̀ kwè mó ne, rə̀ bə̀k’a zhìlì bi yé. ²⁴ Bə cẽ tənà y kɔn dɛ̀bɛ́ rə̀ nyɛ̀ ŋwɛ́nɛ́ è wẽ́ mó yò, bə̀ yə̀ nyí zwẽ bə̀ Bə-zhɔ-zhe zɔ̀mɛ̀ rɛ́ wɔ́ zhə̀n yé, ²⁵ bə zɛ̃̀ bə̀ n’ê ŋwúŋwùní bə̀ kwə̀ə́rhé wẽ́, bə̀ yə̀ Bə-zhɔ-zhe zɔ̀mɛ̀ rɛ́ cili yé. ²⁶ N zɛ̃̀ n zhẽ̌ ń jɛ̃̀ n bwəl nyí ń la ce bə ló tɛ̃́ gɔ-elũ èpòlò w wə, ²⁷ ń la ce bə nɛ̀mɛ́ nɛ myɛ ló tɛ̃́ tənèsé cəcəl wə, sə bə làà tɛ̃́ tənèsé wẽ́. ²⁸ Bə̀ y’à zɛ̃̀ bə̀ n’ê cèrhé Baalɛ-Pəwɔrɛ, bə̀ n’ê dɔ̀m vwə̃̀ né bə̀ zwə́l lyì-cùùrí yil mó nàmá bɛ́. ²⁹ Bə zə bə̀ tũ̀-twə̃̀ə̃̀ né nə̀myɛ́ mɔ́ bə tò Bə-zhɔ-zhe lyim rí ni, ce nyəlɛ j’a tu bə̀ yó nə̀ n’ê zal bɛ ³⁰ Rə̀myɛ́ yó né, Fyine já n zɛ̃̀ n kwɛrhɛ yò w Yi dɔbrɛ́ shò kwã nɛ́, nyəlɛ́ rɛ́ lyì bí ni zal mɔ́ j’a zhɛ̀ ; ³¹ rə̀myɛ́ ce Yi j’a nyǐ mú ǹdə wu-cánga cə́bal ta, byinə nə̀ bə zhɔ̌ zhe yilə. ³² Bə k’e zɛ̃̀ Bə-zhɔ-zhe lyim ni, n tə̀ rə̀myɛ́ yil n pə còrhò-tum Muyiisi ni Mərəba nàná bɛ́ nyí ni ; ³³ bə̀ bə̀ y’à cɔ̀ Muyiisi wu ni dɛ̃́dɛ̃́ ce ń yà ń kə́ ń wàr ń púr ń nyí ń zɔ̀m pamparɛ̃ɛ̃ yé. ³⁴ Bə̀ y’à t’â cɔ̀ dwə́ né ǹdə Bə-zhɔ-zhe gə́ pɔ bɛ nyí bə̀ bə̀ cɔ̌ nɛ nɛ́ yé. ³⁵ Bə zə bə̀ cìn bə gùlí tənèsé lyì bí ni, bə̀ n’ê tó be bə̀ cèrhè bə̀ tùntwə̃̀ə̃̀ né tũ̌. ³⁶ Bə cèrhé bə̀ wò-zwə́ə́lé, rə jǐrh pɔ̀mɔ̀ bə̀ yilə ; ³⁷ bə zə bə̀ byǎ ǹdə́ bə̀ bəkwá bə zwə́l vwə̃̀ bə̀ wò-zwə́ə́lé yó, ³⁸ bə ló bə dóó zhe cí jal tɛ̃́, bə̀ byǎ bɛ́ ǹdə́ bə̀ bəkwábɛ́ jal mɔ́ tɛ̃́, byɛ̀bɛ́ bə̀ zwə́l Kanaã wò-zwə́ə́lé yó mó, lyì-gurnə bé j’a ce tənà y jìmdi. ³⁹ Bə tó bə̀ tùntwə̃̀ə̃̀ né dɛnnɛ bə ce bə̀ cìn jìmdi, bə̀ tùntwə̃̀ə̃̀ né ce bə twĩ̀ fwə̌l tumə. ⁴⁰ Rə̀myɛ́ yi ní, Bə-zhɔ-zhe lyim j’a zɛ̃̀ myìn-zhù ń dwí rí yó, n kwè ń sə̀pwà lyì bí ǹdə pwarha kɔn ta. ⁴¹ N zɛ̃̀ n yǎrh bɛ tɛ̃́ tənèsé lyì bí jɔ̃̀ wa ; byɛ̀bɛ́ bə̀ y’à n’ê jí zùùrí ǹdə́ bɛ mɔ́ zɛ̃̀ bə̀ cǐ bi ; ⁴² Bə̀ zwə̀ bé zɛ̃̀ bə̀ n’ê nwɛ̀nɛ̀ bɛ, bə̀ wùlì tɛ̃́ bə̀ ŋwɔ̀nɔ́ w kùr wə. ⁴³ Twər nánzhəzhɔ̌, Bə-zhɔ-zhe vwǎrh bɛ ; sə bə̀ cẽ ń nyí shɔ̀nɔ́ yò ǹdə bə̀ gə́ wɔ́ nɛ́, bə zɛ̃̀ bə jǐrh zúzúnú cìnə́ bə̀ lwɛlɛ rɛ́ yilə. ⁴⁴ Sə Bə-zhɔ-zhe zɛ̃̀ n nə bə̀ nɔ̀nɔ̀ wá, bə̀ gə́ tú bə̀ n’ê lwə̀l mó yi ni. ⁴⁵ N zɛ̃̀ n lyǐrh ń dɔbrɛ́ ń zɔ bə̀ yil mó yò ; n zɛ̃̀ n dùr bə̀ nɔ̀nɔ̀ ń wu-bɔ̀nɔ̀ w nánfɔ̀lɔ̀ w yilə, ⁴⁶ n zɛ̃̀ n ce nɔ̀nɔ̀ dùr byɛ̀bɛ́ bə̀ zɔ bɛ bə vò yómré jè y mó gakó wẽ́. ⁴⁷ Bə-zhɔ-zhe, nə́ Yi, vwǎrh nə́ba ! Byẽ̌ nə́ba ń cĩ́ dwã yó tənèsé cəcəl wə, mùnì ga nə́ zǔl ǹmyɛ́ mɔ̀bɔ́ ǹ wɔ́ pwɛ̃́pwɛ̃́ mɔ́ yil ré. sə nə́ zə nə́ zùwə́ y nə́ nɔ ǹ sono mó nə́ m’é zǔl mó ! ⁴⁸ Bə̀ Bə-zhɔ-zhe, Esərayɛl Yi rí rə̀ ŋwɛ́nɛ́ byinə nə̀ bə zhɔ̌ mó, yil ré nə còrhó ! Bə̀ dwə́ né púlə́ púlə́ wál bə̀ : Amɛn ! Zǔl-nə Bə-zhɔ-zhe !