¹ Zheriko cɔ w bwə̀ə̀lé y'à sàásɛ cɛ̀nɛ̀ cɛ̀nɛ̀ yilə: lòlò yà ń tá ń shí ò wẽ́ ń dwi pwẽ̀ nè yé, lòlò myɛ yà ń tá ń zwì ò wẽ́ yé. ² Cinu Yi wɔ̀ Zhozwe ne: «Nyǐ à co Zheriko ǹd'ô pyɔ̌ mɔ́ ǹd'ô shə̀dɛ́-byesé ǹ jɔ̃̀ wa. ³ S'ámyɛ̌ bala bɛ́ byɛ̀bɛ́ gakó á wɔ̌ búlə́ né jàà wà á m'ǎ vò né mó, á m'ǎ vò á m'á kə́lɛ́lɛ́ cɔ w cã̌, twər rə̀dù dɛ̃ gakó. Á m'ǎ wɛ̀rhɛ́ èta dwã nyə̀ldù. ⁴ Vwĩ̀-zwə́lnə bwàlpyɛ̀ m'a zə pyì-byərh nyimi pɔ́lsɛa shàlpyɛ̀ bə m'e yə̀ kùlkṍ w yé né. Dwã nyàlpyɛ̀ dɛ̃ rɛ́ yùwə̀, á m'ǎ vò á m'á kə́kɛ́lɛ́ cɔ w cã̌ twər tàlpyɛ̀, sə vwĩ̀-zwə́lnə bé b'à wúl pɔ́lsɛ́. ⁵ Pyì-bya nyu pɔ́lá y gə tú è wúl, á gə tú á nyɛ̀ɛ̀ pɔ́lá y cəl ré, dwí rí púlə́púlə́ m'a mà búbwéé nánfwɛ̀lɛ̀ rə cẽ́. Cɔ w byílí y m'à wǔr e ló tɛ̃́ è jàà kùr ré yó. Sə rə̀myɛ́ yi ní, dwí rí púlə́púlə́ m'à zù cɔ w wẽ́ ǹdə́ búlə́ né, lò gakó já ǹ nə́ ǹ bwí ǹ yé né ǹ mə́ ǹ la.» ⁶ Nuuni byǐ Zhozwe zɛ̃̀ n byẽ̀ vwĩ̀-zwə́lnə bé n wɔ̀ bɛ̀: «Kwě-nə dɔbrɛ́ kùlkṍ w á zhĩ, sə vwĩ̀-zwə́lnə bwàlpyɛ̀ yə̀ ò yé né ǹdə́ pyì-byərh nyimi pɔ́lsɛ shàlpyɛ̀.» ⁷ N zɛ̃̀ n wɔ̀ dwí rí ni: «Lyɛ̃-na, á vò á m'á kə́kɛ́lɛ́ cɔ w cã̌, sə shə̀dɛ́ɛ́sɛ́ shɛ̀bɛ́ sə̀ n'ê yàl yé né mó yə̀ Cinu Yi kùlkṍ w yé né.» ⁸ Kɔn gakó yàl ǹdə Zhozwe gə́ yà ń byili dwí rí ni ní: vwĩ̀-zwə́lnə bé bwàlpyɛ̀ y bə̀ y'à zə pyì-byərh nyimi pɔ́lsɛ́ bə̀ m'ê ŋwɛ́nɛ́ Cinu Yi yé né mó lyɛ̃, sə bə̀ wúl pɔ́lá. Cinu Yi dɔbrɛ́ kùlkṍ w pú bə̀ kùrə̀. ⁹ Shə̀dɛ́ɛ́sɛ́ shɛ̀bɛ́ sə̀ n'ê yàl yé né mó y'à n'ê zhə̀l vwĩ̀-zwə́lnə bé bə̀ y'à n'ê wúl pɔ́lsɛ́ mɔ́ yé né, kwã-púrnə-shə̀dɛ́ɛ́sɛ́ zɛ̃̀ sə̀ n'ê zhə̀l kùlkṍ w kwã nɛ́. Zhəl mó y'à n'ê zhə̀l ǹdə́ pɔ́lsɛ́ n'ê wúlə́. ¹⁰ Zhozwe pə nyí dwí rí ni n wɔ̀: «Á t'á la búbwéé mǎ yé, á t'á la ce bə nyɛ̀ɛ̀ á cəl yé, á t'á la á nyí púr yé, kɔn b'e yí dɛ̃ rɛ́ tɛ̀bɛ́ à la ába nyí pɔ, éfòró