¹ Wu-bárhɛ́ cə́bal já ń nə́ ń dùrə̀, e jà lòlò tá ń jì mu yé, sə wu-cángá cə́bal wu j'â jě ǹdə bɔrɔ byǐ ta. ² Tənà lyì gə zɛ̃̀ bə̀ n'ê cẽ nyí ni yi ní, pyǎ bɛ́ j'â wɔ́ nánzhəzhɔ̌, sə lò mə̀dù ń wɔ́ surhə cə́bal ń súlí ń yě wẽ̀ nánzhəzhɔ̌ nə̀jɛ̀lɛ̀ yilə, kɔn gakó n'ê yàl rə̀ jàà nɛ́. ³ Wu-bárhɛ́ cə́bal já ń nə́ ń dùrə̀, e jà lòlò tá ń jì mu yé, sə wu-cángá cə́bal wu j'â jě ǹdə bɔrɔ byǐ ta. ⁴ Tənà lyì gə zɛ̃̀ bə̀ n'ê cẽ nyí ni yi ní, pyǎ bɛ́ j'â wɔ́ nánzhəzhɔ̌, sə lò mə̀dù ń wɔ́ surhə cə́bal ń súlí ń yě wẽ̀ nánzhəzhɔ̌ nə̀jɛ̀lɛ̀ yilə, kɔn gakó n'ê yàl rə̀ jàà nɛ́. ⁵ Lyì-bəlwǎlsɛ́ j'â bə kaka kùr nyɛ̌ tɛ̀bɛ́ rə̀ mə̌ mɔ́ shò kwã nɛ́ yé, sə lyì bí byɛ̀bɛ́ bə̀ n'ê pyà Cinu mú sú kɔn gakó kùrə̀. ⁶ Nə̀mɔ̀ mɔ̀bɔ́ ń wɔ́ wu-põ̀ cə́bal cɔ̃̀ lò mɔ̀bɔ́ ń zhə̀zhèèlé wɔ́ námməjóló mó, má ń wɔ́ nə̀cɛ̀m-bal myɛ. ⁷ Lò mɔ̀bɔ́ ń nə́ ń tó Nyə́ né wɔ́ byǐ mɔ̀bɔ́ ń zhe surhə, sə lò mɔ̀bɔ́ ń nə́ ń zhə̀l ǹdə́ nə̀fwə̀ə́lé nə́ ń ce ń da cìzhìlə̀. ⁸ Lò mɔ̀bɔ́ ń nə́ ń tó twirí ǹdə́ ŋwɔ̀lɛ̀ nyɔ̀ɔ̀rhɛ́ dɛnnɛ ń ce ń nə̀cɛ̀ndɛ́ pù mú, já ń nə́ ń pyà rɛ ń cĩ́ dɛ̃̌ lò mó mɔ̀bɔ́ ń nə́ ń dùr nə̀mwà bɛ́ nɔ̀nɔ̀ mɔ́ yilə. ⁹ Lò mɔ̀bɔ́ ń nə́ ń ce ń zhɛ̃̌ kwã nɛ́ ń tá ń cili Nyə́ né, ń yi-co w cìcì mú j'â wɔ́ pɔrha kɔna. ¹⁰ Lò mɔ̀bɔ́ ń nə́ ń dwĩ̀ wu-cángá cìnə́ bé sɔ́m-bəlwɛ̀lɛ́ yó, mà n tu ń cìcì gɔ́rɔ́ w wẽ́. Sə wu-põ̀ cìnə́ bé m'a nə wu-nyɔ̃̀ o yə̀ bə̀ cəl-kɔna. ¹¹ Nə̀cɛ̀m-bal lɔ́ ń cìcì yírhə́ né wə, zúzúnú cə́bal mɔ̀bɔ́ ń zhe surhə mó mà n ce ń kùr ré pwẽ̀ ne. ¹² Wu-cángá cìnə́ bé gə n'ê jí bɛlɛ yi ní, è j'â wɔ́ còrhó nánfɔ̀lɔ̀. Wu-bárhɛ́ cìnə́ bé gə zɛ̃̀ dɛ̃̌ yi ní, lò gakó já ń nə́ ń shèè. ¹³ Lò mɔ̀bɔ́ ń nə́ ń shèè ń dwə́ə́ré kaka t'â la nyí zõ yé, sə bə̀ m'a dùr lò mɔ̀bɔ́ ń nə́ ń zwẽ nyí bə̀ ń dó mó n zɛ̃̀ n súlí ń nə́ ń zhɛ̃̀ ń dwə́ə́ré mó nɔ̀nɔ̀. ¹⁴ Wu-nyɔ̃̀ cə́bal wɔ́ lò mɔ̀bɔ́ ń já ń nə́ ń dɛ̃̀ ń cìn twéé