¹ Esərayɛl lyì byǎ bɛ́ dwí rí púlə́púlə́ gə́ tú rə byɛrhɛ Zhɔrdɛ̃ bwǐ y rə zhɛ̀, Cinu Yi zɛ̃̀ n wɔ̀ Zhozwe ne: ² «Vǔr-nə bala shí ǹdə́ bə̀lyè dwí rí wẽ́, kwálá gakó lò mə̀dù ³ s'á pə bɛ nyí á wɔ̀: «Vǔr-nə nə́kulə shí ǹdə́ nə̀lyè Zhɔrdɛ̃ bwǐ y cəcəl ré wə, vwĩ̀-zwə́lnə bé nèsé gə́ cĩ́ sə zhì má cìcì mú. Zə-na nɛ á byɛrhɛ, á vò á cĩ́ á gə́ zul á la zɔ̃̀ mə̀gã̌ mɔ́.» ⁴ Zhozwe zɛ̃̀ n byẽ̀ bala shí ǹdə́ bə̀lyè y byɛ̀bɛ́ ń yà ń cír wẽ́, kwálá gakó lò mə̀dù mú, ⁵ n wɔ̀ bɛ̀: «Lyɛ̃-na á vò Cinu á Yi rí kùlkṍ w yé né, Zhɔrdɛ̃ bwǐ y cəcəl ré wə, sə lò gakó vùr nə́kulu òdù ń zhĩ ǹ pyə́pyɛla wa, kwálsɛ́ yó wə́, ⁶ mùnì ga rə yə̀ myɔrhɔ á cəcəl wə. Dɔnɔ yí ní, á byǎ bɛ́ gə tú bə̀ n'ê bwə̀rh ába bə̀ zhe: ‹Sə nə́kulə né nyɛ̀bɛ́ myɛ kùrə̀?›, ⁷ s'á lyár bɛ á wɔ̀: ‹Nə́kulə né nyɛ̀bɛ́ n'ê lyǐrh nɛ kɔn b'e la gaga, bə̀ Zhɔrdɛ̃ bwǐ y nɛ̃̌ mɔ́ gòm dwã wa Cinu Yi dɔbrɛ́ kùlkṍ w yé né, ò gə́ tú ò tó è wẽ́ o lyɛ̃ yi ní. Mə̀ zhə̀n ga gòm dwã wa.›» ⁸ Wɔ́ rə̀myɛ́ e ce wɛ̀rhɛ́ ǹdə Zhozwe gə́ yà ń pɔ bɛ nyí bə̀ bə̀ wɛ̀rhɛ́ nɛ́ mɔ́: bə̀ vùr nə́kulə shí ǹdə́ nə̀lyè Zhɔrdɛ̃ bwǐ y cəcəl ré wə, kwálsɛ́ yó wə́, bə zhĩ, ǹdə Cinu Yi gə́ yà ń byili Zhozwe ne né. Bə zə ne bə byɛrhɛ bə vò bə cĩ́ bə̀ gə́ zul bə zɔ̃̀ mə̀gã̌ mɔ́. ⁹ Zhozwe ce bə cĩ́ nə́kulə shí ǹdə́ nə̀lyè y dwã yó nə zhì dɛ̃̌ Zhɔrdɛ̃ bwǐ y cəcəl ré wə, vwĩ̀-zwə́lnə bé byɛ̀bɛ́ bə̀ y'à zhĩ kùlkṍ gə́ y'à cĩ́ bə̀ nèsé mə̀gã̌ mɔ́. Sə nə̀ gwẽ̌ ŋwɛ́nɛ́ gàà ǹdə́ zà ga. ¹⁰ Vwĩ̀-zwə́lnə bé byɛ̀bɛ́ bə̀ y'à zhĩ kùlkṍ w, zhì Zhɔrdɛ̃ bwǐ y cəcəl ré wə, kɔn b'e yí Cinu Yi zɔ̀mɛ̀ rɛ́ ń yà ń twĩ̀ Zhozwe bə̀ n byili ń dwí rí ni mú pyìrh kókó; rə tó kɔn dɛ̀bɛ́ gakó Muyiisi yà ń pɔ rə̀ nyí Zhozwe ne mó. Sə dwí rí wɛ̀rhɛ́ làlà rə byɛrhɛ. ¹¹ Dwí rí púlə́púlə́ gə́ tú rə byɛrhɛ rə zhɛ̀ kwã nɛ́, Cinu Yi kùlkṍ w ǹdə́ vwĩ̀-zwə́lnə bé lyɛ̃ bə vò bə yə̀ rə̀ yé né. ¹² Orɔbɛn ǹdə́ Gaadɛ kwálsɛ́ e súlí Manasɛ kwálá y kə̀kàlà y lyì bí lyɛ̃ bə yə̀ yé né ǹdə́ bə̀ búlə́ wẽ̀ ré, ǹdə Muyiisi gə́ yà ń wə̀l be né. ¹³ Lyì bí byɛ̀bɛ́ bə̀ tó Cinu Yi yé né bə lyɛ̃ ǹdə́ bə̀ nə̀rh, ǹdə́ bə̀ búlə́ wẽ̀ ré bə zǎ Zheriko jə́ y səta mɔ́, búlə́ né yil mú, y'à yú ǹdə bala mɔ̀ɔ̀rhɛ̀ shí-ɛ̀na ta. ¹⁴ Dɛ̃ rɛ́ rə̀myɛ́ yùwə̀, Cinu Yi ce Zhozwe yil du Esərayɛl lyì byǎ bɛ́ púlə́púlə́ cəcəl wə; sə bə̀ nyàm Zhozwe ń nyǔ mú púlə́púlə́ yi ní ǹdə bə̀ gə́ nyàm Muyiisi ní ta. ¹⁵ 1Cinu Yi zɛ̃̀ n wɔ̀ Zhozwe ne: ¹⁶ «Pə nyí vwĩ̀-zwə́lnə bé byɛ̀bɛ́ bə̀ zhĩ dɔbrɛ́ nyə́ né kùlkṍ w ne, bə̀ bə̀ du Zhɔrdɛ̃ bwǐ y wə.» ¹⁷ Zhozwe pə bɛ nyí rí n wɔ̀: «Du-nə Zhɔrdɛ̃ bwǐ y wə.» ¹⁸ Sə bə̀ vwĩ̀-zwə́lnə bé byɛ̀bɛ́ bə̀ y'à zhĩ Cinu Yi dɔbrɛ́ kùlkṍ w gə́ tú bə du Zhɔrdɛ̃ bwǐ y cəcəl ré w yi ní, bə̀ nèsé gə́ zhẽ̌ sə̀ la cə-kùlì y wẽ́ cṹ yi ní, Zhɔrdɛ̃ bwǐ y nɛ̃̌ mɔ́ k'á kwẽ̀ mə bə̀ mə̀ jàà y wa, mə sú mə bɔrh, mə̀ n'ê dùr ǹdə shãã ga ta. ¹⁹ Esərayɛl lyì byǎ bɛ́ du Zhɔrdɛ̃ bwǐ y wẽ́ cànà nã́yéé dwã shí yùwə̀a sə bə̀ zul Jələgal nɛ́, Zheriko yə́-pɛ̀lɛ́ wa, kɔn zǎ yi-púrhí sõ. ²⁰ Sə è gə wɔ́ nə́kulə né shí ǹdə́ nə̀lyè y nyɛ̀bɛ́ bə̀ y'à vùr Zhɔrdɛ̃ bwǐ y wẽ́ mó yilə, Zhozwe ce bə cìì ni tɛ̃́ nə̀ zhì dɛ̃̌, Jələgal nɛ́. ²¹ N zɛ̃̀ n wɔ̀ nɛ: «Dɔnɔ yi ní, á byǎ bɛ́ gə tú bə̀ n'ê bwə̀rh bə̀ dabá bə̀ zhe: ‹Sə nə́kulə né nyɛ̀bɛ́ myɛ kùrə̀?›, ²² 2á m'ǎ cĩ́ bi á wɔ̀ mùnì bə lwar: ‹tó cə-kùlì wẽ́ bə byɛrhɛ Zhɔrdɛ̃ bwǐ y jàà y kɛ̀bɛ́ wẽ́. ²³ Cinu á Yi rí ce Zhɔrdɛ̃ bwǐ y jǐrh cə-kùlì á yé né, á byɛrhɛ ǹdə ń gə́ yà ń ce vwal-gɔ nə̀-fɔ̀lɔ̀ w jǐrh cə-kùlì nə́ yé né nə́ byɛrhɛ mɔ́ ta. ²⁴ Wɔ́ mùnì ga dwə́ né gakó cɛ y yó mó lwar bə̀ Cinu Yi zhe jàn dɛ̃́dɛ̃́, s'á nyɛ̀ Cinu á Yi rí dɛ̃ gakó.›»