¹ Sə pyǎ bɛ́ byɛ̀bɛ́ gakó bə̀ y'à ŋwɛ́nɛ́ Zhɔrdɛ̃ bwǐ y yi-zùr sõ mó, pyàr rɛ́ nyí rí wẽ́, pyàr rɛ́ kùr w pyǎlsɛ́ nyí rí wẽ́ ǹdə́ byɛ̀bɛ́ bə̀ y'à jě bə twèlé Mədətərəne y vɔ̃̀ w nɛ, Lyəbã yala nɛ mɔ́, è n'ê yǎl e wɔ̀ Yititibá, Amɔrətibá, Kanaã lyì bí, Pərəzhitibá Yivyitibá, Zhəbuzhitibá pyǎ bɛ́, ² ce nyí dwã wa bə̀ la m'e tó dwã bə bú ǹdə́ Zhozwe ǹdə́ Esərayɛl lyì byǎ bɛ́. ³ Gabaɔ̃ lyì bí nyɛ̀ɛ̀ kɔn dɛ̀bɛ́ Zhozwe wɛ̀rhɛ́ Zheriko ǹdə́ Ayi ni; ⁴ bə̀myɛ zɛ̃̀ bə pyà surhə: bə̀ lyə́r bə̀ cìnə̀ mùnì ga bə̀ bə̀k'á lwar bə̀ pár yé bə̀ pwà ywə́ə́le nándwə́ ǹdə́ sɛ̃́ bɔ̀lsɛ̀ nándwə́rh sə̀ kǎr kǎr bə nyɛl nyɛl bə zhĩ bə̀ bə̀nesé ne; ⁵ bə pwà nə̀-cìl-dwə́ nə̀ nyɛl nyɛl bə ce, bə zɛ̃̀ bə zù kàmə̀-zù-dwə́rh; búrú w kɔ̀bɔ́ bə̀ y'à co bə̀ byẽ́ sɔ́má kǒ yil mú gakó y'à wɔ́ búr-eywaalɛ nánkùlsì. ⁶ Bə̀ zhə̀l bə vò bə nə Zhozwe Jələgal zulə́ jàà y wa, bə wɔ̀ ńmyɛ̌ ǹdə́ Esərayɛl lyì byǎ bɛ́ bala bɛ́ nɛ: «Nə́ shí tənà kɛ̀bɛ́ è nyɛ wẽ́. Nə́ n'ê lwə̀l ába b'ǎ shɛ̀nɛ́ a zə dɔbrɛ ǹdə́ nə́ba.» ⁷ Esərayɛl lyì byǎ bɛ́ bala bɛ́ zɛ̃̀ bə wɔ̀ Yivyitibá nɛ: «dədɛ̌nnɛ, á jě nə́ cəcəl wə, etər nə́ m'ǎ tó né nə́ zə dɔbrɛ ǹd'ába?» ⁸ Sə bə̀ wə̀l Zhozwe ne: «Nə́ wɔ́ ǹ tùntùnnə.» Zhozwe zɛ̃̀ n bwə̀rh bè n wɔ̀: «Byɛ̌ lyì ǹd'ába? Yẽ̀ á shí ní?» ⁹ Bə lyár mɔ́ bə wɔ̀: «Ǹ tùntùnnə bé shí tənà kɛ̀bɛ́ è nyɛ dɛ̃́dɛ̃́ wẽ́, Cinu ǹ Yi rí yilə, bə̀ nə́ nyɛ̀ɛ̀ bə̀ gə́ n'ê zɔ̀m ń yil ré rə̀ du mú yò né. Nə́ nyɛ̀ɛ̀ kɔn dɛ̀bɛ́ gakó ń wɛ̀rhɛ́ Ezhibti ní ¹⁰ ǹdə́ kɔn dɛ̀bɛ́ gakó ń wɛ̀rhɛ́ Amɔrətibá pyǎ bɛ́ bə̀lyè y bə̀ y'à ŋwɛ́nɛ́ Zhɔrdɛ̃ bwǐ y èpákɛ̀ mɔ́ nɛ: Eshəbɔ̃ pyɔ̌ Səwɔnɛ ǹdə́ Bashã pyɔ̌ Oge ń yà ń jě Ashətarɔtɛ nɛ́ mɔ́. ¹¹ Nə́ náncɛsɛ́ ǹdə́ nə́ tənà y lyì bí gakó wə̀l nə́ba: ‹Tɛnɛ-na kùjú á ce á byẽ́ sɔ́má kǒ yilə; zhəl-nə á nə bɛ s'á wɔ̀ bɛ̀: nə́ wɔ́ á tùntùnnə.› Rə̀myɛ́ yilə, shɛ̀nɛ́-na á zə dɔbrɛ ǹdə́ nə́ba èlǎsɛ̃́. ¹² Nyǐ nə́ búrú wə́: ò y'à wɔ́ bárhɛ́ nə́ gə́ co w nə́ byẽ́ nə́ sõ kǎlsɛ́ w yi ní, dɛ̃ rɛ́ tɛ̀bɛ́ nə́ shə́r nə́ bàn á sõ mó; èlǎsɛ̃́, nyǐ wə, ò jǐrh yəywaal-kùlsì. ¹³ Sɛ̃́ bɔ̀lsɛ́ shɛ̀bɛ́ nə́ y'ǎ ce sə sú ǹdə́ sə̀ y'à gwẽ̌ wɔ́ nándùrh mú, nyǐ si sə̀ kǎr kǎr; nyǐ nə́ kàmə̀zwìísí ǹdə́ nə́ nə̀cìlə̀ né, rə̀ jú kókó sɔ́má