¹ Akã dówə́ kɔn rɛ́ tɛ̀bɛ́ bə̀ y'à mə̌ sə bə cɔ̀ lyə́m lyə́m Cinu Yi yil mú shò kwã nɛ́. Bal mə̀dù ń yà ń yil Akã co jɛ̃̀ kɔn rɛ́ rə̀myɛ́ mɔ́ wẽ́. Rə̀myɛ́ ce Cinu Yi lyim zɛ̃̀ dɛ̃́dɛ̃́ rə̀ n'ê yì ǹdə́ Esərayɛl lyì byǎ bɛ́. Akã yà ń wɔ́ Zhəda kwálá y lò mə̀dù, Kərəmyi byǐ, Zhəbədi nɔ̃̌, ń nàmbal mɔ́ yà ń yíl Zhɛraa. ² Zhozwe zhì Zheriko né n twĩ̀ bala Ayi ní n wɔ̀: «Zhəl-nə á zə surhə á byɛ́lɛ́ tənà yá.» Ayi y'à ŋwɛ́nɛ́ Bɛtɛ-Awɛn yala nɛ, ǹ gə ŋwɛ́nɛ́ Bətɛl nɛ́, è y'à ŋwɛ́nɛ́ yi-púrhí sõ. Bə lyɛ̃ bə vò bə byɛ́lɛ́ ya. ³ Bə shí gàà bə kwẽ̀ bə b'e wɔ̀ Zhozwe ne: «Dwí rí púlə́púlə́ bə̀k'á vò búlə́ né bú yil yé. Bala mɔ̀ɔ̀rhɛ̀ rə̀lyè ráá mɔ̀ɔ̀rhɛ̀ rə̀tɔ̀ m'à vò bə bú ǹdə́ Ayi. Bə̀k'á pə lyààrɛ̀ rə̀myɛ́ dwí rí púlə́púlə́ ne yé, b'è lyì bí bə já yé.» ⁴ Bala bə̀ y'à yú ǹdə mɔ̀ɔ̀rhɛ̀ rə̀tɔ̀ ta, shə́r dwí rí wẽ́ bə vò Ayi, sə bə̀ dùr Ayi lyì bí yé né. ⁵ Ayi lyì bí gu Esərayɛl lyì byǎ bɛ́ lyì bə yí ǹdə́ shí-ɛ̀tɔ̀ ǹdə́ bwə̀ldù ta; bə súlí bə jì bì bə lyɛ̃ cɔ w bwə̀rə́ y nyí rí bə m'e yí Shebərəyim sə bə̀ gu bi bə̀ gə́ tú bə̀ n'ê swé bə̀ bàn Zheriko səta yi ní. Esərayɛl lyì byǎ bɛ́ wun zɛ̃̀ dɛ̃́dɛ̃́ bə̀ wun gə kókó. ⁶ Zhozwe ǹdə́ Esərayɛl lyì byǎ bɛ́ náncɛsɛ́ kǎr bə̀ gàndɛ́, bə pwà shó bə ló bə̀ yə́-pǎlsɛ́ wa, bə tu bə zə bə̀ yə́rh bə pú tɛ̃́ Cinu Yi kùlkṍ w yé né kɔn b'e yí də̀dɛ̀nɛ́a. ⁷ Zhozwe zɛ̃̀ n wɔ̀: «Nyì wé Cinu Yi, byè yil ǹ ce dwí rí byɛrhɛ Zhɔrdɛ̃ bwǐ yə́? Wɔ́ mùnì ga ń yẽ̌ nə́ba ń ce Amɔrətibá jɔ̃̀ wa sə ń mə ce nə́ jé tɛ̃́ yilə? Nə́ gə y'ǎ wò bə̀ nə́ b'ǎ mɛ̃ Zhɔrdɛ̃ bwǐ y èpákɛ̀ y'à bə cɔ̃̀! ⁸ À n'â lwə̀l mó Cinu, Esərayɛl lyì byǎ bɛ́ gə́ zɛ̃̀ è dùr è zwə̀ bé yé né èta mɔ́, wɔ́ bə̀kɔ́n à la wál èlǎsɛ̃́? ⁹ Kanaã lyì bí ǹdə́ tənà y lyì bí gakó m'à nyɛ̀ɛ̀, bə̀ m'à zɛ̃̀ bə