¹ Rə̀myɛ́ kwã nɛ́, Cinu Yi wò Zhozwe ne: «Bə̀k'á dùr ywẽ yé, sə ǹ wu bə̀k'á ga myɛ yé. Zɛ̃̀ n zə lyì bí byɛ̀bɛ́ gakó ǹ tɛnɛ búlə́ né bú yil mú, ń vò ń bú ǹdə́ Ayi lyì bí. Nyì wé, à co Ayi pyɔ̌ mɔ́ ǹdə́ ń lyi bí ǹdə́ ń cɔ w e súlí ń tənà y ǹ jɔ̃̀ wa. ² Ǹ m'ǎ wɛ̀rhɛ́ Ayi ǹd'ô pyɔ̌ mɔ́ ǹdə ǹ gə́ wɛ̀rhɛ́ Zheriko ǹd'ô pyɔ̌ mɔ́ nɛ́. Sə á wɔ̌ á m'ǎ pwà wẽ̀ ré ǹdə́ vwàmá nɛ́ búlə́ né kwã nɛ́, á cìcì yilə. Tɛnɛ ǹ gə́ m'ǎ shèè ń tó cɔ w kwã nɛ́ ń bú ǹdə́ w nɛ́ mɔ́ ń cĩ́.» ³ Zhozwe já n zɛ̃̀ ńmyɛ̌ ǹdə́ lyì bí byɛ̀bɛ́ gakó ń tɛnɛ búlə́ né bú yil mú, ń la n vò n bú ǹdə́ Ayi. N cír bala mɔ̀ɔ̀rhɛ̀ shí-etɔ̀, shə̀dɛ́-byərh, n zɛ̃̀ n twĩ̀ bì ǹdə́ cəcɛ̃. ⁴ Ń yà ń pɔ bɛ nyí n wɔ̀: «Nyǐ-nə á la vò á shèè á tó cɔ w kwã nɛ́ á m'á bú ǹdə́ wa; á bə̀k'á twẽ̌ ò yala nɛ á vò pyépyé dɛ̃́dɛ̃́ yé; s'á gakó tɛnɛ á zhì. ⁵ Àmyɛ́ ǹdə́ lyì bí byɛ̀bɛ́ gakó bə̀ ŋwɛ́nɛ́ ǹdə́ nɛ mó, nə́ m'ǎ vò nə́ bwəlse cɔ w nɛ. Ò lyì bí gə du bə̀ la nə́ba jəl, nə́ m'ǎ dùr bə̀ yé né, ǹdə twər nã́yéé ré ta. ⁶ Sə bə̀ m'à du bə pú nə́ kùrə̀, kɔn b'e yí nə́ zə bɛ́ nə́ du cɔ w wa, nə́ yí pyépyé; bə̀ bə̀ m'à wɔ̀ dwã nɛ: ‹Bə̀ n'ê dùr nə́ yé né ǹdə twər nã́yéé ré ta›; sə́ nə́ m'ǎ dùr bə̀ yé né. ⁷ Rə̀myɛ́ yi ní, ámyɛ̌ m'ǎ sàrh á shòò jàà y wẽ́, á zɛ̃̀ á zù á zwẽ cɔ wa, Cinu á Yi rí co w á jɔ̃̀ wa. ⁸ Á gə tú á zwẽ wə, s'á ji w myǐn; á m'ǎ wɛ̀rhɛ́ ǹdə Cinu Yi gə́ pɔ nyí ní. Wɔ́ nyí rí rə̀myɛ́ à n'â pɛ ába.» ⁹ Zhozwe ce bə zɛ̃̀ bə vò bə̀ shòò jàà y wẽ́. Bə̀ zhə̀l bə vò bə jòm Bətɛl ǹdə́ Ayi bwə̌l mó wə, Ayi cɔ w yi-zùr səta. Zhozwe mɛ̃ n zɔ̃̀ dwí rí cəcəl wə cəcɛ̃ y èmyɛ́ mɔ́. ¹⁰ N dùlí n zɛ̃̀ nəkɔkɔ́lɛ́ shãã shãã, n byɛ́lɛ́ rɛ. Ńmyɛ̌ ǹdə́ Esərayɛl lyì byǎ bɛ́ lyì bí náncɛsɛ́ yə̀ rə̀ yé né bə shə́r bə̀ la vò bə bú ǹdə́ Ayi. ¹¹ Lyì bí byɛ̀bɛ́ gakó bə̀ y'à tɛnɛ búlə́ né bú yil mú, bə̀ y'à ŋwɛ́nɛ́ ǹdə́ mɔ mɔ́, tó mo bə vò bə bwəlse cɔ w yé né; bə zɛ̃̀ bə zul Ayi jə̀-gwã̀ sõ. Nə̀-gɔ̀lɔ̀ y'à ŋwɛ́nɛ́ bə̀myɛ́ ǹdə́ Ayi cəcəl wə. ¹² Zhozwe vùr bala bə yí ǹdə mɔ̀ɔ̀rhɛ rə̀nu ta, n ce bə shèè Bətɛl ǹdə́ Ayi bwə̌l mó wə, Ayi cɔ w yi-zùr sõ. ¹³ Dwí rí zul Ayi jə̀-gwã̀ sõ, kwã-púrnə-shə̀dɛ́ɛ́sɛ́ zul cɔ w yi-zùr sõ. Zhozwe zɔ̃̀ pyə̀-gɔ́rɔ́ w wẽ́ cəcɛ̃ y èmyɛ́ mɔ́. ¹⁴ Ayi pyɔ̌ mɔ́ gə́ nɔ rə̀myɛ́, ńmyɛ̌ ǹdə́ ń dwí rí púlə́púlə́ ǹdə́ cɔ w lyì bí, zɛ̃̀ làlà bə du bə̀ la vò bə bú ǹdə́ sə-jɔrhɔ́ w yó, Araba yé né. Ń yà ń yə̀l bə̀ bə̀ y'à tɛnɛ bə shèè cɔ w kwã bə̀ la m'e bú ǹdə́ mɔ yé. ¹⁵ Zhozwe ǹdə́ púlə́púlə́ yẽ̌ bə jì bi, bə zɛ̃̀ bə dùr bə̀ yé né bə zǎ èpòlò w səta. ¹⁶ Bə byẽ̀ cɔ w lyì bí púlə́púlə́ bə ce bə̀ kwã nɛ́, mùnì ga bə jì bi. Bə jì Zhozwe, sə rə̀myɛ́ zɔ bɛ bə du cɔ w wa, bə yí jàà kɛ̀bɛ́ è nyɛ wẽ́. ¹⁷ Lò mə̀dù ga yə̀ Ayi ǹdə́ Bətɛl nɛ́ mɛ̃, ń yə̀ dwi n tó n pú Esərayɛl lyì byǎ bɛ́ kùr yé. Bə̀ cɔ w bwə̀ə̀lé y'à pul bə̀ gə́ y'à tú bə̀ pú kùrə̀ bə̀ n'ê jì yí ní. ¹⁸ Cinu Yi zɛ̃̀ n wɔ̀ Zhozwe ne: «Cìì swé ré ǹ jɔ̃̀ w mɔ́ ń mə zǎ Ayi cɔ w, b'à la w ǹ jɔ̃̀ w co.» Zhozwe cìì swé ré ń jɔ̃̀ w mɔ́ n zǎ Ayi səta. ¹⁹ Ń gə́ cèlè ń jɛ̃̀ y yi ní, bala bɛ́ byɛ̀bɛ́ bə̀ y'à shèè mó j'á sàrh làlà bə du bə̀ shòò jàà y wẽ́, bə dùr bə zù cɔ w wa, bə zwẽ w; bə yə̀ làlà bə ji w myǐn. ²⁰ Ayi lyì bí pyìrhí bə nyǐ: bə púrí