nyɛn rɛ́ dɛ̃́dɛ̃́ mɔ́ yilə.» ¹⁴ Esərayɛl lyì byǎ bɛ́ zwẽ bə̀ wẽ̀ ré bə̀ y'à co bə̀ byẽ́ mó, e jà bə̀ yə̀ pyà sə bə sú Cinu Yi cəl yé. ¹⁵ Zhozwe shɛ̀nɛ́ bə ce dwã yó ǹdə́ bɛ n zɛ̃̀ n zə dɔbrɛ ǹdə́ bɛ; dɔbrɛ́ rə̀myɛ́ ce bə mə̌ sə bə yẽ̌ be nã́nyìrh. Dwí rí yé né cìnə́ bé gakó dwĩ̀ nyí rí rə̀myɛ́ mɔ́. ¹⁶ Sə gə́ shɛ̀nɛ́ bə zə dɔbrɛ ǹdə bɛ, dwã nə̀tɔ̀ kwã nɛ́, bə̀ tú bə nyɛ̀ɛ̀ bə̀ lyì bí bə̀myɛ́ mɔ́ wɔ́ bə̀ jə̀-dwã, bə̀ ŋwɛ́nɛ́ bə̀ cəcəl wə. ¹⁷ Bə zɛ̃̀ bə vò bə zù bə̀ cɛmɛ nɛ́ nə̀ y'à wɔ́ Gabaɔ̃, Kəfyəra, Bɛɛrɔɔtɛ ǹdə́ Cərəyatɛ-Yərim mɔ́ wẽ́. ¹⁸ Sə bə̀ yə̀ be gwi yé, dwí rí yé né cìnə́ bé gə́ y'à dwĩ̀ nyí ǹdə́ Cinu, Esərayɛl lyì byǎ bɛ́ Yi rí yil ré, bə̀ bə̀ t'â la bɛ gu mú yilə. Sə dwí rí púlə́púlə́ ŋwúŋwùní ǹdə́ yé né cìnə́ bé. ¹⁹ Yé né cìnə́ bé gakó zɛ̃̀ bə wɔ̀ dwí rí púlə́púlə́ ne: «Nə́ dwĩ̀ nyí ǹdə́ bɛ ǹdə́ Cinu Esərayɛl lyì byǎ bɛ́ Yi rí; nə́ k'é wàr bɛ lwɛlɛ nə́ m'ǎ wɛ̀rhɛ́ gaga yé. ²⁰ Nyǐ kɔn dɛ̀bɛ́ nə́ m'ǎ wɛ̀rhɛ́ bɛ mɔ́: nə́ m'ǎ yẽ̌ be bə gwẽ̌ zə myə̌l, mùnì ga lyi-shùùrì bə̀k'á ló nə́ yó wə nyí rí nə́ dwĩ̀ bə̀ shò kwã nɛ́ mɔ́ yil yé.» ²¹ Yé né cìnə́ bé gə́ wò bə̀ bə̀ yẽ̌ be bə gwẽ̌ zə myə̌l bə̀ shò kwã nɛ́ mɔ́, bə j'á jǐrh də̀-lwərnə ǹdə́ nə̀-mɔnna dwí rí púlə́púlə́ yilə, ǹdə yé né cìnə́ bé gə́ y'à byili bi ní mó. ²² Zhozwe zɛ̃̀ n byẽ̀ bè, n wɔ̀ bɛ̀: «Byè yilə á jɛ́jɛ̀rɛ́ nə́ba, á wɔ̀ b'ǎ gə́ shí má jàà y nyɛ dɛ̃́dɛ̃́ e jà á jě nə́ cəcəl wə? ²³ Kɔn zhí zà è m'é la gaga, lwɛlɛ tu á kwã nɛ́; á mə̀dù ga myɛ wàr ń mà n yə̀ kɔn dõ ǹdə́ è gə də̀ yə-bal yé. Á m'ǎ yə̀ də̀-lwərnə ǹdə́ nə̀-mɔnna dúdú, à Cinu Yi jì y yilə.» ²⁴ Bə zɛ̃̀ bə lyár Zhozwe: «Nə́ dùr á ywẽ dɛ̃́dɛ̃́, wɔ́ rə̀myɛ́ è ce nə́ wɛ̀rhɛ́ èta: twər nánzhəzhɔ̌ bə y'à tú bə cĩ́ nə́myɛ̌ ǹ tùntùnnə bé ne, nyí rí ǹ Cinu Yi rí yà ń pɔ ń tùntùnnə Muyiisi ni mú. Ń byili bə̀ ń la ába tənà y púlə́púlə́ pɔ, sə n gu è lyì bí gakó á yé né. ²⁵ Èlǎsɛ̃́, nyǐ nə́ba ǹ jɔ̃̀ wa, wɛ̀rhɛ́ nə́ba ǹdə kɔn gə́ càn e jà rə̀ mǎ ǹdə́ mɔ́ nɛ́.» ²⁶ Zhozwe zɔ bɛ èta, sə ń zwẽ be jɔ̃̀ wà, bə̀ yə̀ be gwi yé. ²⁷ Kɔn zhì dɛ̃ rɛ́ rə̀myɛ́ e m'e yí zà, ń ce bə jǐrh də̀-lwərnə, nə̀-mɔnna dwí rí ǹdə́ Cinu Yi vwĩ̀-jùlú w yilə, jàà y kɛ̀bɛ́ Cinu Yi la cír mú wẽ́.