¹ Dwã lyɛlɛ dɛ̃ rɛ́, Muyiisi byẽ̀ Aarɔ̃ ǹdə́ ń byǎ bɛ́, e súlí Esərayɛl náncɛsɛ́. ² N zɛ̃̀ n wɔ̀ Aarɔ̃ nɛ: «Pyǎ nũ̌-bwə̀lə̀ yə̀-bəlɔ̀lɔ́ sǔbri lwə̌l vwĩ̀ rí yilə, e súlí pyì-bya vwĩ̀ námpúm cɛ̃́ɛ̃́ rɛ́ yilə, sə kaka bə̀ sə̀ sə̀lyè y ga zal yé, ń mə́ bə̀ Cinu yé né. ³ Ǹ m'ǎ zɛ̃̀ ń zɔ̀m ǹdə́ Esərayɛl lyì byǎ bɛ́ ń wɔ̀: ‹Zə-na bə̀cìlə́ yə̀-bəlɔ̀lɔ́ sǔbri lwə̌l vwĩ̀ rí yilə, e súlí byin rə̀dù nũ̌-bwə̀lə̀ ǹdə́ byin rə̀dù pyì-bwɛ̀lɛ́, sə kaka bə̀ sə̀ sə̀lyè y ga zal yé, vwĩ̀ námpúm cɛ̃́ɛ̃́ rɛ́ zwə́l yilə, ⁴ e súlí nə̀-bya ǹdə́ pyì-bya yə̀-zùlə́ vwĩ̀ rí bə̀ la zwə́l Cinu yé né mó yilə, ǹdə́ mún mə̀ ywə́rh ǹdə́ nwə̃̌; bə̀ wɔ́ zà Cinu la ába ń cìn byilu.› » ⁵ Bə zə kɔn dɛ̀bɛ́ gakó Muyiisi yà ń pɔ bɛ rə̀ nyí mú bə m'e bə̀ dwã-joló kòrhó w yé y wə, dwí rí gakó zɛ̃̀ rə twẽ̌ rə bwəlse rə zhì dɛ̃̌ Cinu yé né. ⁶ Muyiisi kə́ n wɔ̀: «Nyǐ kɔn rɛ́ tɛ̀bɛ́ Cinu pɔ nyí b'ǎ wɛ̀rhɛ́ mùnì ga á nə́ Cinu còrhó wə́.» ⁷ Rə̀myɛ́ kwã nɛ́, Muyiisi wɔ̀ Aarɔ̃ nɛ: «Twẽ̌ ń yí vwĩ̀-jùlú w yala nɛ, ń zwə́l ǹ yə̀-bəlɔ̀lɔ́ sǔbri lwə̌l vwĩ̀ rí ǹdə́ ǹ vwĩ̀ námpúm cɛ̃́ɛ̃́ rɛ́ ń mə́ twĩ̀ yə̀-bəlɔ̀lɔ́ sǔbri pɔ tũ̀twĩ̀ĩ̀ rí ǹ cìcì mú ǹdə́ dwí rí yilə, sə́ zɛ̃̀ ń pə dwí rí pɛnɛ́ yá, ń mə́ twĩ̀ sǔbri pɔ tũ̀twĩ̀ĩ̀ rí rə̀ yilə, ǹdə Cinu gə́ pɔ nyí ní.» ⁸ Aarɔ̃ twẽ̌ n bwəlse vwĩ̀-jùlú w nyí ni, n zwə́l ń cìcì yə̀-bəlɔ̀lɔ́ sǔbri lwə̌l nũ̌-bwə̀lə̀ y vwĩ̀ rí; ⁹ Aarɔ̃ byǎ bɛ́ kwɛ̃́ jal mɔ́ bə pɔ̃; n mɔ́rh ń jə̀fɔ́lɛ́ jal mɔ́ wẽ́, n cĩ́ cĩ́ vwĩ̀-jùlú w nyimi ní yó, n zɛ̃̀ n kwè mə̀ kùr ré n ló tɛ̃́ vwĩ̀-jùlú w kùr wə. ¹⁰ N ji vwĩ̀ rí vwǎm mɔ́ nwǐsí ǹdə́ mə̀ bəcə̀-pwala nɛ́ ǹdə́ mə̀ cɛ̃ rɛ́ myǐn ǹdə Cinu gə́ yà ń pɔ nyí Muyiisi ni ní. ¹¹ È gə wɔ́ nàmá bɛ́ ǹdə́ tɔ̀nɔ̀ w yilə, ń zə rɛ n du zulə́ jàà y w n vò n ji myǐn. ¹² Ń zwə́l vwĩ̀ námpúm cɛ̃́ɛ̃́ rɛ́ pyì-bya yá; Aarɔ̃ byǎ bɛ́ kwɛ̃́ è jal mɔ́ bə pɔ̃, n zhɛ́rhɛ́ mɔ vwĩ̀-jùlú w cã̌ y nɛ n kə́kɛ́lɛ́. ¹³ Bə kwè vwĩ̀ námpúm cɛ̃́ɛ̃́ rɛ́ vwǎm mɔ́ mə̀ gòm nǎm nǎm mɔ́ e súlí mə̀ yó w bə ji myǐn vwĩ̀-jùlú w yó; ¹⁴ n shɛ̀rh mə̀ lyur rí ǹdə́ mə̀ nə̀-gwěsé n zɛ̃̀ n súlí ri vwĩ̀ námpúm cɛ̃́ɛ̃́ rɛ́ nɛ n ji myǐn vwĩ̀-jùlú w yó. ¹⁵ Rə̀myɛ́ kwã nɛ́, ń zwə́l dwí rí vwə̃̀ né: ń zwẽ dwí rí yə̀-bəlɔ̀lɔ́ sǔbri lwə̌l bə̀cìlə́ y n zwə́l ǹdə vwĩ̀ nã́yéé ré vwǎm mɔ́ ta. ¹⁶ N zwə́l vwĩ̀ námpúm cɛ̃́ɛ̃́ rɛ́ vwǎm mɔ́ ǹdə kɔn gə́ mə̌ sə rə tó né. ¹⁷ Rə̀myɛ́ kwã nɛ́, ń pɔ mún mú: ń co mo ń jə̀-gúl yírh n súlí nəkɔkɔ́lɛ́ vwĩ̀ námpúm cɛ̃́ɛ̃́ rɛ́ nɛ n ji myǐn vwĩ̀-jùlú w yó. ¹⁸ Rə̀myɛ́ kwã nɛ́, ń zə nə̀-bya y ǹdə́ pyì-bya y dwí rí y'à pɔ mɔ́ n mə n zwə́l yə̀-zùlə́ vwĩ̀ rí; Aarɔ̃ byǎ bɛ́ kwɛ̃́ sə̀ jal mɔ́ bə pɔ̃, n zhɛ́rhɛ́ mɔ vwĩ̀-jùlú w cã̌ y nɛ n kə́kɛ́lɛ́; ¹⁹ è gə wɔ́ nə̀-bya y ǹdə́ pyì-bya y nwǐsí yilə, è n'ê yǎl e wɔ̀ nə̀byílə́ né ǹdə́ wu lyur rí nwǐsí ǹdə́ ocə̀-pwala nɛ́ e súlí cã nɛ́, ²⁰ bə̀ pyɛ̀lɛ́ rɛ nyɛ̀là nɛ́ yó bə ji myǐn vwĩ̀-jùlú w yó; ²¹ Aarɔ̃ zɛ̃̀ n kwè nyɛ̀là nɛ́ ǹdə́ kùr-cí rí n pə Cinu ni ǹdə bə̀ gə́ y'a wɛ̀rhɛ́ nɛ́ bə m'e pə pɛnɛ́ nɛ́ mɔ́, ǹdə Muyiisi gə́ yà ń pɔ nyí ní. ²² Rə̀myɛ́ yó, Aarɔ̃ zhẽ̌ ń jɛ̀sɛ́ dɛ̃̌ n zhèlè se dwí rí yó n mə n cĩ́ ri bwəl; sə ń gə́ zwə́l yə̀-bəlɔ̀lɔ́ sǔbri lwə̌l vwĩ̀ rí ǹdə́ vwĩ̀ námpúm cɛ̃́ɛ̃́ rɛ́, e súlí yə̀-zùlə́ vwə̃̀ né n zhɛ̀ kwã, ń kwɛ̃̀ n shí vwĩ̀-jùlú w yó n só tɛ̃́. ²³ Muyiisi ǹdə́ Aarɔ̃ tó dwã bə zù dwã-joló kòrhó w wə, bə zɛ̃̀ bə k'a du bə̀ la bwəl cṹ dwí rí yó. Rə̀myɛ́ yó, dwí rí púlə́púlə́ j'a nə Cinu còrhó wə́: ²⁴ myǐn j'a shí Cinu yé né mə du mə jí vwĩ̀ námpúm cɛ̃́ɛ̃́ rɛ́ ǹdə́ nwǐsí. Dwí rí gakó nə rɛ; lyì bí mà wu-nyɔ̃̀ búbwéése, bə zɛ̃̀ bə tu bə zə bə̀ yə́rh bə pú tɛ̃́.