¹ À wu, Zǔl Bə-zhɔ-zhe ! Bə-zhɔ-zhe, à Yi, byinə byinə gakó ń wɔ́ nánfɔ̀lɔ̀ ! Ǹ jə́jɔ̀mɔ́ mɔ́ ǹdə́ zùwə́ y pyìlì mú ǹdə gɔ̀nɔ̀ ta ! ² Ń zù pwẽ̀ ré ǹdə kàmmə̀zù-èdɔ̀lɔ̀ ta ; ń pú dɛ̃̌ yə né ǹdə kòrhó ta. ³ ń ce nɛ̃̌ mɔ́ zə dwã nɛ mə̀ wɔ́ ǹ jàà ǹ jě ; ń kwè éban nɛ́ rə̀ wɔ́ ń búlə́ eshə-vwɛ̃tu ń jě, ń ŋwɛ́nɛ́ zho w w ń nə́ ń zhə̀l ń bànà. ⁴ ń ce zho w wɔ́ ń zɔ̀mà byilnə, myìn-zhù zɛ̃̀ mə̀ wɔ́ ń tùntùnnə. ⁵ ń cĩ́ cɛ y è kùr jàà y wa, è t’â la zhízhǔ gaga yé. ⁶ ń yà ń zə gɔ́rɔ́ nánlyilyùmú n pyìlì y ǹdə kàmə̀zwǐ ta, nɛ̃̌ mɔ́ zɛ̃̀ mə̀ y’à zhǐ pyàr rɛ́ yó ; ⁷ mə̀ y’à dùr ǹ lyim rí yé né, ǹdə́ mə̀ gə́ nyɛ̀ɛ̀ ń byɛɛ́sɛ́ yi ní mú. ⁸ Pyàr zɛ̃̀ rə̀ zhǐ dɛ̃̌, vwaalɛ́ bə̀ tɛ̃́, rə̀ zhǐ jàà y kɛ̀bɛ́ ń cĩ́ ri è wẽ́ mó wə. ⁹ ń cĩ́ swɛ̃́ tɛ̃́ nɛ̃̌ mɔ́ bə mə̌ sə mə yi mə lyɛ̃ gàà mɔ́ yé, mùnì ga mə̀ k’ê bə̀ kwɛ̃̀ mə bə̀ mə sú cɛ y yé. ¹⁰ Ń nə́ ń ce nɛ̃̌ mɔ́ kwè mə̀ nə̀bùlsí y sɔ́má y mə̀ n’ê dùr pyàr rɛ́ bwə̌l wə. ¹¹ gɔ vwàmá nɛ́ n’ê nywɛ̀ ; gɔ bə̀nesé n’ê nywɛ̀ sə̀ m’ê zhìlì sə̀ nə̀nyɛ̀lɛ̀ nɛ. ¹² kúmsí n’ê twí sə̀ jòm bù-cǔr rí yó, sə̀ m’ê kúrh cèmé né vɔr rɛ́ cəcəl wə. ¹³ Yi zɛ̃̀ rə̀ jě dɛ̃̌dɛ̃̌ rə̀ gə́ ŋwɛ́nɛ́ mə̀gã̌ mɔ́, rə̀ n’ê ce dwà y nywɛ̀ pyàr rɛ́ yó ; cɛ y zɛ̃̀ e sú ǹdə́ ǹ jɛ̃̀ tumə né. ¹⁴ Rə̀ zɛ̃̀ rə ce gɔ w n’ô lyĩ vwàmá nɛ́ n’ê dɔ̀mà, n ce cèmé né lyĩ numbyíní m’e wɛ̀rhɛ́ kɔn dɛ̀bɛ́ è zhe rə̀ tum mú, èta, kùjú m’a yə̀ nɛ́ cɛ y yó e jí, ¹⁵ e nə də̀vɛ̃́ y è n’ê pɛ wu-nyɔ̃̀ numbyíní ni mú, e ce è yé y n’ê jə́jɛ̀mɛ́ du nwə̃̌ mó, e nə búrú w ò n’ô pɛ jàn numbyíní ni è wẽ́ mó. ¹⁶ Bə-zhɔ-zhe cèmé m’a jí nə sú, Ləbã cèmé né ń zhele mó. ¹⁷ Wɔ́ nə̀myɛ́ yó kúmsí n’ê cĩ́ sə̀ càlá nɛ́ nɛ́ ; wɔ́ gàà mɔ́ nə̀myɔ̃̀ w jàà y ŋwɛ́nɛ́ səpərɛ́ɛ́sɛ́bá yó. ¹⁸ Pyàr rɛ́ rə̀ wɔ dɛ̃̌dɛ̃̌ mɔ́ wɔ́ gɔ-bə̀cùúlí kɔna, nə̀-myìn-pyàr rɛ́ zɛ̃̀ rə̀ wɔ́ ywala shòò jàà. ¹⁹ Ń wɛ̀rhɛ́ cànà y mùnì yi gakó gə yú sə bə lwar ; yi rí yě dǒ yi rə̀ mə̌ sə rə zù. ²⁰ ǹ gə zɔ cə-byín rí rə̀ túwə́, cɛ y jǐrh cəcɛ̃ : rə̀myɛ́ yó né, vwàmá nɛ́ swààlɛ́ wẽ́ mó zɛ̃̀ nə̀ wɔ dɛ̃̌ nə̀ n’ê zhə̀lə̀ ; ²¹ Bwaarɛ zɛ̃̀ rə̀ n’ê swər rə̀ m’ê pyà nàmá rə̀ la zal, rə̀ n’ê lwə̀l Yi ni bə̀ rə̀ pɛ rɛ rə̀ nyí-kùjú. ²² Cɛ y gə tú è n’ê lɛ́, rə k’a kwɛ̃̀ rə bə̀ rə̀ pyě rə̀ pwə́lə́ wə. ²³ Rə̀myɛ́ yi ní numbyíní zɛ̃̀ e du è la è tum jàà wa, e twĩ̀ kɔn m’e yí də̀dɛ̀nɛ́. ²⁴ Ǎ Bə-zhɔ-zhe, ǹ tũ̀-fwààlɛ́ já dɛ̃́dɛ̃́ ! Ǹ wɛ̀rhɛ́ nə̀ gakó ǹdə́ surhə. Cɛ y sú ǹdə́ ǹ cɛ̀nɛ̀ rɛ́. ²⁵ Nyǐ nə̀-fɔ̀lɔ̀ w gə́ já dɛ̃́dɛ̃́ nɛ́, e jà ò wà dɛ̃́dɛ̃́ nɛ́ : wɔ́ gàà mɔ́ bǔ-wẽ̀ nánfwààlɛ́ ǹdə́ námpɔ́lsɛ́ rə̀ wàr rə̀ la gál mɔ́ gakó ŋwɛ́nɛ́ rə̀ n’ê zhə̀lə̀ ; ²⁶ Wɔ́ gàà mɔ́ bǔ-bwələ né ŋwɛ́nɛ́ nə̀ n’ê dùrə̀, wɔ́ gàà mɔ́ bǔ-ku w nánjìjùrhú w Yi wɛ̀rhɛ́ mɔ́ ŋwɛ́nɛ́ ò n’ô fùù nɛ̃̌ mɔ́ mə̀ n’ê dom ǹdə́ jàn rɛ́ mɔ́ ŋwɛ́nɛ́. ²⁷ Wɔ́ ǹmyɛ́ yó w vwàmá nɛ́ nə̀myɛ́ gakó n’ê nyǐ ní, mùnì ga nɔrh gə tú mə̀ zhe re yi, sə́ pə nɛ kùjú nə jí. ²⁸ Ǹ nə́ ǹ pɛ nɛ kùjú, nə̀ zwẽ nə jí ; ǹ gə púr ǹ jɛ̃̀, nə̀ n’ê wẽ̀ nə̀ jí nə̀ swí. ²⁹ Sə ǹ gə shèè ǹ jɛ̃̀ yá, nə̀ n’ê kəkə ; ǹ gə zwẽ nə̀ shíshə̀ yə́ : nə cì, nə k’a vò nə̀ shó w wə. ³⁰ Sə ǹ gə ce ǹ shə́shìrhə́ né k’a bà : bə̀ yə̀ nɛ́, ń zɛ̃̀ ń kwɛrhɛ cɛ y è yé k’a zhǐ nándwə̃̀. ³¹ Bə̀ Bə-zhɔ-zhe còrhó yál nɛ́ byinə nə̀ bə zhɔ̌ zhe yilə ! Bə̀ ń wɛ̀rhɛ́ wu-nyɔ̃̀ ń tumə né yilə ! ³² Ǹ gə nyǐ cɛ yá, e zhízhǐ ; ń gə dwə̀rh pyàr rɛ́ nɛ, rə jǐrh nyɛ̀rh. ³³ À myə̌l gə j’â ŋwɛ́nɛ́ nɛ́, à m’a j’â n’â nún Bə-zhɔ-zhe gaga, à gə j’â ŋwɛ́nɛ́ nɛ́, à m’a j’â n’â zǔl à Yi rí gaga. ³⁴ Sə à zɔ̀mà nɛ́ sú ń yírh ! à n’â yǎl a fùù Bə-zhɔ-zhe wẽ́. ³⁵ Bə̀ yə̀-bəlwàálɛ́ cìnə́ bé jé tɛ̃́ cɛ y yó, sə lyì-bəlwǎlsɛ́ bə̀ nɛ́ yàl kə́dò yé ! À wu, ce Bə-zhɔ-zhe nə̀báná ! Zǔl Bə-zhɔ-zhe mó.