¹ Dəvyidi nwə̃́ə̃́. À wu w n’ô zǔl Bə-zhɔ-zhe ! Bə̀ kɔn dɛ̀bɛ́ gakó rə̀ ŋwɛ́nɛ́ à wẽ́ mó zǔl ń yil ré ! ² À wu w n’ô zǔl Bə-zhɔ-zhe, à wu, ǹ bə̀k’a swě ń cɛ̀nɛ̀ rɛ́ ń wɛ̀rhɛ́ mɔ́ rə̀dù gakó yò yé ! ³ Wɔ́ ńmyɛ̌ ń nə́ pɛ mɔ́ ǹ dwə́ə́ré gakó sǔbri, ń nə́ ń wárh mɔ́ ǹ címsí gakó wẽ́ ; ⁴ ńmyɛ̌ ń nə́ ń vùr mó gɔ́rɔ́ w wẽ́, ń nə́ ń zə wu-bɔ̀nɔ̀ ǹdə́ nɔ̀nɔ̀-dǔr ga ń pwí ǹ yó ǹdə pyɛ̀lɛ̀ yə́-pú ta. ⁵ Ǹmyɛ̌ ń nə́ ń ce ǹ jí ǹ swí ǹ cɔɔrɛ wẽ́, n ce ń ká ń zwèrhè mó nándùl ǹdə ényə̀lá ta. ⁶ Bə-zhɔ-zhe nə́ ń twĩ̀ cánga, ń nə́ ń zwẽ lyì bí byɛ̀bɛ́ bə̀ dwã bɛ́ n’ê nwɛ̀nɛ̀ bɛ mɔ́ nyí ni. ⁷ Ń byili ń sɔ́msɛ́ Muyiisi ni, n zɛ̃̀ n byili ń tũ̀-fwààlɛ́ Esərayɛl byǎ bɛ́ nɛ. ⁸ Bə-zhɔ-zhe wɔ́ nɔ̀nɔ̀-dǔr Yi, ń nə́ ń cili zúzúnú cìnə́ sono, ń tá ń kwè lyim làlà yé, ń sú ǹdə́ wu-bɔ̀nɔ̀ dúdú. ⁹ Ń tá ń cìì yò kẽkẽ ń yẽ̌ w ò j’â gaga yé, ń tá ń cə̀r ń lyim n cĩ́ ń wẽ́ kɔn dɛnɛ gaga yé ; ¹⁰ Ń tá ń wɛ̀rhɛ́ nə́ba ǹdə nə́ dwə́ə́ré ta, ń tá ń ń pɛ nə́ba còrhò-tum ǹdə ń gə́ y’ǎ mə̌ sə n wɛ̀rhɛ́ nə́ba nɛ́ nə́ lwɛlɛ rɛ́ yil né yé. ¹¹ Ǹdə dɛ̃̌ yə né gə́ j’â ŋwɛ́nɛ́ dɛ̃̌ cɛ y yó w né ta gaga mɔ́, wɔ́ èta Yi nɔ̀nɔ̀-dǔr mó myɛ wɔ́ nɛ́ nánfɔ̀lɔ̀ lyì bí byɛ̀bɛ́ bə̀ n’ê nyàm mɔ mɔ́ yilə ; ¹² ǹdə yi-púrhí gə́ nyɛ dɛ̃́dɛ̃́ ǹdə́ yi-zùr ní mú ta, wɔ́ èta myɛ nə̀ dwə́ə́ré nyɛ ǹdə́ Bə-zhɔ-zhe né. ¹³ Ǹdə da gə́ nə́ ń dùr ń byǎ nɔ̀nɔ̀ nɛ́, wɔ́ èta Bə-zhɔ-zhe nə́ ń dùr lyì bí byɛ̀bɛ́ n’ê nyàm mɔ mɔ́ myɛ nɔ̀nɔ̀ nɛ́. ¹⁴ Bə̀ ń yě kɔn tɛ̀bɛ́ bə̀ b’e wɛ̀rhɛ́ nə́ba mɔ́ párá, ń nə́ ń lyǐrh bə̀ nə́ wɔ́ shó. ¹⁵ Numbyíní y èta mɔ́ ! è dwã nɛ́ nyɛ̌ ǹdə gɔ ta, è n’ê ce pùnə́ ǹdə gɔ w ò n’ô lyĩ cɛsɛ́ wẽ́ mó ta. ¹⁶ zho gə co ò tó pùnə́ né yó, nə̀ k’ê tɛ̀nɛ́ yé, nə̀ gə́ y’à ŋwɛ́nɛ́ mə̀gã̌ jàà k’ê yə̀l nə̀ pár kə́dò yé. ¹⁷ Sə Bə-zhɔ-zhe wu-bɔ̀nɔ̀ w j’â ŋwɛ́nɛ́ twéé twéé lyì bí byɛ̀bɛ́ bə̀ n’ê nyàm mɔ mɔ́ yilə, ń nɔ̀nɔ̀-dǔr mó zɛ̃̀ mə̀ ŋwɛ́nɛ́ bə̀ byǎ bɛ́ byǎ bɛ́ yilə, ¹⁸ byɛ̀bɛ́ bə̀ zhe ń dɔbrɛ́ bə̀ t’â yẽ̌ re, bə̀ n’ê lyǐrh ń nyə́ né yò, bə̀ n’ê pyìrh ne mó. ¹⁹ Bə-zhɔ-zhe cĩ́ ń pyɛ̀lɛ̀ rɛ́ də̀gwã́ y dɛ̃̌ yə né wə, ń wɔ́ pyɔ̌ ń cǐ kɔn gakó. ²⁰ Ámyɛ̌ byɛ̀bɛ́ á wɔ́ ń màlɛ́kabá mɔ́, zǔl-nə Bə-zhɔ-zhe, ámyɛ̌ á zhe ŋwɔ̀nɔ́ ǹdə́ jàn rɛ́, á n’á shɛ̀nɛ́ á zwẽ ń nyí ni, á twĩ̀ ǹdə ń nyə́ né gə́ n’ê byili ní mú ! ²¹ Ámyɛ̌ byɛ̀bɛ́ á wɔ́ ń jàn cìnə́ bé mó, á wɔ́ ń tùntùnə bé á n’á wɛ̀rhɛ́ ń pùbùlə̀ né mó, zǔl-nə mo ! ²² Ámyɛ̌ byɛ̀bɛ́ ń jɛ̃̀ y wɛ̀rhɛ́ mɔ́ gakó, zǔl-nə mó, jàà y kɛ̀bɛ́ gakó ń cǐ ń nə́ ń jí pyɛ̀lɛ̀ è wẽ́ mó mó wə ! À wu w n’ô zǔl Bə-zhɔ-zhe !