¹ Zǔl-nə Bə-zhɔ-zhe ! Byẽ̌-nə ń yil ré ! Bwə̌l-nə ń tũ̀-fwààlɛ́ á byili dwə́ né cəcəl wə. ² Nún-nə, nún-nə, ń yil ré còrhó yilə ! Zɔ̌m-na ń màmyaarhɛ́ gakó yò á byili ! ³ Wɛ̀rhɛ́-na wu-nyɔ̃̀ ń yil ré yilə ! Bə̀ lyì bí byɛ̀bɛ́ bə̀ n’ê pyà Bə-zhɔ-zhe mó fùú ǹdə́ wu-nyɔ̃̀ ! ⁴ pyǎ-na Bə-zhɔ-zhe kúrhí y ń nə́ ń sɛ̃ mɔ́, Pyǎ-na á n’á twí á zhì ń yé né twéé twéé ! ⁵ Lyǐrh-nə tumə né nánfwààlɛ́ tɛ̀bɛ́ ń wɛ̀rhɛ́ mɔ́, ǹdə́ màmyaarhɛ́ tɛ̀bɛ́ ń wɛ̀rhɛ́ mɔ́ yò, ǹdə́ ń pyɛ̀lɛ̀ ń nə́ ń jí mú, ⁶ ámyɛ̌ ń tùntùnnə Abərham nɛ̀mɛ́ nɛ́, Zhakɔbɛ byǎ bɛ́ ń cír mó yil mó ! Bə-zhɔ-zhe wɔ́ nə́myɛ̌ Yi ; ńmyɛ̌ ń cǐ lũ w púlə́ púlə́. ⁷ Bǝ-zhɔ-zhe wɔ́ nǝ́ Yi rí, ń ca.ngá tumǝ né n'ê twĩ̀ cɛ y gakó yó. ⁸ Ń nə́ ń lyǐrh ń dɔbrɛ́ yò twéé twéé, ń nyə́ né ń bwəl nə̀ nyí mú wɔ́ nɛ̀mɛ́ kùrə̀ mɔ̀rhɔ̀ yilə, ⁹ dɔbrɛ́ ń zɔ ǹdə́ Abəraham mɔ́, ǹdə́ nyí rí ń bwəl Yəzakɛ nɛ mɔ́ ; ¹⁰ n zɛ̃̀ n kə́ n bwérhé n byili ni Zhakɔbɛ nɛ, nə yə̀ dɔbrɛ byinə nə̀ bə zhɔ̌ zhe Esərayɛl yil mú, ¹¹ n wɔ̀ : À m’a pɔ̃́ Kanaã tənà yá, á la cìnú ǹdə á cəl kɔn ta. ¹² Rə̀myɛ́ yi ní ǹdə́ bə̀ y’à bə já yé, bə̀ y’à wɔ́ zhələ námpɔ́lɛ́ dɛ̃́dɛ̃́ tənà y wa, ¹³ Sə bə̀ y’à n’ê zhə̀l tə̀nà w bə lyɛ̃ bə vò è dõ wẽ́, bə vò pyɔ̌ sõ bə lyɛ̃ bə vò ń dõ sõ ; ¹⁴ Bə̀k’á shɛ̀nɛ́ á jɛ̃̀ dwə̀rh lyì bí byɛ̀bɛ́ á cír mó ne yé, s’á bə̀k’á wɛ̀rhɛ́ lwɛlɛ à nyì-zwennə bé ne yé ¹⁵ ! Bə̀k’á shɛ̀nɛ́ á jɛ̃̀ dwə̀rh lyì bí byɛ̀bɛ́ á cír mó ne yé, s’á bə̀k’á wɛ̀rhɛ́ lwɛlɛ à nyì-zwennə bé ne yé ! ¹⁶ N zɛ̃̀ n ce nɔrh tu tənà y wa, n cə̀r kɔn dɛ̀bɛ́ dwí gakó lò mà ń wɛ̀rhɛ́ sə́ nə ǹ nyí-kùjú mú yé né. ¹⁷ N zɛ̃̀ n twĩ̀ bal mə̀dù bə sono : Zozɛfu bə̀ yè mo ǹdə yóm ta. ¹⁸ Bə zə mɔ bə lyẽ ń nèsé kẽkẽ, bə ce se cɔ̌brɛ wẽ́, ¹⁹ kɔn m’e yí dɛ̃ rɛ́ tɛ̀bɛ́ Zozɛfu yà ń byili mú, èta bə̀ lwar bə̀ Yi zɔ̀mɛ̀ rɛ́ Bə-zhɔ-zhe y’ǎ byili mu mú wɔ́ zhənà. ²⁰ Rə̀myɛ́ yó né, pyɔ̌ mɔ́ ce bə lwə̌r nyáná nɛ́ ń nèsé ne, pyɔ̌ ǹ yà ń cǐ dwə́ né púlə́ púlə́ mó ce bə vǔr mo. ²¹ N zɛ̃̀ n kwè mo n cĩ́ ń wɔ́ ń kɛ̀lɛ́ yó-cə́bal, n ce ń cǐ ń nə̀cɛ̀ndɛ́ gakó, ²² mùnì ga n ŋwɛ̀nɛ́ ń nə́ ń zal ń kwã-lyì bí ń lyẽ ǹdə ń gə́ nə́ ń yǎl nɛ́, sə n cèrhè surhə né ń cɔ w yé né cìnə́ bé