¹ Yakɛ byǐ Aguuri zɔ̀mà nɛ́: Cinu nyí rí. Bal mɔ́ ńmyɛ̌ mɔ́ zɔ̀mà nɛ́ Yəcəə yilə, Yəcəə e súlí Ukaalɛ yilə. ² Zhə̀n zhə̀nà, à j'â wɔ́ numbyínsí púlə́púlə́ kòkò wə́, surhə né nyɛ̀bɛ́ numbyíní mə̌ sə e zə mɔ́ tɛ̀nɛ́ àmyɛ́ sõ yé. ³ À yə̀ lárma cèrhè yé, sə à yě kɔna, Yi shò kwã mɔ́. ⁴ Mɔ̌ lò ń jìl n vò dɛ̃̌-yi rí wə, sə rə̀myɛ́ kwã, ń shí gàà n só n kwɛ̃̀ n bà? Mɔ̌ lò ń já ń gwẽ̌ pwà zho w ń jɛ̀rh w gaga? Mɔ̌ lò ń nə pyípyílí nɛ̃̌ mɔ́ ń kàmə̀zù-fwɛ̀lɛ̀ y wẽ́? Mɔ̌ lò ń cĩ́ cɛ y swã́ nɛ́ púlə́púlə́ tɛ̃́ nə̀ jààsɛ́ wẽ́? Tɛ̌ rə̀ wɔ́ ń yil ré? Tɛ̌ rə̀ m'a yə̀ ń byǐ mú yil ré? Ǹ zhə̀n ga gə ǹ yě re! ⁵ 5 Kɔn rɛ́ tɛ̀bɛ́ gakó Yi n'ê wə̀l mó j'â wɔ́ zhə̀nà. Rə̀ wɔ́ nə̀kò lyì bí byɛ̀bɛ́ rə̀ wɔ́ shòò jàà bə̀ yil mú yilə. ⁶ Bə̀k'á súlí kɔn rə̀ zɔ̀mà nɛ́ nɛ yé: rə̀ m'a ji mú búlə́ sə ǹ m'ǎ lwar bə̀ ǹ gòm kɔma. ⁷ À lwə̀l mó wẽ̀ rə̀lyè, bə̀k'á vòm re ne ǹd'â gwẽ̌ yə̀ cì yé: ⁸ Pə́ myìnù tũ̀twĩ̀ĩ̀ ǹdə́ kɔma à nyí ní ń ce kwã nɛ́, bə̀k'á ji ni nə̀mɔ̀ɔ̀rɛ, bə̀k'á pɛ̃ nə̀cɛ̀ndɛ myɛ yé, ǹmyɛ́ wúrí ń pɛ̃ à cəl kùjú w dúdú, ⁹ bə̀ à gə n'â jí kɔn lyɛ̃ cɛ nɛ, à wɔ̌ à m'a wɔ̀ b'à yə̀l ǹ pár yé, à m'â wə̀lə̀: «Wɔ́ mɔ̌ lò ń wɔ́ Cinu mú?» Ráá zúzúnú yi ní, à wɔ̌ à ŋwɔ̀là, a j'a tó rə̀myɛ́ dɛnnɛ à n'â fuuli à Yi rí yil ré. ¹⁰ Bə̀k'á gàrmə tùntùnnə ń yó-cə́bal mɔ́ sõ yé, bə̀ ń wɔ̌ ń bwəl lwɛlɛ ń pɛ mɔ́, sə rə̀ yò w m'a yə̀ ǹ yó wə. ¹¹ Lyì bə̀ nyí rí j'â n'ê bwəl lwɛlɛ bə̀ pɛ bə̀ dabá nɛ, bə̀ súlí bə̀ t'â bwəl cɛ̀nɛ̀ bə̀ pɛ bə̀ nábá nɛ yé! ¹² Lyì, bə̀ nyí rí j'â wɔ́ wáárhgáá bə̀ cìcì mú yírh wə, e jà bə̀ j'â yə̀ bə̀ jìmdí vùr yé! ¹³ Lyì, bə̀ nyí rí cìn-dɛ̃̌-zhõ̌ mó j'a lyɛ̃ cɛ nɛ dɛ̃́dɛ̃́, bə̀ nyìnyìí rí j'â wɔ́ cìn-byilu nyìnyìí! ¹⁴ Lyì, bə̀ yə́lə́ né wɔ́ búlə́ shìmì, bə̀ nyə̀-pěsé súlí sə̀ wɔ́ shǐsi, bə̀ j'â n'ê gwi tənà y nə̀mwà bɛ́ ǹdə́ gɔ sõ lyì bí byɛ̀bɛ́ bə̀ wɔ́ nə̀mwà du bə̀ dwã bɛ́ mɔ́! ¹⁵ Shíshili zhe bə̀kwá bə̀lyè bə̀ yíl Pə ǹdə́ Pa. Rə̀ wɔ́ wẽ̀ rə̀tɔ̀ rə̀ j'â t'â swí yé, rə̀ wɔ́ wẽ̀ rə̀na rə̀ j'â t'â wə̀l bə̀: «Kɔn mǎ!» yé: ¹⁶ Cúlú wə́, ǹdə́ kə-eju wu wə́, ǹdə́ cɛ kɛ̀bɛ́ è yə̀ nɛ̃̌ swí mú e súlí ǹdə́ myǐn mú mə̀ j'â t'â wə̀l bə̀ «Kɔn mǎ!» gaga mɔ́. ¹⁷ Yírh ré tɛ̀bɛ́ rə̀ n'ê mɔ̀n da mɔ́ e jà rə̀ j'â n'ê cẽ ná nyí ni shɔ̀nɔ́ mɔ́, wɔ́ nə̀-gɔ̀lɔ̀ w kààrhɛ́ rə̀ m'a lə́ rɛ zhúr rí zɛ̃̀ rə jí ri. ¹⁸ Nyǐ wẽ̀ rə̀tɔ̀ rə̀ j'â zum dɛ̃́dɛ̃́ àmyɛ́ yilə, rə̀ wɔ́ wẽ̀ rə̀na à j'â bə rə̀ kùr nyɛ̌ yé: ¹⁹ zhú w sɔ́má y dɛ̃̌-yi rí w mú, ǹdə́ dɔm mɔ́ sɔ́má y nə́kulu w yó mó, ǹdə́ bǔ-bwəl ré sɔ́má y nə̀-fɔ̀lɔ̀ w cəcəl w mó, e súlí bal mɔ́ sɔ́má y è la kɛ̃-byì-bóm mó sõ mó. ²⁰ Nyǐ kə-nə̀fòló w tũ̀twĩ̀ĩ̀ rí gə́ wɔ́ nɛ́ mɔ́: ò y'a jí, o pɔ́pɔ̌ ò nyí o zɛ̃̀ o wɔ̀: «À yə̀ kɔn də́-byǐ ga wɛ̀rhɛ́ rə̀ wɔ́ lwɛlɛ yé!» ²¹ Nyǐ wẽ̀ rə̀tɔ̀ rə̀ n'ê ce tənà kəkə mó, rə̀ wɔ́ wẽ̀ rə̀na bə̀ j'â wàr bə̀ la pyɔ́nɔ́ bə shɛ̀nɛ́ rə̀ yò yé: ²² yə-bal mɔ́ mɔ̀bɔ́ ń jǐrh pyɔ̌ mɔ́ ǹdə́ nyə̀nyà kɛ̀bɛ́ è n'ê jí kɔn lyɛ̃ cɛ nɛ mɔ́, ²³ ǹdə́ kɛ̃ mɔ̀bɔ́ ń wɔ́ búlə́ cə́kɛ̃ mɔ́ ń nə́ ń jí byal mɔ́, e súlí ǹdə́ tùntùnnə mɔ̀bɔ́ ń wɔ́ kɛ̃ ń zwẽ ń yó-cə́kɛ̃ mɔ́ jàà y mɔ́. ²⁴ Shirh námpɔ́lsɛ dɛ̃́dɛ̃́ sə̀na wɔ cɛ y yó, e jà sə̀ j'a lə́ dɛ̃́dɛ̃́ du sə̀ dwã bɛ́: ²⁵ nə̀myə̀lsé, sə̀ wɔ́ dwí tɛ̀bɛ́ rə̀ bə jàn zhe yé, e jà, fɔ̀ yi ní, sə̀ yě sə̀ kùjú w pyǎ sə cĩ́ dɛ̃̌. ²⁶ Ǹdə́ yala nɛ́, nə̀ wɔ́ dwí tɛ̀bɛ́ rə̀ bə ŋwɔ̀nɔ́ zhe yé, e jà nə̀ yě nə̀ pwə́lə́ né cṹ pyàr rɛ́ wẽ́. ²⁷ Ǹdə́ səsɔ̀mɛ̀ nɛ́ nə̀ bə pyɔ̌ zhe yé, e jà nə̀ gakó yě dwã tó nə́ shə́r. ²⁸ Ǹdə́ dádályízhə̀lɛ́ y bə̀ wɔ̌ bə̀ zal ǹdə́ jɛ̃̀ mɔ́, e jà è ŋwɛ́nɛ́ pyǎ bɛ́ kǎlsɛ́ wẽ́! ²⁹ Rə̀ wɔ́ wẽ̀ rə̀tɔ̀ rə̀ gə n'ê zhə̀l ǹ já ǹ só, rə̀ wɔ́ wẽ̀ rə̀na rə̀ zhə̀zhèèlé j'â càn: ³⁰ bɔrɔ w gɔ-wẽ̀ ré gakó kàndɔ wá, ò j'â t'â twə̀r kaka yé né mó. ³¹ Ǹdə́ gɔ-bə̀na y è cã̌ y jɛ̀ mɔ́ ǹdə́ bə̀cìlə́ yə́, e súlí ǹdə́ pyɔ̌ mɔ́ ń wɔ ń shə̀dɛ́ɛ́sɛ́ yé né mó. ³² Ǹ gə yà ǹ twĩ̀ nyə̀nyààrɛ́ ǹ mə́ ǹ pyà ǹ cìn dɛ̃̌ zhõ̌, ń zɛ̃̀ ń tɛ́rɛ́ rə̀myɛ́ kwã, j'á cĩ́ ǹ jɛ̃̀ y ǹ nyí ni: ³³ Nwə̃̌ y wɔ́ yə-nwə̃̌ y wẽ́ bə̀ n'ê vùr y né, e mà myə̌l ré n'ê ce jal dwi, e kwè lyim nánfɔ̀lɔ̀ n'ê twí ǹdə́ búlə́!