¹ Zhozwe dùlí n zɛ̃̀ nəkɔkɔ́lɛ́. Ńmyɛ̌ ǹdə́ gakó zhǐr Shitim ní bə vò bə yí Zhɔrdɛ̃ bwǐ y nyí ni, bə̀ mɛ̃ gàà bə zɔ̃̀ éfòró bə zɛ̃̀ bə byɛrhɛ. ² Sə dwã nə̀tɔ̀ kwã nɛ́, nyə́ né byilnə bé zɛ̃̀ bə tó bə̀ zulə́ jàà y wẽ́ ³ bə pə nyí bə wɔ̀: «Á gə tú á nɔ Cinu á Yi rí dɔbrɛ́ kùlkṍ w, Levyi kwálá y byǎ bɛ́ bə̀ wɔ́ vwĩ̀-zwə́lnə mó zhĩ, s'á zhǐr jàà y kɛ̀bɛ́ á ŋwɛ́nɛ́ è wẽ́ mó w, á pú ò kùrə̀. ⁴ Ámyɛ̌ wúrí á yẽ̌ bwə̌l ne, ámyɛ̌ ǹdə́ òmyɛ́ cəcəl w mə yí ǹdə jə̀-tórhó yírhə́ mɔ̀ɔ̀rhɛ̀ rə̀lyè ta, á bə̀k'á bwəlse w yé. Èta, á m'ǎ lwar sɔ́má kɛ̀bɛ́ á mə̌ s'á kwè mó párá, b'ǎ gwẽ̌ yə̀ sɔ́má y èmyɛ́ kwè gaga yé.» ⁵ Zhozwe zɛ̃̀ n wɔ̀ dwí rí ni: «Tɛnɛ-na á cìn Cinu yiləa, nyǐ nəkɔl dɛ̃́ rɛ́, ń la tũ̀-fwààlɛ̀ tũ̌ á cəcəl wə.» ⁶ N wɔ̀ vwĩ̀-zwə́lnə bé ne: «Zhĩ-nə dɔbrɛ́ kùlkṍ w s'á lyɛ̃ á yə̀ dwí rí yé né.» Bə zhĩ dɔbrɛ́ kùlkṍ wə́, bə lyɛ̃ bə vò bə̀ yə̀ dwí rí yé né bə̀ n'ê zhə̀lə̀. ⁷ Cinu Yi wɔ̀ Zhozwe ne: «Zà, à m'a ji kùr a ce ǹ yil n'ê dwi púlə́púlə́ cəcəl wə, mùnì ga bə lwar b'a m'a yə̀ nɛ́ ǹdə́ mɔ́ ǹdə à gə́ yàl nɛ́ ǹdə́ Muyiisi ní. ⁸ È gə́ wɔ́ ǹmyɛ́ yilə, ǹ m'ǎ pə nyí vwĩ̀-zwə́lnə bé bə̀ n'ê zhĩ dɔbrɛ́ kùlkṍ w mó ne ń wɔ̀: «Á gə tú á yú Zhɔrdɛ̃ bwǐ y nɛ̃̌ mɔ́ nyí ní, s'á zù á zhì è wẽ́.» ⁹ Zhozwe zɛ̃̀ n wɔ̀ nɛ: «twẽ̌-nə á bwəlse nyɔ̀nɔ̀ á cili Cinu á Yi rí zɔ̀mà nɛ́.» ¹⁰ N zɛ̃̀ n wɔ̀ bɛ: «Nyǐ-nə kɔn dɛ̀bɛ́ á m'ǎ tó rə̀ dɛnnɛ á lwar bə̀ Yi nã́nyì y ŋwɛ́nɛ́ á cəcəl wə, sə rə̀ m'à jì Kanaã lyì bí, Yititibá, Yivyitibá, Pərəzhitibá Gərəgəshitibá, Amɔrətibá e súlí Zhəbuzhitibá á yé né, rə zwẽ bə̀ tənà y rə pə ába zhə̀n ga: ¹¹ Cɛ y gakó Cinu mú dɔbrɛ́ kùlkṍ w m'à yə̀ á yé né o byɛrhɛ Zhɔrdɛ̃ bwǐ yə́. ¹² Èlǎsɛ̃́, zɛ̃̀-nà á vùr bala shí ǹdə́ bə̀lyè kwálsɛ́ wẽ́, kwálá gakó lò mə̀dù. ¹³ Vwĩ̀-zwə́lnə bé byɛ̀bɛ́ bə̀ zhĩ Cinu Yi, cɛ y gakó Cinu Yi rí kùlkṍ w nèsé gə tú sə cĩ́ Zhɔrdɛ̃ bwǐ y nɛ̃̌ mɔ́ wẽ́ yi ní, è nɛ̃̌ mɔ́ mɔ̀bɔ́ mə̀ shí dɛ̃̌ sõ mə̀ n'ê dùr mə̀ bàn mɔ́ m'a gõ̀; sə mə̀ b'a mɔ dwã nɛ mə zhì.» ¹⁴ Vwĩ̀-zwə́lnə bé byɛ̀bɛ́ bə̀ y'à zhĩ dɔbrɛ́ kùlkṍ w mó y'à ŋwɛ́nɛ́ dwí rí yé né, rə̀ gə́ tú rə shə́r rə̀ kwə̀ə́rhé wẽ́ rə la Zhɔrdɛ̃ bwǐ y byɔrhɔ yi ní. ¹⁵ Zhɔrdɛ̃ bwǐ y y'a sú e bɔrh è jààsɛ́ gakó jíjí jòró w yi rí wə. Sə lyì bí byɛ̀bɛ́ bə̀ y'à zhĩ kùlkṍ w mó gə́ yú è yó, bə̀ nèsé gə́ j'á dwə̀rh nɛ̃̌ mɔ́ bù-cǔ w yó mó yi ní, ¹⁶ nɛ̃̌ mɔ́ mɔ̀bɔ́ mə̀ shí dɛ̃̌ sõ mə̀ n'ê dùr mə̀ bàn mɔ́ j'á zhì, mə mɔ dwã nɛ mə̀ zhǐ dɛ̃̌, pyépyé, Adamɛ nɛ́, cɔ w kɔ̀bɔ́ ò ŋwɛ́nɛ́ Sarətã yala nɛ mɔ́ wẽ́. Nɛ̃̌ mɔ́ mɔ̀bɔ́ mə̀ shí dɛ̃̌ sõ mə̀ n'ê dùr mə̀ bàn Araba nə̀-fɔ̀lɔ̀ wá, è n'ê yǎl e wɔ̀ Nə̀kwə̃̌ nə̀-fɔ̀lɔ̀ w, səta mɔ́ myɛ j'a gõ̀ kókó. Dwí rí zɛ̃̀ rə byɛrhɛ kɔn zǎ Zheriko yé y wə. ¹⁷ Vwĩ̀-zwə́lnə bé byɛ̀bɛ́ bə̀ y'à zhĩ Cinu Yi dɔbrɛ́ kùlkṍ w zhì jàà èdù, cə-kùlì y wẽ́, Zhɔrdɛ̃ bwǐ y cəcəl ré wə; rə̀myɛ́ yi ní ǹdə́ púlə́púlə́ n'ê tó cə-kùlì wẽ́ bə̀ byɛrhɛ, kɔn b'e yí tənà y púlə́púlə́ m'e byɛrhɛ ya.