¹ Aarɔ̃ byǎ bɛ́, Nadaabɛ ǹdə́ Abyəwu, mə̀dù gakó yà ń kwè ń nə̀zhĩ̌ y kɛ̀bɛ́ ń mə́ ń ji wẽ̀ ré rə̀ lwẽ́ nã́nyə̀nyɛ̀lɛ́ y myǐn mú, n ló myǐn è wẽ́ n zɛ̃̀ n ló wẽ̀ rə̀ lwẽ́ nã́nyə̀nyɛ̀lɛ́ myǐn mú wə; èta, bə̀ j'a zə myǐn mɔ̌ mɔ̌, myǐn mɔ̀bɔ́ Cinu yə̀ nyí pɛ mə̀ yil mú, bə m'e bə̀ ń yé né. ² Rə̀myɛ́ yó myǐn j'a shí Cinu yé né mə du mə jí bi; bə j'a cì Cinu yé né. ³ Muyiisi zɛ̃̀ n wɔ̀ Aarɔ̃ nɛ: «Cinu yà ń dámǎ n wɔ̀ rɛ: ‹À n'â yǎl bə̀ lyì bí byɛ̀bɛ́ bə̀ n'ê yí à yala nɛ mɔ́, nyǐ ni ǹdə Yi rí tɛ̀bɛ́ rə̀ bə dõ zhe ta, à súlí à n'â yǎl bə̀ bə̀ cèrhé ne, dwí rí gakó yé né.› » Aarɔ̃ já n shĩ̌ ń nyí. ⁴ Muyiisi já n byẽ̀ Myəkayəə ǹdə́ Eləsafã, Aarɔ̃ da da-byǐ Uzhəə byǎ bɛ́, n wɔ̀ bɛ: «Bwəlse-nə nyɔ̀nɔ̀! Pwǎ-na á da-byǎ bɛ́ cùùrí Cinu jì y yé né á m'á du zulə́ jàà y wa.» ⁵ Bə twẽ̌ bə yí, bə pwà bə̀ da-byǎ bɛ́ cùùrí bə pyípyílí bə̀ kàmə̀zù-pɔ́lsɛ́ wẽ́, bə m'e du zulə́ jàà y wa, ǹdə Muyiisi gə́ yà ń pɔ bɛ nyí ní. ⁶ Muyiisi zɛ̃̀ n wɔ̀ Aarɔ̃ ǹdə́ ń byǎ Eləyazaarɛ ǹdə́ Yətamaarɛ nɛ: «Á bə̀k'á yẽ̌ á ywésé ne sə gùlí gùlí dwã nɛ yé, á bə̀k'á kǎr á gàndɛ́a yé, è gə də̀ rə̀myɛ́ á m'ǎ cì sə á m'ǎ súlí á vwɛ̃ Cinu lyim rí á ló Esərayɛl lyì byǎ bɛ́ púlə́púlə́ yó wə. È wɔ́ á da-byǎ Esərayɛl lyì byǎ bɛ́ gakó bə̀ m'a kúrh byɛ̀bɛ́ Cinu ce myǐn jí bi mú. ⁷ Ámyɛ̌ j'á bə mə̌ sə á zhǐr dwã-joló kòrhó w nyí rí ni yé, è gə də̀ rə̀myɛ́ á m'ǎ cì, bə̀ gə́ tútǔ ába ǹdə́ nwə̃̌ y kɛ̀bɛ́ bə̀ m'ê pɛ Yi tum rí tũ̌ mú ŋwɔ̀nɔ́ w yilə.» Sə bə̀ wɛ̀rhɛ́ ǹdə Muyiisi gə́ byili bi ní. ⁸ Cinu zɔ̀m ǹdə́ Aarɔ̃ n wɔ̀: ⁹ «Ǹmyɛ́ ǹdə́ ǹ byǎ bɛ́, á t'á la də̀vɛ̃́ ráá kɔ̀-nyɔ̀ɔ̀mà mɔ̀bɔ́ mə̀ co sã̀-nə̀byẽ̌ nyɔ́ á gə mə̌ sə á vò dwã-joló kòrhó w w yi ní yé; èta, á t'á la cú yé. Wɔ́ nyí rə̀ m'à j'â ŋwɛ́nɛ́ gaga á yilə, byin byin gakó. ¹⁰ Rə̀myɛ́ mɔ́, wɔ́ mùnì ga á ŋwɛ̀nɛ́ á pɔr kɔn rɛ́ tɛ̀bɛ́ rə̀ wɔ́ Yi nyǎn mɔ́ ǹdə́ tɛ̀bɛ́ rə̀ wɔ́ kɔn nánfò mó dwã wa, kɔn rɛ́ tɛ̀bɛ́ rə̀ zhe jìmdi ǹdə́ tɛ̀bɛ́ rə̀ bə jìmdi zhe dwã wa, ¹¹ sə á ŋwɛ̀nɛ́ á cèrhè Esərayɛl lyì byǎ bɛ́ nɛ nyə́ né nyɛ̀bɛ́ gakó Cinu kwè bə̀ yil n zɛ̃̀ n tó Muyiisi dɛnnɛ n pə bɛ mɔ́.» ¹² Muyiisi zɔ̀m ǹdə́ Aarɔ̃ e súlí Eləyazaarɛ ǹdə́ Yətamaarɛ, Aarɔ̃ byǎ bɛ́ bə̀ y'à dàl mɔ́ n wɔ̀: «Á gə vùr kùjú kɔ̀bɔ́ ò gakó n'ô jí myǐn mú Cinu yilə, vɔ̀lɔ́ kɔn rɛ́ wẽ́, sə á kwè vɔ̀lɔ́ kɔn rɛ́ kùr ré á jòm vwĩ̀-jùlú w yala nɛ á jí, sə á bə̀ sã̀-nə̀byẽ̌ rə̀ wẽ́ ce yé, bə̀ rə̀ wɔ́ Cinu dúdú cəl. ¹³ Á m'ǎ jòm jàà kɛ̀bɛ́ bə̀ cír rə̀myɛ́ mɔ́ yil mú w á m'á jí ri, bə̀ rə̀ wɔ́ ǹmyɛ́ ǹdə́ ǹ byǎ bɛ́ cəl kùjírə́ nyɛ̀bɛ́ nə̀ gakó n'ê ji myǐn Cinu yil mú wẽ́. Wɔ́ nyí rí tɛ̀bɛ́ Cinu pɔ nɛ mɔ́. ¹⁴ È gə wɔ́ vwàmá nɛ́ nyɛ̀bɛ́ bə̀ m'e zwə́l yə̀-zùlə́ vwə̃̀ né nyɛ̀là nɛ́ ǹdə́ nə̀ kùr-cə̃́ né bə̀ pɔ Cinu ni ǹdə bə̀ gə́ mə̌ sə bə wɛ̀rhɛ́ nɛ́ bə m'e pə pɛnɛ́ mɔ́ yilə, ǹmyɛ́ ǹdə́ ǹ byǎ bɛ́ e súlí ǹ bə̀kwá bɛ́ m'ǎ dɔ̃̀ nɛ jàà kɛ̀bɛ́ è bə jìmdi zhe mó wẽ́, bə̀ rə̀ wɔ́ ǹmyɛ́ ǹdə́ ǹ byǎ bɛ́ cəl ré Esərayɛl lyì byǎ bɛ́ yə̀-zùlə́ vwə̃̀ né bə̀ n'ê zwə́l mó wẽ́. ¹⁵ Bə̀ m'a zə kùr-cí rí ǹdə́ nyɛ̀l rɛ́ bə m'e súlí nwǐsí bə̀ n'ê ji myǐn vwĩ̀-jùlú w yó mó ne bə m'e bà; bə̀ gə pɔ rɛ Cinu ni ǹdə bə̀ gə́ mə̌ sə bə wɛ̀rhɛ́ nɛ́ bə m'e pə pɛnɛ́ nɛ́ mɔ́ bə̀ zhɛ̀, nàmá bɛ́ bə̀myɛ́ jǐrh ǹmyɛ́ ǹdə́ ǹ byǎ bɛ́ cəl gaga yilə, ǹdə Cinu gə́ pɔ nyí ní.» ¹⁶ Muyiisi bwə̀rh yə̀-bəlɔ̀lɔ́ sǔbri lwə̌l vwĩ̀ rí bə̀cìlə́ y bwə̀rhə́, sə ń púrí bə̀ ju y myǐn. Ń lyim j'a zɛ̃̀ rə̀ n'ê yì Eləyazaarɛ ǹdə́ Yətamaarɛ, Aarɔ̃ byǎ bɛ́ byɛ̀bɛ́ bə̀ y'à dàl mɔ́, n zɛ̃̀ n wɔ̀: ¹⁷ «Byè yil á nə yə̀ vwĩ̀ rí vwǎm mɔ́ nàmá bɛ́ dɔ̀m Cinu jàà y kɛ̀bɛ́ bə̀ cír rə̀myɛ́ mɔ́ yil mú wẽ́, bə̀ gə́ wɔ́ Cinu dúdú cəl yilə? Cinu pɔ ába vwĩ̀ rí vwǎm mɔ́ mə̀myɛ́ mùnì ga á twĩ̀ sǔbri pɔ tũ̀twĩ̀ĩ̀ rí Esərayɛl lyì byǎ bɛ́ púlə́púlə́ yó Cinu yé né, á m'á vùr bə̀ yə̀-bəlɔ̀lɔ́ wá. ¹⁸ Bə̀ gə́ y'à yə̀ mə̀ jal mɔ́ zə bə m'e vò Cinu jì y wẽ́ mó ce, á y'ǎ mə̌ sə á dɔ̃̀ mə̀ nàmá bɛ́ jàà kɛ̀bɛ́ bə̀ cír rə̀myɛ́ mɔ́ yil mú wẽ́ ǹdə à gə́ y'à pɔ nyí ní.» ¹⁹ Aarɔ̃ zɔ̀m ǹdə́ Muyiisi n wɔ̀: «Cili, nyǐ yò w kɔ̀bɔ́ ò nɔ àmyɛ́ zà mɔ́, dɛ̃ rɛ́ tɛ̀bɛ́ bə̀ zwə́l yə̀-bəlɔ̀lɔ́ sǔbri lwə̌l vwĩ̀ rí ǹdə́ vwĩ̀ námpúm cɛ̃́ɛ̃́ rɛ́ Cinu yé né mó. Cinu nə yà ń mà n shɛ̀nɛ́ a dɔ̃̀ yə̀-bəlɔ̀lɔ́ sǔbri lwə̌l vwǎm mɔ́ bə̀ zwə́l nàmá bɛ́ dɛ̃ rɛ́ rə̀myɛ́ mɔ́ zhə̀nà?» ²⁰ Muyiisi já n swéné kɔn rɛ́ tɛ̀bɛ́ ń nyɛ̀ɛ̀ mɔ́.