gakó mó, sə lwɛlɛ m'a yí wu-kùlù cə́bal. ¹⁵ Bɔrɔ kɔ̀bɔ́ ò n'ô swər mó ráá cílə́-kùlú kɔ̀bɔ́ ò j'a zɛ̃̀ ò la ò kɔn rɛ́ jǔ mú, wɔ́ èta wu-bárhɛ́ cə́bal mɔ̀bɔ́ ń nə́ ń jí pyɛ̀lɛ̀ nə̀mwà dwí yó mó wɔ́ nɛ́. ¹⁶ Yó-cə́bal mɔ̀bɔ́ ń bə surhə zhe wẽ̀ ré zõ lyì bí sõ ǹdə́ jàn mɔ́ j'â n'ê súlí dɛ̃́dɛ̃́, sə lò mɔ̀bɔ́ ń súl ŋwɔ̀lɛ̀ mɔ́ mà n zhílí ń myə̌l ré dwɛ̀lɛ̀ rɛ́. ¹⁷ Lò mɔ̀bɔ́ ń nə́ ń lyɛ̀ɛ̀ dɛ̃́dɛ̃́ ń gə́ gu numbyíní mú yilə, mà n zə ń cìn n dùr n vò byə̀nə́-jù wə: bə̀ bə̀k'a pyà ń zal yé! ¹⁸ Lò mɔ̀bɔ́ ń já ń wɔ́ wu-põ̀ cə́bal ń nyǔ mú wẽ́ mà n nə ń cìnə̀, sə lò mɔ̀bɔ́ ń tũ̀twĩ̀ĩ̀ rí wɔ́ kùrə̀ nə̀lyè mà n mà ń nà n tu tɛ̃́ kùr rə̀dù wẽ́. ¹⁹ Lò mɔ̀bɔ́ ń nə́ ń vwàl ń cɛ y mà n jí kùjú n sú, sə lò mɔ̀bɔ́ ń pú cìn-jə́jɔ̀rɔ́ wẽ̀ kùr mú mà n jí nə̀mɔ̀ɔ̀rɛ n sú. ²⁰ Wu-põ̀ cə́bal mɔ́ mà n búl n nə bwəl, sə lò mɔ̀bɔ́ ń nə́ ń yǎl n jǐrh nə̀cɛ̀m-bal làlà làlà mɔ́ wàr ń mà n cẽ còrhò-tum nɔ yé. ²¹ E cír lyì bí e m'e ce nyí bə̀ kwã mɔ́ bə càn yé, e jà nyí-kùjú wɔ̌ ò ce lyì-fɔ̀lɔ̀ wɛ̀rhɛ́ yə̀-bəlɔ̀lɔ́. ²² Lò mó mɔ̀bɔ́ ń nə́ ń dùr nə̀cɛ̀ndɛ kwã mɔ́ yírhə́ né bə càn yé! Ń já ń yə̀l bə̀ nə̀mɔ̀ɔ̀rɛ j'â bàn mɔ yé. ²³ Lò mɔ̀bɔ́ bə̀ n'ê cící mú mà n swéné ń cícírnə mó du zɔ̃̀-ènyə̀là cə́bal mɔ́. ²⁴ Lò mɔ̀bɔ́ ń nə́ ń kɔkɔlɛ ń da ǹdə́ ń ná ń mə́ ń zhe: «È də̀ yə̀-bəlɔ̀lɔ́ yé» já ń də̀ kɔn dõ è gə də̀ lò ń nə́ ń ce dwã yó ǹdə́ vwǎrhna. ²⁵ Lò mó mɔ̀bɔ́ wẽ̀ nánzhəzhɔ̌ shil j'â zhe mo mó nə́ ń ji nəgúlí tɛ̃́, sə lò mɔ̀bɔ́ ń zhe Cinu zhə̀n mɔ́ shilə né m'a pyìrh. ²⁶ Lò mɔ̀bɔ́ ń zhe ń sə̀pwà lárma mɔ́ zhə̀n mɔ́ wɔ́ kòkò. Sə lò mɔ̀bɔ́ ń nə́ ń zal ń cìn ǹdə́ lárma mɔ́, ńmyɛ̌ mɔ́ ń mà n lú. ²⁷ Lò mɔ̀bɔ́ ń nə́ ń pɛ nə̀mɔ̀ mɔ́ nɛ, kaka t'â la mɔ mùrù yé, sə lò mɔ̀bɔ́ ń nə́ ń pyi ń yírhə́, bwəl námməlwàálsɛ m'a yí mu. ²⁸ Wu-bárhɛ́ cìnə́ bé gə zɛ̃̀, lò gakó já ń nə́ ń shèè. Sə bə̀ gə jé tɛ̃́, wu-cángá cìnə́ bé n'ê pùlə̀.