cɔ w nyɛ̀rh sə̀ la yi wə. Lò mə̀dù ga myɛ yà ń kə́ ń bə jàn zhe ń la dùr ǹ vò jàà kə̀l kə̀l wẽ́ yé. Esərayɛl lyì byǎ bɛ́ byɛ̀bɛ́ bə̀ y'à n'ê dùr bə̀ la èpòlò w səta mɔ́ pyìrhí bə̀ k'â bàn Ayi lyì bí byɛ̀bɛ́ bə̀ y'à pú bə̀ kùr bə̀ n'ê jì bi mú səta. ²¹ Zhozwe ǹdə́ púlə́púlə́ púrí lyì bí byɛ̀bɛ́ bə̀ y'à shèè mó zwẽ cɔ wa, nyɛ̀rh myɛ n'ê dwi cɔ w wa sə̀ la dɛ̃̌; bə k'á kwɛ̃̀ bə̀ bə bə bú ǹdə́ Ayi lyì bí. ²² Bə̀ dwã bɛ́ shí cɔ w wẽ́ bə du bə b'è jəl be; Ayi lyì bí y'à zɛ̃̀ bə̀ ŋwɛ́nɛ́ cəcəl wə: bə̀ byɛ̀bɛ́ y'à ŋwɛ́nɛ́ èpákɛ̀, byɛ̀bɛ́ myɛ ŋwɛ́nɛ́ èpá dõ mó. Esərayɛl lyì byǎ bɛ́ gu bi: lò mə̀dù ga myɛ yə̀ dùr n lú yé, mə̀dù ga myɛ yə̀ dàl nã́nyì yé. ²³ È gə wɔ́ Ayi pyɔ̌ mɔ́ yilə, bə̀ zɔ ńmyɛ̌ nã́nyì bə̀ m'e vò bə pə Zhozwe ne. ²⁴ Esərayɛl lyì byǎ bɛ́ gə́ tú bə gu Ayi lyì bí púlə́púlə́ gɔ sõ, èpòlò w kɔ̀bɔ́ Ayi lyì bí y'à jì bi bə m'e vò ò wẽ́ mó bə zhɛ̀, bə̀ gə́ gu bə̀ gakó lyə́m lyə́m ǹdə́ búlə́-shìmì bə zhɛ̀, bə̀ púlə́púlə́ k'á kwɛ̃̀ bə bə̀ Ayi, bə gu lyì bí byɛ̀bɛ́ bə̀ dàl mɔ́ gakó ǹdə́ búlə́-shìmì. ²⁵ Lyì bí byɛ̀bɛ́ gakó bə cù dɛ̃ rɛ́ rə̀myɛ́ yù w mú yàl nunə mɔ̀ɔ̀rhɛ̀ shí ǹdə́ rə̀lyè, bala ǹdə́ kana ga; bə̀ gakó y'à wɔ́ Ayi lyì. ²⁶ Zhozwe yə̀ ń jɛ̃̀ y kɛ̀bɛ́ ń yà n mə n cìì swé ré mó kwẽ̀ yé, è gə də̀ ń gə́ gu Ayi lyì bí gakó n zhɛ̀ Cinu Yi yil mú kwã nɛ́. ²⁷ Sə pwà cɔ w vwàmá nɛ́ ǹdə́ búlə́ wẽ̀ ré, rə yə̀ bə̀ cəl, ǹdə Cinu Yi gə́ yà ń pɔ nyí Zhozwe ne né. ²⁸ Zhozwe ji Ayia myǐn, n ce cɔ w gakó jǐrh jì-bwə̀r, jàà kɛ̀bɛ́ lòlò kə́ ń tɛ̀nɛ́ è wẽ́ mó; jàà y èmyɛ́ gwẽ̌ ŋwɛ́nɛ́ zà zà. ²⁹ È gə wɔ́ Ayi pyɔ̌ mɔ́ yilə, ń