¹ Bə̀k'á cèrhé ǹ cìn nəkɔl dɛ̃ rɛ́ yil yé, bə̀ ǹ yə̀l kɔn rɛ́ tɛ̀bɛ́ rə̀ la nɛ́ yál zà yé. ² Bə̀ lò dõ cèrhé mó, sə è bə̀k'a yə̀ ǹ cìcì nyí rí yé, è yál zhə-bal, sə è bə̀k'a yə̀ ǹ cìcì nyì-vɔr rɛ́ yé. ³ Nə́kulu wɔ́ dwĩ̌, nyɔ̀rhɔ́ myɛ dùm, sə nyə̀nyà lyim rí k'ê dùm du ri. ⁴ Lyim-cəcɔ̌ w wɔ́ wu-dolo tũ̀twĩ̀ĩ̀, lyim rí wɔ́ kɔn rə̀ sú rə̀ n'ê bɔrha, sə è nə wɔ́ mɔ̌ lò ń mà n ŋwɛ̀nɛ́ n zhì dɛ̃̌ bwɛ̃̌-dǔr mú yé né? ⁵ Cúcú mɔ̀bɔ́ mə̀ j'â wɔ́ pamparɛ̃ɛ̃ mɔ́ cɔ̃̀ dɔbrɛ tɛ̀bɛ́ rə̀ zhe cìn-dã̀ɔ̃́ nánfɔ̀lɔ̀ mɔ́. ⁶ Dɔwa cɔ̀mɔ̀ mɔ́ ń nə́ ń cɛ̀mɛ̀ mɔ́ wɔ́ wu-põ̀ cɔ̀mɔ̀, zù-bal kwə̀ə̀le mó ń nə́ ń kwə̀ə̀le mó wɔ́ myìnù tũ̀twĩ̀ĩ̀. ⁷ Byã-kùr tɛ̀bɛ́ rə̀ jú rə sú mú twə́r tɛ̀nɛ́ ǹdə́ tù-zɔ̌ ǹd'ô tùr rí ga yé. Sə kɔn rɛ́ tɛ̀bɛ́ gakó rə̀ wɔ́ cɛ̀ɛ́ j'â wɔ́ jwàrɛ̀ byã-kùr tɛ̀bɛ́ nɔrh zhe mó yilə. ⁸ Ǹdə kúmí námpɔ́lɛ́ kɛ̀bɛ́ è nyɛ ǹdə́ è jǎl rɛ́ è n'ê yə́yɛ́lɛ́ dɛ̃̌ mɔ́ gə́ wɔ́ nɛ́, wɔ́ èta lò mɔ̀bɔ́ ń nyɛ ǹdə́ ń tənà y ń nə́ ń yə́yɛ́lɛ́ tɛ̃́ mɔ́ wɔ́ nɛ́. ⁹ Nwə̃̌ ǹdə́ wẽ̀ rə̀ lwẽ́ nã́nyə̀nyɛ̀lɛ́ n'ê ce lò wu yàl nyàn sə dɔwa wu-bɔ̀nɔ̀ w cɔ̃̀ lò sə̀pwà bùlə̀ né gə́ n'ê cĩ́ mu má. ¹⁰ Bə̀k'á yẽ̌ ǹ dɔwa mɔ́ ráá ǹ da dɔwa mɔ́ nɛ yé, sə ǹ bə̀k'á vò ǹ da-byǐ mú sõ zwini gə tú è zhe mó yi ní yé. Jə̀-dõ mɔ̀bɔ́ ń bwə́l mó cɔ̃̀ da-byǐ mɔ̀bɔ́ ń nyɛ ǹdə́ mɔ́ mɔ́. ¹¹ À byǐ, yál lárma cə́bal, à wu m'a yə̀ nyàn rə̀myɛ́ yi ní à m'a ŋwɛ̀nɛ́ a lyár lò mó mɔ̀bɔ́ ń nə́ ń fulsi ni mú. ¹² Cìn-dã̀ɔ̃́ cə́bal gə já ń nə yò w ò bànà, ń nə́ ń dùr ń shèè, sə kòkwə̀r ré twə́r tɛ̀nɛ́ ǹdə́ w yé, rə̀myɛ́ ce rə̀ y'a zɛ̃̀ rə̀ n'ê dɔ̀m rə̀ jə̀fɔ́lá. ¹³ Zwẽ ń kàmə̀zù-fwɛ̀lɛ̀ yá, zhə-bal mɔ́ jim rí yò w ń