¹ Nuuni byǐ Zhozwe zhì Shitim ní n twĩ̀ bala bə̀lyè, bə̀ bə̀ zhəl bə̀ shèè bə zə surhə bə byɛ́lɛ́ tənà y ǹdə́ Zheriko cɔ wá. Bə lyɛ̃ bə vò. Bə yí bə zul kə-nə̀fòló òdù ò y'à yíl Arayaabɛa sõ jù wə, bə zɔ̃̀ gàà. ² Sə lyì cĩ́ rə̀ nyí Zheriko pyɔ̌ mɔ́ nɛ bə wɔ̀ mɔ: «Nyǐ lyì tú nyɛ̀má cəcɛ̃ y kɛ̀bɛ́, sə wɔ́ Esərayɛl lyì byǎ, bə̀ n'ê pyà nə́ tənà y yé shò lwar.» ³ Zheriko pyɔ̌ mɔ́ zɛ̃̀ n twĩ̀ bə vò bə wɔ̀ Arayaabɛ nɛ: «Vǔr bala bɛ́ byɛ̀bɛ́ bə̀ tú bə zul ǹ sõ jù w mú ǹ sõ mó ń ce pwẽ̀ nè, byɛ̀bɛ́ bə zul ǹ sõ jù w mú; bə̀ wɔ́ nə́ tənà y gakó yé shò lwar bə̀ n'ê pyà bə m'e bà.» ⁴ Sə kɛ̃ mɔ́ zə bala bɛ́ bə̀lyè y n vò n shèè. N zɛ̃̀ n wɔ̀: «Zhə̀nà, bala bɛ́ tú à sõ, sə à y'à yə̀l bə̀ gə́ shí má yé. ⁵ Bə̀ shə́r ǹdə́ cɛ y byíbyílí, bə̀ gə́ tú bə̀ n'ê pyi cɔ w bwə̀rə̀ y nyí rí yi ní. À yə̀l bə̀ gə́ zǎ má yé. Jǐ-nə bə̀ kwã làlà b'ǎ m'ǎ zə bɛ.» ⁶ E jà Arayaabɛ yà ń ce bə jì lyarh wa, n shèè bè lɛ̃b dǎr kùr wə̀; ń yà ń ló re gàà bə̀ ń y'à ń zhe rə̀ tum. ⁷ Pyɔ̌ mɔ́ lyì bí zhǐr bə kwè Zhɔrdɛ̃ bwǐ y sɔ́má yá, bə̀ m'ê jì bə̀ kwã, bə zǎ byɛɛ́sɛ́ səta. Sə bə̀ pyi bwə̀rə̀ y nyí rí pyɔ̌ mɔ́ lyì bí gə́ tú bə shə́r cɔ w wẽ́ kwã nɛ́. ⁸ Arayaabɛ twèlé bala bɛ́ nɛ, lyarh rɛ́ wa, ǹdə́ bə̀ gwẽ̌ bə tɛ̃́ pyě yé, ⁹ n zɛ̃̀ n wɔ̀ bɛ̀: «À yě bə̀ Cinu Yi pɔ ába tənà yá; wu-zɛ̃̀ɛ̃́ nánfɔ̀lɔ̀ zhe nə́ba; tənà y lyì bí gakó kəkə á yé né. ¹⁰ Nə́ nyɛ̀ɛ̀ bə̀ Cinu Yi ce vwal-gɔ nə̀-fɔ̀lɔ̀ w jǐrh cə-kùlì á yé né, á gə́ shə́r Ezhibti ní yi ní mú. Nə́ nyɛ̀ɛ̀ kɔn dɛ̀bɛ́ á wɛ̀rhɛ́ Amɔrətibá pyǎ bɛ́ bə̀lyè y, Səwɔnɛ ǹdə́ Oge ne, Zhɔrdɛ̃ bwǐ y èpákɛ̀ mɔ́ myɛ: á gu bi á súlí á cɔ̀ bə̀ jɛ̃̀-kɔn rɛ́ lyə́m lyə́m Cinu Yi yiləc. ¹¹ Nə́ nyɛ̀ɛ̀ rɛ̀, nə́ mə̀dù mə̀dù gakó wu zɛ̃̀; nə́ wun gɔwa. Cinu á Yi rí wɔ́ Yi, dɛ̃̌-yi rí wə ǹdə́ tɛ̃́ cɛ yó. ¹² Rə̀myɛ́ ce, bwəl-nə nyí èlǎsɛ̃́ Cinu Yi yé né, b'ǎ m'ǎ zə à dwí lyì bí ǹdə́ wu-bɔ̀nɔ̀ à gə́ zɔ ába ǹdə́ wu-bɔ̀nɔ̀ mɔ́ yilə. Pə-na nɛ myɔrhɔ ò m'a byili bə̀ zhə̀n ga ¹³ á m'ǎ yẽ̌ à da ǹd'â ná nɛ, à nəbwá