ce bə tɔ̌r mɔ cǒ yó, n mɛ̃ gàà kɔn b'e yí də̀dɛ̀nɛ́. Sə yi rí gə́ tú rə zù kwã nɛ́, Zhozwe pə nyí bə só ń cù w tɛ̃́ cǒ w yó. Bə ji w tɛ̃́ cɔ w bwə̀rə̀ y nyí ni, bə zɛ̃̀ bə ló nə́kul-púl nánfɔ̀lɔ̀ ò yó; nə́kul-púl ré rə̀myɛ́ gwẽ̌ ŋwɛ́nɛ́ zà zà. ³⁰ Zhozwe zɛ̃̀ n lù vwĩ̀-jùlú* Cinu Yi, Esərayɛl lyì byǎ bɛ́ Yi rí yilə, Ebal pyɔ̀ w yó ³¹ kɔn tó ǹdə Cinu Yi tùntùnnə Muyiisi nyí rí ń yà ń pɔ nɛ mɔ́ nɛ, ǹdə rə̀ gə́ y'à kɛ̃ Muyiisi Nyə́ né sɛ́bɛ́ rɛ́ wẽ́ né: vwĩ̀-jùlú òmyɛ́ lù ǹdə́ nə́kulə nyɛ̀bɛ́ lù ku yə̀ sə̀l. Bə cĩ́ vwə̃̀ námpúmə́ cɛ̃́ɛ̃́ rə̀ yó bə pə Cinu Yi ni; bə súlí bə pə yə̀-zùlə́ vwə̃̀. ³² Zhozwe zɛ̃̀ n kə́ n kɛ̃ Nyə́ né Muyiisi yà ń kɛ̃ n pə nɛ mɔ́, nə́kulə né yó n pə bɛ. ³³ Esərayɛl lyì byǎ bɛ́ púlə́púlə́ ǹdə́ náncɛsɛ́ ǹdə́ nyə́ né byilnə bé ǹdə́ bùr-kárna bɛ́, e súlí zhələ bé ǹdə́ tənà y cìcì lyì bí y'à zhǐ dɔbrɛ́ kùlkṍ w jə̀-jĩ́ ǹd'ô jə̀-gwã̀ ga sõ. Bə̀ y'à zhǐ vwĩ̀-zwə́lnə bé, bə̀ wɔ́ Levyitibá bə̀ zhĩ Cinu Yi dɔbrɛ́ kùlkṍ w yé né. Bə̀ kə̀kàlà y èdù y'à zhǐ Gərəzhim pyɔ̀ w yé né, bə̀ kə̀kàlà y dõ mó zɛ̃̀ è y'à zhǐ Ebal pyɔ̀ w yé né. Kɔn tó Cinu Yi tùntùnnə Muyiisi nyí rí ń yà ń pɔ shãã ga Esərayɛl lyì byǎ bɛ́ dwí rí bwəl cṹ yilə. ³⁴ Rə̀myɛ́ kwã nɛ́, Zhozwe kàrmə̀ Nyə́ né zɔ̀mà nɛ́ gakó, bwəl náàcɛ̀nɛ́ ǹdə́ bwəl námbəlwɛ̀lɛ́ ga, ǹdə rə̀ gə́ kɛ̃ Nyə́ né sɛ́bɛ́ rɛ́ wẽ́ né gakó. ³⁵ Zɔ̀mɛ̀ rə̀dù ga tɛ̀nɛ́, nyɛ̀bɛ́ gakó Muyiisi yà ń byili mú wẽ́, Zhozwe yə̀ kàrmə̀ Esərayɛl lyì byǎ bɛ́ bə̀ y'à tú dwã yó mó gakó yé né yé; e súlí kana bɛ́ ǹdə́ bə̀sɔ́ná bɛ́ ǹdə́ zhələ byɛ̀bɛ́ bə̀ y'à ŋwɛ́nɛ́ bə̀ cəcəl w mɔ́ yé né yé.