á mà búbwéé á cẽ́.» ¹¹ Cinu Yi kùlkṍ w kə́kɛ́lɛ́ cɔ w cã̌ twər rə̀dù, bə k'á kwẽ̀ bə̀ b'e zɔ̃̀ bə̀ zulə́ jàà y wẽ́. ¹² Zhozwe dùlí n zɛ̃̀ nəkɔkɔ́lɛ́ shãã shãã. Vwĩ̀-zwə́lnə bé kwè Cinu Yi kùlkṍ w bə zhĩ. ¹³ Vwĩ̀-zwə́lnə bé bwàlpyɛ̀ y bə̀ y'à zə pyì-byərh nyimi pɔ́lsɛ́ shàlpyɛ̀ y bə̀ m'ê ŋwɛ́nɛ́ Cinu Yi kùlkṍ w yé né mó, k'ê zɛ̃̀ bə̀ n'ê zhə̀l ǹdə́ bə̀ n'ê wúl pɔ́lsɛ́. Shə̀dɛ́ɛ́sɛ́ shɛ̀bɛ́ sə̀ n'ê yàl yé né mó y'à n'ê zhə̀l bə̀ yé né, kwã-púrnə-shə̀dɛ́ɛ́sɛ́ zɛ̃̀ sə pú Cinu Yi dɔbrɛ́ kùlkṍ w kùrə̀. Zhəl mó y'à n'ê zhə̀l ǹdə́ pɔ́lsɛ́ n'ê wúlə́. ¹⁴ Bə̀ zhə̀l bə m'e kə́kɛ́lɛ́ cɔ w cã̌ twər rə̀dù, dwã nə̀lyè dɛ̃ rɛ́ yùwə̀, bə k'á kwẽ̀ bə bə̀ bə̀ zulə́ jàà y wa. Bə̀ wɛ̀rhɛ́ èta dwã nyə̀ldù. ¹⁵ Sə dwã nyàlpyɛ̀ dɛ̃ rɛ́ yùwə̀, bə̀ dámǎ bə zɛ̃̀ ǹdə́ yi rí gwẽ̌ yə̀ púrh yé, bə vò bə m'e kə́kɛ́lɛ́ cɔ w cã̌ ǹdə bə̀ gə́ yà n'ê wɛ̀rhɛ́ nɛ́. Sə wɔ́ dɛ̃ rɛ́ rə̀myɛ́ dúdú yù w bə̀ zhə̀l bə m'e kə́kɛlɛ́ cɔ w cã̌ twər tàlpyɛ̀. ¹⁶ Twər tàlpyɛ̀ y yó wə, vwĩ̀-zwə́lnə bé wúl pɔ́lsɛ́, Zhozwe zɛ̃̀ n wɔ̀ dwí rí ni: «mǎ-na búbwéé á cẽ́ bə̀ Cinu Yi co cɔ w á jɔ̃̀ wa. ¹⁷ Nə́ m'ǎ cɔ̀ cɔ w ǹdə́ kɔn dɛ̀bɛ́ gakó rə̀ ŋwɛ́nɛ́ ò wẽ́ mó lyə́m lyə́m Cinu Yi yilə. Kə-nə̀fòló Arayaabɛ dúdú ń mà n lú, ńmyɛ̌ ǹdə́ lyì byɛ̀bɛ́ gakó bə̀ m'à yə̀ ǹdə́ mɔ jù w mú, ń gə́ shèè tùntúmə́ bé byɛ̀bɛ́ nə́ y'ǎ twĩ̀ mú yilə. ¹⁸ È gə wɔ́ ámyɛ̌ yilə, s'á dɛ̃̀ á cìn á bə̀k'á kwè kɔn rɛ́ tɛ̀bɛ́ bə̀ mə̌ sə bə cɔ̀ lyə́m lyə́m Cinu Yi yil mú yé. È gə də̀ rə̀myɛ́ á m'ǎ vwɛ̃ lwɛlɛ á cĩ́ Esərayɛl lyì byǎ bɛ́ zulə́ jàà y yó wə á ce e jé tɛ̃́. ¹⁹ Sə̀byǐ mú gakó, sánə́má mɔ́ gakó, kɔn dɛ̀bɛ́ gakó bə̀ zùrhì ǹdə kàmmɔ ráá ǹdə cɔ̀bɔ́ m'à yə̀ Cinu Yi ń cǐ ri, sə bə̀ m'à ló re Cinu Yi nə̀cɛ̀ndɛ́ yó.» ²⁰ Zhozwe gə́ tú n pə nyə́ né nyɛ̀bɛ́ n zhɛ̀, dwí rí zɛ̃̀ rə mà búbwéé rə cẽ́, bə súlí bə