ǹd'â da-bə̀kwá bɛ́ nɛ́ nã́nyìrh; s'á m'ǎ súlí á yẽ̌ kɔn dɛ̀bɛ́ gakó rə̀ wɔ́ bə̀myɛ́ nyǎn mɔ́ nɛ, s'á m'ǎ zwẽ nə́ba cu jɔ̃̀ wa.» ¹⁴ Bala bɛ́ lyár mɔ bə wɔ̀: «Á gə yə̀ nə́ kùr nì jál, nə́myɛ gə yə̀ ǹ náncɔ̀nɔ̀ w kwɛ̃̌, sə nə́ cì á jàà wà. Cinu gə tú ń pɔ nə́ba tənà yá, nə́ m'ǎ zə mɔ́ ǹdə́ wu-bɔ̀nɔ̀ ǹdə́ wu-põ̀.» ¹⁵ N zɛ̃̀ n ce bə tó nyíní ni bə tó ń jì y tú-kwə́rə́ y bə só tɛ̃́, bə̀ ń jì y y'à lù byílí y è y'à kə́kɛ́lɛ́ cɔ w mɔ́ nɛ; wɔ́ gàà ń yà ń ŋwɛ́nɛ́ nɛ́. ¹⁶ N wɔ̀ bɛ̀: «Zhəl-nə pyɔ̀ w səta mùnì ga byɛ̀bɛ́ bə̀ n'ê jì á kwã mɔ́ bə̀k'á zə ába yé. Shèè-nə gàà dwã nə̀tɔ̀ kɔn b'e yí byɛ̀bɛ́ bə̀ n'ê jì á kwã mɔ́ k'á kwẽ̀ bə bà. Rə̀myɛ́ kwã nɛ́, á m'ǎ zɛ̃̀ á zhílí á sɔ́má yá.» ¹⁷ Bala bɛ́ zɛ̃̀ bə wɔ̀ mɔ: «nyǐ nə́ gə́ m'ǎ pyìrh nyí rí tɛ̀bɛ́ ǹ ce nə́ bwəl mó mó né: ¹⁸ «Nə́ gə tú nə́ bàn tənà y w zú yi ní, ǹ m'ǎ lyẽ tə́tɔ̃̌ nyíní nánshɛ̃̀ y kɛ̀bɛ́ tú-kwə́rə́ y ǹ ce nə́ tó y nə́ só tɛ̃́ mɔ́ nɛ. Ǹ m'ǎ zɛ̃̀ ń zə ǹ da ǹdə́ ǹ ná ǹdə́ ǹ nəbwá bɛ́ ǹdə́ ǹ dwí lyì bí gakó ń bə̀ ń cĩ́ dwã yó ǹ sõ jù wə̀. ¹⁹ Lò mɔ̀bɔ́ ń zɛ̃̀ n gar ǹ étwí-ènyí rí á wẽ́ ń du pwẽ̀ nè, rə̀-ná-cí cu mú yò w zhǐ ń cìcì yó wə; rə̀myɛ́ yi ní, dóó tɛ̀nɛ́ nə́ yó w yé. Sə bə̀ gə gu lò ǹdə́ ń ŋwɛ́nɛ́ ǹ sõ jù wə̀, rə̀-ná-cí cu mú yò w zhǐ nə́ yó wə. ²⁰ Sə ǹ gə jál nə́ kùr nì, nyí rí tɛ̀bɛ́ ǹ ce nə́ bwəl mó mó k'ê yə̀ nə́ba lyẽ yé.» ²¹ N lyár bɛ n wɔ̀: «Kɔn yál ǹdə á gə́ zɔ̀m nɛ́.» N zɛ̃̀ n ce bə zhǐr bə lyɛ̃. Rə̀myɛ́ kwã nɛ́ n zɛ̃̀ n kwè tə́tɔ̃́ nyíní nánshɛ̃̀ y n lyẽ tú-kwə́rə́ y né. ²² Bə lyɛ̃ bə zǎ pyɔ̀ w səta. Bə mɛ̃ gàà dwã nə̀tɔ̀ kɔn b'e yí lyì bí byɛ̀byɛ́ bə̀ y'à n'ê jì bə̀ kwã mɔ́ k'á kwẽ̀ bə bà. E jà lyì bí bə̀myɛ́ j'á pyà bɛ sɔ́má y dwɛ̀lɛ̀ rɛ́ ga, sə bə̀ yə̀ be nɛ yé. ²³ Rə̀myɛ́ kwã nɛ́, bala bɛ́ bə̀lyè y k'á shí pyɔ̀ w wa bə só tɛ̃́; bə byɛrhɛ Zhɔrdɛ̃ bwǐ y bə vò Nuuni byǐ Zhozwe sõ; bə cĩ́ mu kɔn dɛ̀bɛ́ gakó bə̀ nɔ mɔ́. ²⁴ Bə̀ wə̀l mò: «Zhə̀n ga, Cinu Yi co tənà y púlə́púlə́ nə́ jɔ̃̀ wa: tənà y lyì bí gakó kəkə nə́ yé né.»