¹ Dəvyidi nwə̃́ə̃́. À m’a nún wu-bɔ̀nɔ̀ ǹdə́ cángá nwə̃́ə̃́ ; Bə-zhɔ-zhe, wɔ́ ǹmyɛ́ nɛ à n’â nún à pɛ. ² À m’a dɛ̃̀ à cìn ǹdə́ zhə̀n sɔ́má yá. Bə-zhɔ-zhe, wɔ́ dǒ ǹ bàn à sono ? Bə̀ à n’â yǎl a vò ǹdə́ wu-põ̀ à wu w wẽ́, à sõ kɛ̀lɛ́ wa. ³ À t’â la kɔn dɛ̀bɛ́ rə̀ wɔ́ lwɛlɛ nɛ yõ̌ rə̀ zhǐ à yé né à n’â nyǐ yé ; À m’â zhɛ̃̀ yə̀-bəlwàálɛ́ cìnə́ bé tùntwĩ̀ĩ̀ rí ; rə̀ t’â la nɛ dãɔ̃ gaga yé? ⁴ Wu kɔ̀bɔ́ ò wɔ́ lwɛlɛ wu m’a vò kwã nɛ́ gaga à nyí ni ; À t’â yǎl lyì-bəlwɛlɛ pár a lwar yé. ⁵ Lò mɔ̀bɔ́ ń nə́ ń shèè ń gàrmɔ ń dõ, à m’a ce rə̀-ná-cí gu ń nyí n jé tɛ̃́ ; Lò mɔ̀bɔ́ ń zhe cìn-byilu nyìynìrí, ń nə́ ń zhẽ̌ ń cìn dɛ̃̌ ń wẽ́ mó, àmyɛ́ ǹdə́ ńmyɛ̌ mɔ́ wàr dwã nɛ́ yé. ⁶ À yírhə́ m’a pyǎ tənà y wu-cángá cìnə́ bé yó, mùnì bə yə̀ à nyí ni ; Lò mɔ̀bɔ́ ń nə́ ń zhə̀l wu-põ̀ sɔ́má yó mó ń mà n yə̀ à tùntùnnə. ⁷ Lò mɔ̀bɔ́ ń zù yǔyǔ tumə né mó, ná-cí tá ń la à sõ kɛ̀lɛ́ w yál yé ; Lò mɔ̀bɔ́ ń nə́ ń gòm kɔma mɔ́ tá ń la á yé né zǔ yé. ⁸ Cɛ gə lɔ́ nəkɔkɔlɛ́ gakó à m’a ce lyì-bəlwǎlsɛ́ jé tɛ̃́ tənà y wa, mùnì ga a ce lyì bí byɛ̀bɛ́ bə̀ n’ê twĩ̀ lwɛlɛ rɛ́ mɔ́ gakó jé tɛ̃́ lyɛ́lyɛ́, Bə-zhɔ-zhe cɔ w wa.