¹ Lò mɔ̀bɔ́ bə̀ ju búlə́, gə wɛ̀rhɛ́ yó-kùlù yò m'a jàr jàr o zhìlì, ò t'â la cə́m zal yé! ² Wu-cángá cìnə́ bé gə n'ê jí pyɛ̀lɛ̀ rɛ́ yi ní, dwí rí j'â n'ê fùù. Sə è gə wɔ́ wu-bárhɛ́ cə́bal ń nə́ ń jí pyɛ̀lɛ̀, dwí rí j'â n'ê wɔ́wɛ́lɛ́. ³ Lò mɔ̀bɔ́ ń só lárma mɔ́, ń da mɔ́ já ń nə́ ń fùù. Sə lò mɔ̀bɔ́ ń nə́ ń zhə̀l ǹdə́ kə-nə̀fwə̀ə́lé nə́ ń ywàl ń jɛ̃̀-kɔn rɛ́. ⁴ Pyɔ̌ mɔ̀bɔ́ ń nə́ ń twĩ̀ tɛ̀bɛ́ rə̀ mə̌ mɔ́ nə́ ń ce tənà y cĩ́ kùr e jòm ǹdə́ yə̀-zùlə́, sə mɔ̀bɔ́ ń já ń só myə̌l-kwǎndɛ zõ dɛ̃́dɛ̃́ mɔ́ nə́ ń cɔ̀ ya. ⁵ Lò mɔ̀bɔ́ ń nə́ ń swèlè ń dõ, já ń nə́ ń pàm pɔ̀mɔ̀ tɛ̃́ ń nə̀rh kùr wə. ⁶ Pɔ̀mɔ̀ wɔ wu-bárhɛ́ cə́bal mɔ́ yə̀-bəlɔ̀lɔ́ w wẽ́, sə wu-cángá cə́bal já ń nə́ ń fùù ǹdə́ wu-nyɔ̃̀ nánfɔ̀lɔ̀. ⁷ Wu-cángá cə́bal yě nə̀mwà bɛ́ yò w párá, wu-bárhɛ́ cə́bal yə̀ lɛ́ sə n mə n lwar ò pár yé. ⁸ Yó-kùlù cìnə́ bé ce tənà y n'ê gùlí dwã nɛ, sə lárma cìnə́ bé n'ê jì lyim è wẽ́. ⁹ Lárma cə́bal nə já ń nə́ ń bùr ǹdə́ nyə̀nyà? Ń kwè lyim ráá ń nə́ ń mɔ̀n myɛ, ń já ń tá ń la bəsàzùlí nɔ yé! ¹⁰ Lyì-gurnə bé n'ê súl wu-põ̀ cə́bal, wu-cángá cìnə́ zɛ̃̀ bə̀ j'â n'ê pyà mɔ. ¹¹ Kòkò j'â n'ô tó ò shilə né kùrə̀, sə wu-cángá cə́bal nə́ ń pyɛ́nɛ́ nɛ, ń nə́ ń ce nə̀ twi. ¹² Yó-cə́bal gə zɛ̃̀ ń nə́ ń cili zɔ̀mɛ̀ rɛ́ tɛ̀bɛ́ rə̀ wɔ́ kɔma, ń kwã-lyì bí púlə́púlə́ n'ê jǐrh wu-bárhɛ́ cìnə́. ¹³ Nə̀mɔ̀ ǹdə́ lò mó mɔ̀bɔ́ ń nə́ ń ŋwɔ̀l mɔ́ ga wɔ́ kɔn rə̀dù, b'è wɔ́ Cinu ń nə́ ń ce bə̀ bə̀lyè y ga yírhə́ nə nɛ́. ¹⁴ Pyɔ̌ mɔ̀bɔ́ ń nə́ ń bùr nə̀mwà bɛ́ bùrsi ǹdə́ wu-põ̀ mó, já ń nə ń pyɛ̀lɛ̀ rɛ́ gə́ cĩ́ kùr