¹ Amɔrətibá pyǎ bɛ́ byɛ̀bɛ́ gakó bə̀ y'à ŋwɛ́nɛ́ Zhɔrdɛ̃ bwǐ y yi-zùr sõ mó, ǹdə́ Kanaã lyì pyǎ bɛ́ bə̀ y'à jě bə zǎ Nə̀-fɔ̀lɔ̀ w nɛ mɔ́ gakó nyɛ̀ɛ̀ bə̀ Cinu Yi ce Zhɔrdɛ̃ bwǐ y jǐrh cə-kùlì yé né, bə byɛrhɛ; sə wu-zɛ̃̀ɛ̃́ nánfɔ̀lɔ̀ zɔ bɛ yilə, bə̀ wun ga. ² Rə̀myɛ́ yi ní, Cinu Yi zɛ̃̀ n wɔ̀ Zhozwe ne: «Sə́l nə̀myìn-põ̀-dwèlsè nə́kul-põ̀ shǐsí, ń ká ń mə́ ń gõ̀.» ³ Zhozwe sə̀l nə́kul-põ̀ shǐsí n mə n gõ̀ jàà y kɛ̀bɛ́ bə̀ n'ê byẽ̀ bə̀ góm pyɛ̀lɛ́ y mɔ́ yó. ⁴ Nyǐ kɔn dɛ̀bɛ́ rə̀ ce Zhozwe gõ̀ be mó. Dwí rí tɛ̀bɛ́ gakó rə y'à shə́r Ezhibti ní mú, bala bɛ́ ǹdə́ bala bɛ́ byɛ̀bɛ́ gakó bə̀ y'à wɔ̌ búlə́ jàà w bə̀ m'à vò né gakó y'à cù sɔ́má yó, gɔ-elũ èpòlò w wə, bə̀ gə́ shə́r mó kwã nɛ́. ⁵ E jà dwí rí tɛ̀bɛ́ gakó rə̀ y'à shə́r Ezhibti ni mú y'à gòmə̀. Sə dwí rí lyì bí byɛ̀bɛ́ gakó bə̀ lùl sɔ́má yó, gɔ-elũ èpòlò w wə, Ezhibti ní shə́r mó kwã nɛ́ mɔ́, y'à yə̀ gòm yé. ⁶ Esərayɛl lyì byǎ bɛ́ zhə̀n ga zhə̀l gɔ-elũ èpòlò w wə byinə shí-ɛ̀na, kɔn b'e yí bala bɛ́ byɛ̀bɛ́ gakó bə̀ y'à wɔ̌ búlə́ jàà w bə̀ m'à vò né, bə̀ y'à shə́r Ezhibti ní mú, nyí rí gakó cì, bə̀ gə́ y'à yə̀ Cinu Yi cəl ré cili yilə. Cinu Yi yà ń zɛ̃̀ n bwəl nyí bə̀ bə̀ t'â la tənà y ń bwəl è nyí bə̀ dabá nɛ, bə̀ ń la nə́ba pɔ mɔ́, nɔ bə nyǐ yé; yil ǹdə́ tùr n'ê dùr tɛ̃́ tənà y èmyɛ́ mɔ́ wẽ́a. ⁷ Wɔ́ bə̀ byǎ bɛ́ ń cĩ́ bə̀ jàà y wa; sə wɔ́ bə̀myɛ́ Zhozwe gòmə̀, bə̀ gə́ y'à yə̀ gòm mó yilə; bə̀ y'à yə̀ be gòm sɔ́má yó yé. ⁸ Sə bə̀ gə́ tú bə gõ̀ bə̀ nyí rí púlə́púlə́ bə zhɛ̀, bə̀ mɛ̃ kùr yó, bə̀ zulə́ jàà y wa, kɔn b'e yí bə̀ wárh. ⁹ Cinu Yi zɛ̃̀ n wɔ̀ Zhozwe ne: «Zà dɛ̃ rɛ́, à byíbyílí Ezhibti cìzhìl nánfɔ̀lɔ̀ w á nyí ni á ce kwã nɛ́.» Wɔ́ rə̀myɛ́ e ce bə̀ j'á n'ê byẽ̀ jàà y èmyɛ́ mɔ́ bə̀ Jələgalb kɔn b'e yí zà. ¹⁰ Esərayɛl lyì byǎ bɛ́ zul Jələgal nɛ́, bə jí Pakɛ y cànà y dwã shí ǹdə́ nə̀na yùwə̀c də̀dɛ̀nɛ́ yi ní, jə́ y è bwə́l Zheriko ne mó wə. ¹¹ Pakɛ y zɛ̃̀ nəkɔkɔ́lɛ́ yá, bə̀ jú tənà y kùjú: búúri rə̀ yə̀ sã̀-nə̀byẽ̌ ce, e súlí jíjí ywẽ́ bə̀ wòwə̀, dɛ̃ rɛ́ rə̀myɛ̀ yù w cìcì. ¹² Sə bə̀ gə́ jú tənà y kùjú w zɛ̃̀ nəkɔkɔ́lɛ́ yá, è j'á yə̀ mánnɛ y nyí ga. Esərayɛl lyì byǎ bɛ́ k'ê yə̀ mánnɛ nɛ yé. Bə̀ jú kɔn dɛ̀bɛ́ bə̀ jə̀r Kanaã tənà y wẽ́ byin rí rə̀myɛ́ mɔ́. ¹³ Dɛ̃ rə̀dù, Zhozwe yà ń bwə́l Zheriko ne. Ń gə́ kwẽ̌ n nyǐ dɛ̃̌, n púrí bal mə̀dù ǹdə́ ń shù ń fwə̌rh ń zhe ń jɔ̃̀ wa, ń mə́ ń zhǐ ń yé né. Zhozwe twẽ̌ n yí ń nyí ni n bwə̀rh mò n wɔ̀: «Ǹ nyí wɔ nə́ kwã nɛ́ ráá nə́ zwə̀ bé kwã nɛ́?» ¹⁴ Bal mɔ́ lyár mɔ n wɔ̀: «À nyí tə̀ lòlò kwã nɛ́ yé. Àmyɛ́ wɔ́ Cinu Yi shə̀dɛ́ɛ́sɛ́ yó-cə́bal. À bàn èlǎsɛ̃́.» Rə̀myɛ́ yi ní, Zhozwe tu, n zə ń yé n pú tɛ̃́, n zɛ̃̀ n wɔ̀ mɔ: «Nyí tɛ̌ ǹ la ǹ tùntùnnə mó ne pɔ, yó-cə́bal?» ¹⁵ Cinu Yi shə̀dɛ́ɛ́sɛ́ yó-cə́bal mɔ́ wɔ̀ Zhozwe ne: «Vǔr ǹ nə̀cìlə̀d né ǹ nèsé ne, bə̀ jàà y kɛ̀bɛ́ ǹ zhǐ è wẽ́ mó wɔ́ Yi jàà.» Sə Zhozwe vùr ń nə̀cìlə̀ né.