¹ Pyɔ̌ Ləməwəə zɔ̀mà nɛ́. Còrhò mó mɔ̀bɔ́ ń ná pɔ mɔ mɔ́. ² Ééh, à byǐ! Ééh, byǐ mɔ̀bɔ́ ǹ shí à wẽ́ mó! Ééh, byǐ mú à pyà ǹdə́ à wu gakó mó! ³ Bə̀k'á zhɛ̀ ǹ jàn rɛ́ kana bɛ́ sõ yé, bə̀k'á ce kɔn rɛ́ tɛ̀bɛ́ ǹ la yál mɔ́ kana bɛ́ bə̀ n'ê dwĩ̀ pyǎ bɛ́ mɔ́ jɔ̃̀ w yé. ⁴ Ləməwəə, pyǎ bɛ́ j'â bə mə̌ ǹdə́ də̀vɛ̃́ yé, yó-cìnə́ bé bə mə̌ ǹdə́ sɛ̃́ mɔ̀bɔ́ mə̀ n'ê zal mɔ́ yé. ⁵ Bə̀ bə̀ gə nyɔ̀ mɔ, bə̀ m'a swě nyə́ né yò, sə bə̀ m'a bùr nə̀mwà bɛ́ bùrsí námməjóló. ⁶ Bə̀ pə sɛ̃́ mɔ̀bɔ́ mə̀ n'ê zal mɔ́ lò mó mɔ̀bɔ́ ń la cú mú ni, sə bə pə də̀vɛ̃́ lò mó mɔ̀bɔ́ wu-zhùlù nánfɔ̀lɔ̀ zhe mó ne. ⁷ Ń mà n nyɔ̀ sə ń mà n swě ń zúzúnú w yò, ń kə́ ń tá ń la ń nɔ̀nɔ̀ w yò lyǐrh yé. ⁸ Púr ǹ nyí ń zɔ̀m ń ce nyì-bədɔ̃ɔ̃ w kwã nɛ́, ǹdə́ lyì bí byɛ̀bɛ́ gakó bə̀ bə sɛ̃ɛ̃́ zhe mó kwã nɛ́. ⁹ Púr ǹ nyí ń bùr bùrsí ǹdə kɔn gə́ mə̌ sə sə bùr ní, ń mə́ ń súlí ń ce nyí bə-jàn-zhəəre cìnə́ bé ǹdə́ nə̀mwà bɛ́ kwã nɛ́. ¹⁰ Mɔ̌ lò ń mà n já n nə kə-bya? È ye y j'â búl è cɛ̀ du kɔráyɛ y cìcì mú. ¹¹ È byal mɔ́ já ń búl ń zhe è zhə̀nà, ń tá ń la rə̀ nyɔ̀ɔ̀rhɛ́ lyɔ̃̀ yé. ¹² Kə-bya n'ê twĩ̀ è byal mɔ́ cɛ̀nɛ̀ yilə, è nyǔ mú dwã nɛ́ púlə́púlə́, sə è də̀ ń lwɛlɛ yil yé. ¹³ È n'ê zhìlì è yala nɛ è pyà pyì-kur ǹdə́ lɛ̃̌, è jɛ̀sɛ́ zɛ̃̀ sə̀ n'ê twĩ̀ yə̀wǎl yə̀wǎl. ¹⁴ È wɔ́ ǹdə dɔ̌lna bɛ́ bǔ-bwələ né ta, è n'ê ce è kùjú w n'ô shí pyépyé ò twí. ¹⁵ È n'ê zɛ̃̀ ǹdə́ cɛ y gwẽ̌ yə̀ lɛ́ yé, mùnì ga e tɛnɛ kùjú w è kɛ̀lɛ́ lyì bí yilə, s'e súlí e pə è nyə́ né è tùntùnnə bé bə̀ wɔ́ kana mɔ́ nɛ. ¹⁶ È n'ê pyà