twéé twéé yil mú. ¹⁵ Də̀-dɔ̀lɔ̀ w ǹdə́ cúcú mú n'ê pɛ lárma mɔ́, sə bə̀sɔ́bwɛ̀lɛ́ kɛ̀bɛ́ è ŋwɛ́nɛ́ è cìn yil mú j'â n'ê ce ná mɔ́ cìzhìlə̀. ¹⁶ Wu-bárhɛ́ cìnə́ bé gə n'ê jí pyɛ̀lɛ̀ rɛ́ yi ní, yə̀-bəlwàálɛ́ j'â n'ê pùlə̀, sə wu-cángá cìnə́ bé m'a nə bə̀ tɛ̃́-twirí yə́. ¹⁷ Pə còrhò-tum ǹ byǐ mú ni, ǹ m'ǎ nə yə̀-zùlə̀, ń mà n ce ǹ wu yə̀ nyàn dɛ̃́dɛ̃́. ¹⁸ Yi gə k'ê t'â ce bə̀ nɛ kɔn yi ní, dwí rí j'â k'ê bə cìn-ŋwɔ̀nɔ́ zhe yé. Sə lò mɔ̀bɔ́ ń nə́ ń zwẽ Nyə́ né mó wɔ́ wu-nyɔ̃̀ cə́bal! ¹⁹ Bə̀ t'â zə zɔ̀mà bə̀ m'ê zwə́r tùntùnnə yé, bə̀ ń mà n nyɛ̀ɛ̀ nə̀ kùrə̀, e jà ń tá ń la nyí ni shɔ̀nɔ́ yé. ²⁰ Ǹ gə já ǹ nə lò ń lum ǹdə́ zɔ̀mà zɔ̌m mɔ́, e dɛ̃̀ kɔn kòkò sõ cɔ̃̀ lò ńmyɛ̌ ná-cí mú sõ. ²¹ Lò mɔ̀bɔ́ ń nə́ ń pɔn ń tùntùnnə mó ń bə̀sɔ́nɛ́ yi ní ga mɔ́ mà n báásɛ n ce n yə̀ nə̀wàcɛ̀n-nyɛl. ²² Lyim cə́kɛ̃ nə́ ń tɛ nəgúlsi búlə́ cə́bal j'á nə́ ń súlí yə̀-bəlwàálɛ tɛ̀bɛ́ ń nə́ ń wɛ̀rhɛ́ mɔ́ yó wə́. ²³ Numbyíní y cìn-byilu mú m'a ce y cìzhìlə̀, sə bə̀ m'a zhẽ̌ cìn-lwəl cə́bal yó dɛ̃̌. ²⁴ Lò mó mɔ̀bɔ́ ń nə́ ń tə̀l ǹdə́ ŋwɔ̀l-bal mɔ́ mɔ́ nə́ ń súl ń cìnə̀: ń nyɛ̌ bwəl námməlwɛ̀lɛ́ y bə̀ n'ê bwəl mó e jà ń tá ń jál ń kùr yé. ²⁵ Ywẽ ré n'ê pàm pɔ̀mɔ̀ tɛ̃́ numbyíní y yé né, sə lò mó mɔ̀bɔ́ ń zhe Cinu zhə̀n mɔ́ zhe yə̀-zùlə́. ²⁶ Lyì nánzhəzhɔ̌ n'ê pyà sə pyɔ̌ mɔ́ nyǐ bi ǹdə́ wu-bɔ̀nɔ̀, sə wɔ́ Cinu dúdú ń wɔ̌ ń mà n pə lò gakó ne kɔn rɛ́ tɛ̀bɛ́ rə̀ mə̌ ǹdə́ mɔ mɔ́. ²⁷ Lyì-bəlwɛ̀lɛ́ y j'â wɔ́ pɔrha kɔn wu-cángá cìnə́ bé yilə, wu-cángá cə́bal mɔ́ myɛ já ń wɔ́ pɔrha kɔn wu-bárhɛ́ cìnə́ bé yilə.