wúl pɔ́lá. Rə̀ gə́ nyɛ̀ɛ̀ vwĩ̀-zwə́lnə bé pɔ́lsɛ́ cəl ré, rə mà búbwéé nánfwɛ̀lɛ̀ rə cẽ́. Cɔ w byílí y j'á wǔr e ló tɛ̃́ è jàà kùr ré yó. Bə j'á zù cɔ w wa ǹdə́ búlə́ né, lò gakó j'á nə́ ń bwí ń yé né ń mə́ ń la; sə bə̀ zwẽ cɔ wa. ²¹ Bə gu cɔ w lyì bí gakó ǹd'ô vwàmá nɛ́ gakó lyə́m lyə́m ǹdə́ búlə́-shìmì Cinu Yi yilə: bala, kana, ebwá, náncərh; nə̀-byərh, pyììsì, bènərh ²² Zhozwe zɛ̃̀ n wɔ̀ bala bɛ́ bə̀lyè y bə̀ y'à zhə̀l bə zə surhə bə byɛ́lɛ́ tənà y mɔ́ nɛ: «Zhəl-nə á zù kə-nə̀fòló w sõ jù wə̀ s'á vùr w ǹdə́ kɔn dɛ̀bɛ́ gakó rə̀ wɔ́ ò nyǎn mɔ́ á ce pwẽ̀ nè ǹd'á gə́ bwəl w nyí ní.» ²³ Ébwá-dàlá bɛ́ byɛ̀bɛ́ bə̀ y'à zhə̀l bə zə surhə bə byɛ́lɛ́ tənà y mɔ́, vò bə zù bə vùr Arayaabɛ, ǹdə́ ń da mɔ́, ǹdə́ ń ná mɔ́, ǹdə́ ń nəbwá bɛ́ ǹdə́ kɔn dɛ̀bɛ́ gakó rə̀ y'à wɔ́ ń nyǎn mɔ́ bə ce pwẽ̀ nè. Bə súlí bə vùr lyì bí byɛ̀bɛ́ gakó bə̀ y'à wɔ́ ń dwí rí lyì mú, bə vò bə cĩ́ bi jàà kɛ̀bɛ́ è y'à də̀ Esərayɛl lyì byǎ bɛ́ zulə́ jàà y wẽ́. ²⁴ Bə zɛ̃̀ bə ji cɔ w ǹdə́ kɔn dɛ̀bɛ́ gakó rə̀ y'à ŋwɛ́nɛ́ ò wẽ́ mó myǐn; è gə də̀ sə̀byǐ mú, e súlí sánə́má mɔ́ ǹdə́ wẽ̀ ré tɛ̀bɛ́ rə̀ y'à zùrhì ǹdə́ kàmmɔ ráá ǹdə́ cɔ̀bɔ́ mɔ́ dúdú bə̀ yə̀ myǐn ji yé. Bə̀ ló rə̀myɛ́ Cinu Yi jì y nə̀cɛ̀ndɛ́ yó. ²⁵ Zhozwe yẽ̌ kə-nə̀fòlò w Arayaabɛ nɛ ǹdə́ ń dwí lyì bí ni nã́nyìrh. Ń súlí n yẽ̌ kɔn dɛ̀bɛ́ gakó rə̀ y'à wɔ́ ń nyǎn mɔ́ nɛ. Arayaabɛ jòm cəcəl w kɔn b'e yí zà, ń gə́ yà ń shèè tùntúmə́ bé byɛ̀bɛ́ Zhozwe yà ń twĩ̀ bə vò bə zə surhə bə byɛ́lɛ́ Zheriko cɔ w mɔ́ yilə. ²⁶ Rə̀myɛ́ yi ní, Zhozwe ce bə dwĩ̀ nyí bə wɔ̀: «Cinu Yi mà n ce yò pú lò mɔ̀bɔ́ ń mà n zɛ̃̀ ń la Zheriko cɔ w kɔ̀bɔ́ lú mú. È m'à yə̀ ń byì-cɛ y ń la n mə n ce ò zhì dɛ̃̌ n zɛ̃̀ n zə ń byì-kwã y n mə n ce ò bwə̀ə̀lé né.» ²⁷ Cinu Yi yàl nɛ́ ǹdə́ Zhozwe sə Zhozwe yil ré y'à du tənà y púlə́púlə́ wə.