cɛ kɛ̀bɛ́ è só mó, e zɛ̃̀ e zwẽ y e yè, e zɛ̃̀ e zə è tum rí nyɔ̀ɔ̀rhɛ́ e m'e zhele də̀vɛ̃́-cèmé. ¹⁷ E zɛ̃̀ e lyẽ è cã̌, e súlí e kù è vɔ̀mɛ̀ nɛ́. ¹⁸ È nyǐ e púrí è tumə né n'ê zhə̀l cɛ̀nɛ̀ è pàntɛ́mɛ́ y j'â t'â cì cəcɛ̃ nɛ gaga yé. ¹⁹ È n'ê pyɛ́l è jèndé ré è jɔ̃̀ wa, è jə̀fɔ́lá nɛ́ zɛ̃̀ nə̀ n'ê nywɛ̀ tə́tɔ̃́ wá. ²⁰ È n'ê tə̀l ǹdə́ zúzúnú cə́bal mɔ́, è n'ê cèlè è jɛ̃̀ y è sɛ̃ nə̀mɔ̀ nɛ. ²¹ È wu t'â zɛ̃̀ wàr rɛ́ rə̀ n'ê nywɛ̀ ǹdə dwà ta mɔ́ yilə, è kɛ̀lɛ́ lyì bí yil yé, bə̀ bə̀ gakó zhe kàmə̀zǔrh sə̀lyè sə̀lyè. ²² È n'ê swɛ̃̀ gàmə̀lyɛ̀ndɛ è cìn yilə, è gàndɛ́ j'â wɔ́ lɛ̃̌ kɛ̀bɛ́ è càn ǹdə́ kàmə̀jɛ̃̀-shɛ̃̀ gàndɛ. ²³ Lyì-fwààlɛ́ dwã-gùúlí jààsɛ́ wa, bə̀ j'â n'ê nyàm è byal mɔ́ ń gə tó jààsɛ́ sə̀myɛ́ mɔ́ náncɛsɛ́ nɛ ń jě yi ní. ²⁴ È n'ê swɛ̃̀ gàndɛ è yè, e sɔ̃̀ cã̌-tàndɛ e pə dɔ̌lna bɛ́ nɛ. ²⁵ Jàn ǹdə́ còrhó rə̀ wɔ́ gàndɛ́ è n'ê zwì mú, è n'ê tɛ́rɛ́ dwã nɛ́ nyɛ̀bɛ́ nə̀ bàn mɔ́ yò ǹdə́ è n'ê mɔ̀nà. ²⁶ È nyí rí j'â n'ê púr ǹdə́ lárma è mə̀jòlò w zɛ̃̀ ò n'ô cící ǹdə́ zɔ̃̀-ènyɛ̀là. ²⁷ È n'ê myə̀lɛ́ è kɛ̀lɛ́ y zhəl mó, è já è t'â jí nə̀wàcɔ̀rɔ̀ kùjú myɛ yé. ²⁸ È byǎ bɛ́ j'â n'ê wə̀l bə̀ è wɔ́ wu-bɔ̀nɔ̀ cə́kɛ̃ è byal mɔ́ myɛ nə́ ń ji è yə̀-bya: ²⁹ «Kana-byǎ nánzhəzhɔ̌ byili bə̀ bə̀ wɔ́ kə-byərh zhə̀n ga, sə èmyɛ́ j'â du bə̀ púlə́púlə́!» ³⁰ Bwẽ́ ré n'ê jə́jɛ̀rɛ́ nyí, cɛ̀nɛ̀ rɛ́ t'â dɛnɛ yé. Kɛ̃ mɔ́ mɔ̀bɔ́ ń nə́ ń nyàm Cinu mú, wɔ́ ńmyɛ̌ bə̀ mə̌ dwã sə bə cèrhé. ³¹ Wɔ́ ńmyɛ̌ ń cǐ ń tum rí nyɔ̀ɔ̀rhɛ́, sə kɔn rɛ́ tɛ̀bɛ́ ń wɛ̀rhɛ́ mɔ́ bwə̀l ń còrhó wə́.