¹ Zúzúnú cə́bal mə̀dù yi-co, ǹdə́ ń tú ń nə́ ń cĩ́ ń yò w Bə-zhɔ-zhe yé né. ² Ń yà ń zhe : Bə-zhɔ-zhe, cili à yi-co wə́, sə́ yẽ̌ à búbwéé vò e yí ǹ sono ! ³ Ǹ bə̀ká shèè ne ǹ cìn à zúzúnú dɛ̃ yé ! À gə n’â búbwéé à ce mó, sə́ pyèrhè ǹ zhɛ̃̌ ń cili ! Ce jàn nɛ́ làlà ń zwẽ à yi-co wə́ ! ⁴ Bə̀ nyǐ à dwã nɛ́ n’ê lyɛ̃ ǹdə nyɛ̀rh ta, à kúr rí n’ê jí myǐn rə̀ la ǹdə myǐn nánfɔ̀lɔ̀ mə̀ zhe ta. ⁵ Bə̀ mà à wu w wẽ́, ò n’ô kùl ǹdə gɔ ta ; à gaga mɔ́ swě à kùjú w jú mú yò. ⁶ À gə́ n’â wɔ́wɔ́lɛ́ à wẽ́ dɛ̃́dɛ̃́ mɔ́ ce, a j’a kwɛ̀rɛ̀ à kúr rí dɛ̃ à yala nàmá bɛ́ nɛ. ⁷ A zɛ̃̀ nyɛ̌ ǹdə gɔ-elũ kúm-byṹ ta, à nyɛ̌ myɛ ǹdə wɔ́ jì-bwə̀r ekòlò ta. ⁸ Jan k’ê t’â zal nɛ yé, a zɛ̃̀ a jǐrh ǹdə wɔ́ kúmí è jě lyarh w è dúdú ta. ⁹ Dɛ̃ gakó à zwə̀ bé n’ê tùrh ne, à zwə̀ bé n’ê bwəl, bwélé námməlwɛ̀lɛ́ ǹdə́ lyim bə̀ pɛ nɛ. ¹⁰ Ce à k’â t’â dɔ̀m búrú yé, wɔ́ shó à n’â mwì, à yə́-nàná n’ê gùlí à nɛ̃̌ mɔ́ mɔ̀dɔ́ à n’â nywɛ̃̀ mɔ́ nɛ à nywɛ̃̀, ¹¹ Ǹ lyim rí rə̀ zɛ̃̀ ǹ nə́ ǹ pupuri tɛ̃́ mɔ́ ce, ǹ kwè ne ń dol kwã nɛ́ gaga. ¹² À dwã nɛ́ nyɛ̌ ǹdə wɔ́ ywə́l mə̀ n’ê dùr mə̀ lyɛ̃ làlà ta, a zɛ̃̀ à n’â kùl ǹdə wɔ́ gɔ ta. ¹³ Sə ǹmyɛ́, Bə-zhɔ-zhe ! ǹ nə́ ǹ jí pyɛ̀lɛ̀ byinə nə̀ bə zhɔ̌ yé, sə ǹ yil ré j’â ŋwɛ́nɛ́ byinə byinə yilə. ¹⁴ Sə dɛ̃ rə̀dù ǹ m’ǎ zɛ̃̀ ń dùr Səyɔ̃ nɔ̀nɔ̀ ; sə nyǐ yi rí tɛ̀bɛ́ ǹ yà ǹ gu ǹ wẽ́ ń cĩ́ ǹ la Səyɔ̃ nɔ̀nɔ̀ dǔr mú yúwə́ ; ¹⁵ Bə̀ nyǐ ǹ tùntùnnə bé só nə́kulə né, bə̀ gwẽ̌ só shó w dɛ̃́dɛ̃́. ¹⁶ Rə̀myɛ́ ce, tənèsé b’a nyɛ̃̀ Bə-zhɔ-zhe yil ré, pyǎ bɛ́ cɛ yó mó gakó b’a zǔl mó. ¹⁷ Zhə̀nà, Bə-zhɔ-zhe mà n ká n lù Səyɔ̃, mùnì ga n byili ń cìn ń zùwə́ y wẽ́ gàà mɔ́. ¹⁸ Bə-zhɔ-zhe nə́ ń cili zúzúnú cə́bal yi-co w cɛ̀nɛ̀, ń tá ń fǔr w yé. ¹⁹ Sə bə̀ kɛ̃ rə̀myɛ́ mɔ́ sɛ́bɛ́ yó byǎ bɛ́ byɛ̀bɛ́ bə̀ bàn mɔ́ yilə, Sə dwí rí tɛ̀bɛ́ bə̀ la lúl mó zǔl Bə-zhɔ-zhe ! ²⁰ Bə̀ Bə-zhɔ-zhe zhǐ ń sə̀pwà jì y dɛ̃̌dɛ̃̌ mó yó ń nə́ ń nyǐ ; Ń zhǐ dɛ̃̌dɛ̃̌ Arəzana w ń nə́ ń nyǐ cɛ y yó, ²¹ ń nə́ ń cili byɛ̀bɛ́ bə̀ ŋwɛ́nɛ́ yómré jè né mó wɔ́wɔ́lɔ́ mɔ́, ń la n vwǎrh byɛ̀bɛ́ bə̀ la ce bə jé tɛ̃́ mɔ́, ²² mùnì ga bə bwə̀l Bə-zhɔ-zhe yil ré bə byili Səyɔ̃ yó, ²³ sə bə zǔl mo Zhərəzalɛm nɛ́, ǹdə́ dwə́ né gakó gə tú nə̀ gùlí dwã ǹdə́ pyǎ bɛ́ gakó bə̀ la Bə-zhɔ-zhe còrhó mó yi ní mú. ²⁴ Ń kɔ́ à jàn rɛ́ n bɔbɔlɛ à sɔ̀má y yó, n bɔ̀ á dwã nɛ́. ²⁵ Wɔ́ rə̀myɛ́ è ce, a zɛ̃̀ a búbwéé a wɔ̀ : À Yi, ǹ bə̀ká vùr ne à dwã nɛ́ cəcəl w yé, ǹmyɛ́ mɔ̀bɔ́ ǹ j’â ŋwɛ́nɛ́ nɛ́ byinə nə̀ bə zhɔ̌ zhe mó ! ²⁶ Wɔ́ ǹmyɛ́ ǹ ju kùr shãã shãã ga ń wɛ̀rhɛ́ lũ wə́, dɛ̃̌ yə né wɔ́ ǹmyɛ́ jɛ̃̀ è wɛ̀rhɛ́ nɛ. ²⁷ Rəmyɛ́ gakó m’a cɔ̀, sə ǹmyɛ́ mà ń já ǹ ŋwɛ́nɛ́ twéé twéé ; rə̀ m’a dwə́ə́le ǹdə́ gàmmə̀zwǐ ta ; ǹ mà ń lyə́r re ǹdə gàmmə̀zwǐ ta, rə zwẽ nyí rə lyə́r. ²⁸ Sə ǹmyɛ́, ǹ já ǹ wɔ́ ǹmyɛ́ cìcì gaga, ǹ byinə né t’â la zhɔ̌ gaga yé.