ne. ²³ Wɔ́ rə̀myɛ́ kwã nɛ́ Esərayɛl zɛ̃̀ e bə̀ Ezhipyi, Zhakɔbɛ lyɛ̃ n vò n jòm Sham tənà y wa. ²⁴ Yi ń dwí rí lùlì y pù dɛ̃́dɛ̃́, rə̀ zhe jàn nánfɔ̀lɔ̀ du rə̀ zwə̀ bé. ²⁵ Yi zɛ̃̀ rə lyə́r tənà y lyì bí wun ní, bə zɛ̃̀ bə̀ n’ê jí zùùri ǹdə́ Yi dwí rí, bə̀ n’ê nwɛ̀nɛ̀ rɛ. ²⁶ Yi zɛ̃̀ rə twĩ̀, rə̀ tùntùnnə Muyiisi, ǹdə́ Arɔ̃ mɔ́ rə̀ y’à cír mó bə̀ sono. ²⁷ Muyiisi ǹdə́ Arɔ̃ zɛ̃̀ bə wɛ̀rhɛ́ wò-jààrɛ bə̀ cəcəl wa, bə̀ wɛ̀rhɛ́ màmyaarhɛ Sham tənà y wa. ²⁸ Yi zɛ̃̀ rə twĩ̀ cə-byṹ o bə̀ o pyi bi, sə bə̀ yə̀ yó-kùlù wɛ̀rhɛ́ ǹdə́ Yi zɔ̀mɛ̀ rɛ́ cilu yé. ²⁹ Yi ce bə̀ nàná bɛ́ lyə́r bə jǐrh jal, rə ce bə̀ mɔ́mɔ̌sɛ́ cì. ³⁰ rə ce nyàswəəle du tɛ̃́ rə sú tənà yá, rə lyɛ̃ rə vò pyǎ bɛ́ jìsí wẽ́. ³¹ Rə zɛ̃̀ rə zɔ̀m, zɔ̀rh ǹdə́ sə swã̀ j’a du tɛ̃́, kǎrsɛ myɛ j’a du sə sú bə̀ jààsɛ́ gakó wẽ́. ³² Rə̀ dwà y yẽ̌ nɛ̃̌ nyɔ́ nɛ e k’a nyɔ̀ shìmì, rə ce myìn-zhù j’a sú tənà y wa. ³³ Rə gu sɛ̃́-cèmé né ǹdə́ épyùúlí, rə jǐrh bə̀ cèmé né cɔ w mɔ́ rə ló tɛ̃́. ³⁴ Rə zɛ̃̀ rə zɔ̀m, səsɛ̀mɛ̀ nánjə̀jóló lò wàr ń la gál j’a du tɛ̃́, ³⁵ nə j’a jí tənà y gɔ w gakó, ǹdə́ bə cɛsɛ́ cèmé né byǎ bɛ́. ³⁶ Rə gu bə̀ byì-cɛsɛ́ gakó tənà y w mɔ́, bə̀ byǎ bɛ́ byɛ̀bɛ́ bə̀ j’a zɛ̃̀ bə zɛ̃́ bə zə bə̀ bɛ́lɛ́ jàn rɛ́ bə lù mú. ³⁷ Rə̀ ce rə̀ dwí rí zə sə̀byi-shɔ̃̀ ǹdə́ sánə́má rə m’e du Ezhipti ní, sə rə̀ kwálsɛ́ wẽ́, lò mə̀dù ga cìcì yə̀ ń nà mà yé. ³⁸ Ezhipti lyì bí wu zɔ nyàn bə̀ dwi rí y yilə, bə̀ wu-zɛ̃̀ɛ̃́ y kɛ̀bɛ́ è y’à zhe be bə̀ yil mó y’à já dɛ̃́dɛ̃́. ³⁹ Cɛ y gə lɔ́wá, Yi ce ébɔ̃ pú bi, sə cɛ y gə yìì rə ce myǐn du mə̀ pwẽ̀ ré yěr be. ⁴⁰ Bə zɛ̃̀ lwə̀l kùjú Yi ni, rə ce nə̀pàrpǎr shí dɛ̃̌ rə ló tɛ̃́ rə pə bɛ, rə ce búrú shí dɛ̃̌ o bə̀ rə pə bɛ bə dɔ̃̀ bə sú. ⁴¹ N pul pàtá nəkulu, nɛ̃̌ du mə dùr tɛ̃́ ; mə̀ pyě tɛ̃́ cə-da wẽ́ ǹdə wɔ bwǐ nɛ̃̌ ta. ⁴² Bə̀ ń lyǐrh ń zɔ̀mɛ̀ rɛ́ ń zɔ̀m ǹdə́ ń tùntùnnə Abəraham mɔ́ yò. ⁴³ Yi ce ń dwí rí du Ezhipti ní ǹdə́ wu-nyɔ̃̀, rə̀ lyì bí rə̀ cír du wu-nyɔ̃̀ ǹdə́ bubwéése cəcəl wə. ⁴⁴ N pə bɛ tənèsé cɛsɛ́, bə̀ cìní dwə́ né tumə né nə̀ twĩ̀ mú byǎ bɛ́, ⁴⁵ mùnì ga bə̀ wɛ̀rhɛ́ ǹdə kɔn rɛ́ dɛ̀bɛ́ ń kɛ̃ n pɛ mɔ́ ta, sə bə zwẽ ń nyə́ né ń pɔ mɔ́. Zǔl-nə Bə-zhɔ-zhe !