¹ Ǹdə bə̀ gə́ t'â dɛ̃̀ wàr rɛ́ rə̀ n'ê nywɛ̀ ǹdə dwà ta ce-lumu yi rí w ráá dwà jòró yi rí w mú ní, èta myɛ yó-dɛ̃̌-zhõ̌ shil j'â bə kòkò zhe yé. ² Ǹdə kúmí námpɔ́lɛ́ y kɛ̀bɛ́ è y'a zɛ̃̀ e jòm, e zɛ̃̀ e jòm ta, ǹdə jíjílí kɛ̀bɛ́ è n'ê jíjílí dɛ̃̌ mɔ́ ta, èta myɛ bwelé námməlwɛ̀lɛ́ kɛ̀bɛ́ bə̀ bwəl bə pə e jà rə̀ bə kùr zhe mó j'â t'â pyìrh yé. ³ Shə́lá y wɔ́ eshã yilə, nyíní y wɔ́ bə̀na yilə, də̀-dɔ̀lɔ̀ w zɛ̃̀ ò wɔ́ kòkwə̀r ré cěsé yilə. ⁴ Bə̀k'á lyár kòkò kɔn mɛrhɛ dwã ǹd'ô nyə̀nyààrɛ́ yé, è gə də̀ rə̀myɛ́ ǹmyɛ cìcì mú m'ǎ yə̀ ǹdə ò ta. ⁵ Lyár kòkò w kɔn tó dwã ǹd'ô nyə̀nyààrɛ́, è gə də̀ rə̀myɛ́ ò m'a bù b'ò lɔ́wá. ⁶ Lò mɔ̀bɔ́ ń nə́ ń twĩ̀ kòkò b'ò zhəl ò vò cĩ́ ń nyí rí mú já ń nə́ ń gòm ń cìcì nèsé ń súlí ń nə́ ń nywɛ̀ jɔ́ɔ́rɛ tũ̀twə̃̀ə̃̀ né ń ce ń wẽ́. ⁷ Ǹdə gwànà nèsé gə́ wàr sə kwɛ̃́ y mɔ́ nɛ, wɔ́ èta səswalá wɔ́ nɛ́ kòkwə̀r ré nyú wə. ⁸ E ce nə́kulu kɔ́làmpá wẽ́ e lyẽ ǹdə́ e zhẽ̌ kòkò yó dɛ̃̌ j'â wɔ́ kɔn rə̀dù! ⁹ Ǹdə sɔr sə̀-nyɔ̀rɔ́ n'ô zhẽ̌ ò ce dɛ̃̌ gə́ j'â wɔ́ nɛ́, wɔ́ èta səswalá wɔ́ nɛ́ kòkwə̀r ré nyú w ní. ¹⁰ Ǹdə yó-cə́bal mɔ̀bɔ́ ń nə́ ń cɛ̀mɛ̀ lyì bí gakó gə́ wɔ́ nɛ́ mɔ́, wɔ́ èta lò mɔ̀bɔ́ ń kwè kòkò ráá lyì bí byɛ̀bɛ́ bə̀ n'ê tó sɔ́má bə̀ lyɛ̃ mɔ́ ń ce ń tum ni mú wɔ́ nɛ́. ¹¹ Ǹdə kùlí y kɛ̀bɛ́ è k'a kwɛ̃̀ e vò è tətɔɔlɛ́ sõ mó gə́ wɔ́ nɛ́, wɔ́ èta kòkò w kɔ̀bɔ́ ò n'ô càrh ò nyə̀nyààrɛ́ nɛ́ wɔ́ nɛ́. ¹² Ǹ gə nɔ lò ń nə́ ń bùl bə̀ ń lɔ́ ń cìcì yírh wə, bə̀ wɔ̌ bə̀ dɛ̃̀ kɔn kòkò sõ du rə̀-ná-cí mú sõ. Sɛ́bɛ́ nə̀wàcɛ̀n-nyɛl shò kwã ¹³ Nə̀wàcɛ̀n-nyɛl nə́ ń wə̀lə̀: «Gɔ-ku wɔ sɔ́má y yó, bɔrɔ wɔ sɔ́msɛ́ yó!» ¹⁴ Bòlò n'ô zhízhílí wẽ̀ ré tɛ̀bɛ́ rə̀ zə w rə̀ m'ê zhǐ mú yó, nə̀wàcɛ̀n-nyɛl zɛ̃̀ ń nə́ ń pyìrhí ń pal rɛ́ yó. ¹⁵ Nə̀wàcɛ̀n-nyɛl nə́ ń ce ń jɛ̃̀ y nə̀zhĩ̌ y wẽ́, sə n ce e bə̀ e yí ń nyú w mú j'â n'ê lyɛ̀ɛ̀ mɔ. ¹⁶ Nə̀wàcɛ̀n-nyɛl já n lə́ dɛ̃́dɛ̃́ ń cìcì yírh wə, du nunə bwàlpyɛ̀ bə̀ yě kɔn dɛ̃́dɛ̃́ e jà bə lə́ mɔ́. ¹⁷ Ń nə́ ń yǎl ń tó kùlí y zhã̌ nɛ́ nɛ n zə yə, lò mó mɔ̀bɔ́ ń tó sɔ́má ń nə́ ń lyɛ̃ n já n zɛ̃̀ ń nə́ ń pupuri tɛ̃́ búlə́ nyɛ̀bɛ́ ń twə́r tə̀ nə̀ wẽ́ mó. ¹⁸ Lò mɔ̀bɔ́ ń zɛ̃̀ ń nə́ ń wɛ̀rhɛ́ ǹdə nyə̀nyà ta, ń nə́ ń dul myǐn dǎr, ń súlí ń nə́ ń tɛ cama, è n'ê yǎl e wɔ̀ cu mú, gə́ wɔ́ nɛ́, ¹⁹ wɔ́ èta lò mɔ̀bɔ́ ń nə́ ń myìnì ń dõ rə̀myɛ́ kwã nɛ́ n zɛ̃̀ wɔ̀: «nyàrhá à y'à n'â ce!» mó wɔ́ nɛ́. ²⁰ Dǎr gə tú rə̀ zhɛ̀ yi ní, myǐn mú n'ê cì. Gàrmə́nyɛlɛ́ gə k'ê tɛ̀nɛ́, búlə́ né n'ê zhɛ̀. ²¹ Cala nə̀ ce myìn-cala ŋwɛ́nɛ́, dǎr rɛ́ rə̀ n'ê ce myǐn mú zala, èta myɛ wɔ́ nəgúl-tarna mɔ́ ń nə́ ń pɔ̀lɛ̀ búlə́ né càn rɛ́. ²² Gàrmə́nyɛlɛ́ zɔ̀mà nɛ́ wɔ́ ǹdə kùjú-ènyɔ̀ɔ̀lɛ̀ ta, rə̀ n'ê dùr rə̀ zhə̀l rə̀ zwì sùlú w kùr ré wẽ́. ²³ Sə̀byì-kùlì kɛ̀bɛ́ bə̀ yə̀ è jìmdí vùr bə̀ yə̌l bə dɛ̃ dɔ-ku ni mú, wɔ́ èta yə̀wǎl zɔ̀mà nɛ́ ǹdə́ wu námməlwɛ̀lɛ́ wɔ́ nɛ́. ²⁴ Zùùri cə́bal nə́ ń shèè ń cìn ń zɔ̀mà nɛ́ wẽ́ e jà ń wu w j'a sú ǹdə́ myìnù tũ̀twə̃̀ə̃̀. ²⁵ Má ń nyì-púpwírí y wɔ́ wu-bɔ̀nɔ̀ nyì-púpwírí myɛ, bə̀k'á zwẽ nyí yé, bə̀ ń wu w sú ǹdə́ bùlə̀ námməlwǎlsɛ sə̀ j'â búl sə̀ já. ²⁶ Bə̀ wɔ̌ bə̀ m'a zə ku bə shèè zùùrí, sə ń lwɛlɛ rɛ́ m'a du lyì bí gakó yírh wə. ²⁷ Lò mɔ̀bɔ́ ń nə́ ń kwì gɔ́rɔ́ mà n tu ò wẽ́. Nə́kulu w m'a yə́yɛ́lɛ́ o tu lò mó mɔ̀bɔ́ ń nə́ ń byíbyílí w mú yó. ²⁸ Mə̀jòlò kɔ̀bɔ́ ò n'ô gòm kɔma mɔ́ j'â súl lyì bí byɛ̀bɛ́ ò n'ô mà mɔ́ sə nyí tɛ̀bɛ́ rə̀ nyɛ̀ mɔ́ n'ê zə zhìlù rə̀ m'ê twí.