zwẽ n zhĩ mú yilə. Ce n pə kɔn zhə-kɛ̃ jim rí kwã̀ɔ̃́ mɔ́ yò w ń zwẽ n zhĩ mú yilə. ¹⁴ Bə̀ m'a nyǐ lò mɔ̀bɔ́ ń nə́ ń dùlí ń twí ń ce ń jə̀-dõ nəkɔkɔ́lɛ́ nɛ ǹdə́ búbwéése nánfwàlsɛ mɔ́, cɛ̀nɛ̀ rɛ́ ń nə́ ń bwəl mó ǹdə wɔ́ lwɛlɛ ta. ¹⁵ Sùbí nɛ̃̌ kwã́ɔ̃́ ku kɔ̀bɔ́ ò t'â dwi ò zhɛ̀ dwà dɛ̃ rɛ́ mɔ́ ǹdə́ kɛ̃ mɔ̀bɔ́ ń wɔ́ nəgúl-tarna mɔ́ ga j'â wɔ́ rə̀dù. ¹⁶ E ce n yẽ̌ búlə́ né ne? Rə̀myɛ́ sə e zə zho wə́, ráá e zə nwə̃̌ ǹdə́ è jɛ̃̀! ¹⁷ Lù ò n'ô dwèlè lù, numbyíní n'ê tó è jə̀-dõ dɛnnɛ è kwɛrhɛ. ¹⁸ Lò mɔ̀bɔ́ ń nə́ ń shili ń épyìlú w mà n jí ò byǎ bɛ́, lò mɔ̀bɔ́ ń nə́ ń cili ń yó-cə́bal mɔ́ sõ mà n nə còrhó rə̀ yilə. ¹⁹ Ǹdə nɛ̃̌ mɔ́ gə́ wɔ́ zhə̀zhé yé-zwã̌ y yil né, numbyíní wu w myɛ wɔ́ èta è yilə. ²⁰ Cílə́ bé lũ w ǹdə́ gɔ́rɔ́ nánlyilyùmú w ga j'â t'â swí yé, numbyíní y yírhə́ né myɛ j'â t'â nyǐ nə̀ swí yé. ²¹ Sə̀byì-kùlì zhe è shɔ̃́, sánə́má myɛ zhe mə̀ shɔ̃́, numbyíní zɛ̃̀ è zhe kɔn rɛ́ tɛ̀bɛ́ bə̀ n'ê zɔ̀m è shò kwã mɔ́. ²² Má ǹ gə zò nyə̀nyà wẽ̀-byǎ cəcəl w zɔ wẽ́ myɛ, è nyə̀nyààrɛ́ y'à t'â la kɔl rə ló tɛ̃́ rə yẽ̌ y yé. Cúcú tumə nyɛ̀bɛ́ nə̀ n'ê twĩ̀ gɔ nɛ́ shò kwã nɛ́ ²³ Lwar ǹ dɔ̀ w gə́ wɔ́ nɛ́ ma náàcɛ̀nɛ́ sə́ nyǐ ǹ vwàmá nɛ́ yò cɛ̀nɛ̀. ²⁴ Bə̀ nə̀cɛ̀ndɛ́ də̀ kɔn tɛ̀bɛ́ rə̀ j'â ŋwɛ́nɛ́ gaga yil yé, sə pyɛ̀lɛ̀ yə́-pú də̀ byinə nə̀ pú pú dwã nɛ kɔn yé! ²⁵ Bə̀ gə kwar gɔ w kwã, nándũ̀ w gə púrh kwã, bə̀ gə tú bə̀ pwà pyàr rɛ́ gɔ w kwã, ²⁶ ce jàn nɛ́ ń zə pyì-bwǎlsɛ, mùnì ga ń nə gàndɛ ń zù, ǹdə́ bə̀cǐlsi mùnì ga ń yè cɛ ²⁷ e súlí ǹdə́ bɔ̀n yil nánzhəzhɔ̌ ń mə́ ń kɔ̃̀ ǹ cìnə̀, ǹdə́ ǹ kɛ̀lɛ́ y lyì bí, sə́ súlí ce ǹ tùntùnnə bé bə̀ wɔ́ kana mɔ́ zə myə̌l.