bú ǹdə́ nə́ba, sə bə̀ m'à ce nə́ yil ré jé tɛ̃́ tənà y wẽ́. Bə̀kɔ́n ǹ la ń zɛ̃̀ ń wɛ̀rhɛ́ ǹ yil ré rə̀ du mú yilə?» ¹⁰ Cinu Yi wɔ̀ Zhozwe ne: «Zɛ̃̀ dɛ̃̌! Byè yilə ǹ tu ń zə ǹ yé y ń pú tɛ̃́? ¹¹ dówə́ Bə̀ zhìlì à dɔbrɛ́ à y'à zɔ ǹdə́ bɛ mɔ́. Bə̀ zhə̀n ga co jɛ̃̀ kɔn rɛ́ tɛ̀bɛ́ bə̀ y'à mə̌ sə bə cɔ̀ lyə́m lyə́m à yil mú wẽ́; bə̀ gaga mɔ́ ŋwɔ̀l kɔn rə̀ wẽ́, bə̀ shèè rè, bə̀ co re bə̀ wẽ̀ ré wẽ́. ¹² Rə̀myɛ́ ce bə̀ k'ê wàr bə̀ m'à zhì bə̀ zwə̀ bé yé né yé, bə̀ m'a dùr bə̀ yé né, bə̀ bə̀ vwɛ̃ lwɛlɛ bə pə bə̀ cìn ni. Á gə yə̀ ce kɔn rɛ́ tɛ̀bɛ́ á y'à mə̌ s'á cɔ̀ lyə́m lyə́m à yil mú jé tɛ̃́ á cəcəl wə, à k'â t'â la nɛ́ yál ǹd'ába yé. ¹³ Zɛ̃̀ dɛ̃̌ ń tɛnɛ dwí rí à yilə. Ǹ m'ǎ wɔ̀ rɛ̀: ‹Tɛnɛ-na á cìn Cinu yilə, nəkɔl dɛ̃ rɛ́, bə wɔ́ Cinu, Esərayɛl lyì byǎ bɛ́ Yi rí ń nə́ ń wə̀lə̀: «Kɔn rɛ́ dɛ̀bɛ́ á y'ǎ mə̌ dwã s'á cɔ̀ à yil mú ŋwɛ́nɛ́ ǹ sõ Esərayɛl lyì byǎ bɛ́. Ǹ wàr ǹ mà ń zhì ǹ zwə̀ bé yé né gaga ǹdə́ è gə də̀ á vùr rè á cəcəl w yé.› ¹⁴ Nəkɔl nəkɔkɔ́lɛ́ yá, á m'ǎ twẽ̌ á bə̀ kwálá kwálá, sə kwálá y kɛ̀bɛ́ Cinu Yi la cír mú m'à e twẽ̌ e bə̀ jì jì; jì kɛ̀bɛ́ Cinu Yi la cír mú m'à twẽ̌ e bə̀ kɛ̀lɛ́ kɛ̀lɛ́, sə kɛ̀lɛ́ kɛ̀bɛ́ Cinu Yi la cír mú lyì bí m'à twẽ̌ bə bə̀ mə̀dù mə̀dù. ¹⁵ Bə̀ m'à ji lò mɔ̀bɔ́ ń co jɛ̃̀ kɔn rɛ́ rə̀myɛ́ wẽ́ mó myǐn, ńmyɛ̌ ǹdə́ kɔn dɛ̀bɛ́ rə̀ wɔ́ ń nyǎn mɔ́ gakó, ń gə́ zhìlì Cinu dɔbrɛ́, n súlí n twĩ̀ cìzhìl nánfɔ̀lɔ̀ Esərayɛl lyì byǎ bɛ́ nɛ́ mɔ́ yilə.» ¹⁶ Zhozwe dùlí n zɛ̃̀ nəkɔkɔlɛ́ shãã shãã, n ce Esərayɛl lyì byǎ bɛ́ twẽ̌ e bə̀, kwálá kwálá sə tántɛ́ɛ́ y zɔ Zhəda kwálá yá. ¹⁷ N zɛ̃̀ n ce Zhəda kwálá y twẽ̌ e bə̀ jì jì, sə tántɛ́ɛ́ zɔ Zhɛraa jì yə́. N ce Zhɛraa jì y twẽ̌ e bə̀, kɛ̀lɛ́ kɛ̀lɛ́, sə tántɛ́ɛ́ y zɔ Zhəbədi kɛ̀lɛ́ yá. ¹⁸ N zɛ̃̀ n ce Zhəbədi kɛ̀lɛ́ y lyì bí twẽ̌ bə bə̀ mə̀dù mə̀dù. Tantɛ́ɛ́ y zə Kərəmyi byǐ Akã, Zhəbədi nɔ̃̌ wá, ń nàmbal mɔ́ yà ń yíl Zhɛraa. ¹⁹ Zhozwe zɛ̃̀ n wɔ̀ Akã nɛ: «À byǐ, cèrhé Cinu Yi, Esərayɛl lyì byǎ bɛ́ Yi rí, sə́ ji ń yə̀-bya; cĩ́ ni kɔn dɛ̀bɛ́ gakó ǹ wɛ̀rhɛ́ mɔ́, bə̀k'á shèè ǹ wu yé.» ²⁰ Akã lyár Zhozwe n wɔ̀: «Zhə̀nà, wɔ́ àmyɛ́ à gwar Cinu Yi, Esərayɛl lyì byǎ bɛ́ Yi rí. Nyǐ à gə́ wɛ̀rhɛ́ ma: ²¹ À y'à nɔ Shənəyarɛ kàmə̀zù-fwɛ̀lɛ̀ búlə́ wẽ̀ ré wẽ́, è cɛ̀nɛ̀ rɛ́ y'à bə dõ zhe yé, ǹdə́ sə̀byì-kùlsì zwã̌-èlyè, ǹdə́ sánə́má mə̀ dùmì rí y'à yú ǹdə sə̀byì-kùlsì shí-ènu dùmì ta; rə̀ bwɛ̃̌ zɔ nɛ a zɛ̃̀ a pwà rɛ̀. À shèè rè tɛ̃́, à kòrhó w cəcəl ré wə, sə̀byǐ mú ŋwɛ́nɛ́ rə̀ kùr wə̀.» ²² Zhozwe twĩ̀ tùntúmə́ bə dùr bə̀ vò kòrhó w wẽ́: bə̀ púrí zhə̀n ga wẽ̀ ré y'à shèè ń kòrhó w wẽ́, sə̀byǐ mú zɛ̃̀ mə̀ ŋwɛ́nɛ́ rə̀ kùr wə̀. ²³ Bə vùr wẽ̀ ré tɛ̃́ kòrhó w cəcəl wə, bə zə rə bə b'e pə Zhozwe ǹdə́ gakó ne: bə ló re tɛ̃́ Cinu Yi yé né. ²⁴ Zhozwe ǹdə́ Esərayɛl lyì byǎ gakó zə Zhɛraa byǐ Akã, bə súlí sə̀byǐ mú ǹdə́ kàmə̀-zù-fwɛ̀lɛ́ yá, ǹdə́ sánə́má mɔ́ nɛ bə m'e vò Akɔɔrɛ pyə̀-gɔ́rɔ́ w wẽ́. Bə̀ zə ń byǎ bɛ́ ǹdə́ ń bə̀kwá bɛ́ ǹdə́ ń nɔ̃ wá, ǹdə́ ń bə̀na yá, ǹdə́ ń vwàmá námpɔ́lsɛ́, ń kòrhó w ǹdə́ kɔn rɛ́ tɛ̀bɛ́ gakó rə̀ y'à wɔ́ ń nyǎn mɔ́ bə m'e súlí bə̀ vò gàà. ²⁵ Bə̀ gə́ yú gàà, Zhozwe wɔ̀ Akã nɛ: «Byè yil ǹ vwɛ̃ lwɛlɛ ń pə nə́ba? Cinu Yi mà n ce lwɛlɛ pú mú zà dɛ̃ rɛ́.» Rə̀myɛ́ yó, púlə́púlə́ dul mu ǹdə́ nə́kulə. Bə̀ dul be ǹdə́ nə́kulə bə súlí bə ji bi myǐn. ²⁶ Rə̀myɛ́ kwã nɛ́, bə̀ zɛ̃̀ bə cĩ́ nə́kul-púl ń yó, nə́kul-púl ré gwẽ̌ ŋwɛ́nɛ́ ǹdə́ zà gwẽ̌. Wɔ́ rə̀myɛ́ è ce bə̀ gwẽ̌ n'ê byẽ̀ jàà y èmyɛ́ mɔ́ zà bə̀ «Akɔɔrɛ pyə̀-gɔ́rɔ́.» Rə̀myɛ́ yó Cinu Yi lyim rí rə̀ y'à zɛ̃̀ rə̀ n'ê yì dɛ̃́dɛ̃́ mɔ́ k'á tu.