¹ Cinu Yi tùntùnnə Muyiisi gə́ tú n bə̀ n cì kwã nɛ́, Cinu Yi zɔ̀m ǹdə́ Nuuni byǐ Zhozwe, Muyiisi sanna mɔ́ n wɔ̀ mɔ: ² «À tùntùnnə Muyiisi cùwə̀. Rə̀myɛ́ ce, èlǎsɛ̃́, zɛ̃̀ ń zə dwí rí gakó ń byɛrhɛ Zhɔrdɛ̃ bwǐ y ǹ nə èta mɔ́, ń vò tənà y kɛ̀bɛ́ à n'â pɛ Esərayɛl lyì byǎ bɛ́ nɛ mɔ́ wẽ́. ³ À pɔ ába jàà kɛ̀bɛ́ gakó á nà la è wẽ́ cṹ mú ǹdə à gə́ bwəl nyí Muyiisi ni. ⁴ Lòlò tá ń la ŋwɔ̀nɔ́ n zhì ǹ yé né ǹ nyǔ mú púlə́púlə́ wẽ́ yé. À m'à yə̀ nɛ́ ǹdə́ mɔ́ ǹdə à gə́ yàl nɛ́ ǹdə́ Muyiisi ní ta. À t'â la mɔ́ yõ̌ yé, à t'â la à kwã zə a m'a zǎ mɔ́ gaga yé. ⁵ Lòlò tá ń la ŋwɔ̀nɔ́ n zhì ǹ yé né ǹ nyǔ mú púlə́púlə́ wẽ́ yé. À m'à yə̀ nɛ́ ǹdə́ mɔ́ ǹdə à gə́ yàl nɛ́ ǹdə́ Muyiisi ní ta. À t'â la mɔ́ yõ̌ yé, à t'â la à kwã zə a m'a zǎ mɔ́ gaga yé. ⁶ Zə wu-jɔ̀, sə́ yə̀ bal bə̀ wɔ́ ǹmyɛ́ ǹ m'ǎ pə tənà y kɛ̀bɛ́ dwí rí tɛ̀bɛ́ nɛ rə cìní, tənà y kɛ̀bɛ́ à bwəl è nyí rə̀ nàmbala bɛ́ nɛ, b'à la bɛ pɔ mɔ́. ⁷ Zhə̀nà, ǹmyɛ́ wúrí ń zə wu-jɔ̀ sə́ yə̀ bal sə ń ce jàn nɛ́ ń tó Nyə́ né nyɛ̀bɛ́ gakó à tùntùnnə Muyiisi yẽ̌ n pɔ̃́ mɔ́. Bə̀k'á yẽ̌ re, ń ywə̀r ń vò ǹ jə̀-jĩ́ sõ ráá ń vò ǹ jə̀-gwã̀ sõ yé, mùnì ga ǹ kɔn gakó zwẽ nyí ǹ gə́ la mə̀gã̌ gakó. ⁸ Nyə́ né sɛ́bɛ́ rɛ́ tɛ̀bɛ́ zɔ̀mà nɛ́ bə̀k'â lyɛ̃̀ ǹ nyǔ w yé. Ǹ mà ń nə́ ǹ sə́swɛ́mɛ́ nɛ ǹ nyú wə cəcɛ̃ ǹdə́ nə̀nyɛ́nɛ́ ga, mùnì ga ń ce jàn nɛ́ ń wɛ̀rhɛ́ kɔn dɛ̀bɛ́ gakó rə̀ kɛ̃ rə̀ wẽ́ mó. Èta kɔn dɛ̀bɛ́ ǹ la wɔ̀rhɔ́ gakó m'à zə kùrə̀, rə m'à zwẽ nyí. ⁹ À yə̀ mó wə̀l bə̀ ǹ zə wu-jɔ̀ sə́ yə̀ bal? Bə̀ ywẽ dùr yé, ǹ wu bə̀k'á gə yé, bə̀ Cinu ǹ Yi rí mà n yə̀ nɛ́ ǹdə́ mɔ́, ǹ gə́ la mə̀gã̌ gakó.» ¹⁰ Rə̀myɛ́ yi ní Zhozwe pɔ nyí dwí rí nyə́ né byilnə bé ne n wɔ̀: ¹¹ «Tó-nə lyì bí zulə́ jàà y wa, á wɔ̀ bɛ bə̀ bə̀ tɛnɛ kùjú bə ce bə̀ byẽ́, bə̀ nyǐ nyɔ̀nɔ̀ ǹdə́ dwã nə̀tɔ̀, bə̀ m'à byɛrhɛ Zhɔrdɛ̃ bwǐ y bə̀ nə èta mɔ́, bə vò bə zwẽ tənà y kɛ̀bɛ́ Cinu bə̀ Yi rí nə́ ń pɛ bɛ mɔ́ bə cìní.» ¹² N zɛ̃̀ n wɔ̀ Orɔbɛn ǹdə́ Gaadɛ kwálsɛ́ e súlí Manasɛ kwálá y kə̀kàlà y lyì bí ni: ¹³ «Lyǐrh-nə nyí rí Cinu Yi tùntùnnə Muyiisi pɔ àba mɔ́ yò, ń gə́ yà ń nə́ ń wə̀l yi ní: «Cinu á Yi rí pɔ ába shìrhə́; ń pɔ ába tənà y kɛ̀bɛ́.» ¹⁴ Á kana bɛ́, á bə̀sɔ́ná bɛ́ ǹd'á vwàmá nɛ́ b'a mɛ̃ tənà y kɛ̀bɛ́ Muyiisi pɔ ába mɔ́ wẽ́, Zhɔrdɛ̃ bwǐ y èpákɛ̀. S'ámyɛ̌ byɛ̀bɛ́ á wɔ́ búlə́ kàndar mɔ́ gakó, á m'ǎ du ǹd'á búlə́ wẽ̀ ré, á yə̀ á da-byǎ bɛ́ yé né, mùnì ga á sɛ̃ bɛ, ¹⁵ kɔn b'e yí bə̀ Cinu á Yi rí pə bɛ shìrhə́ ǹdə ń gə́ pɔ shìrhə́ ámyɛ nɛ nɛ́; sə bə̀myɛ cìní tənà y kɛ̀bɛ́ Cinu á Yi rí pɔ bə̀myɛ nɛ. Rə̀myɛ́ kwã nɛ́, á m'ǎ kwẽ̀ á b'ǎ cìní á tənà y kɛ̀bɛ́ Cinu Yi tùntùnnə Muyiisi, pɔ ába Zhɔrdɛ̃ bwǐ y yi-púrhí sõ, è wɔ́ ámyɛ cəl ré mó.» ¹⁶ Bə lyár Zhozwe bə wɔ̀: «Nə́ m'ǎ wɛ̀rhɛ́ kɔn dɛ̀bɛ́ gakó ǹ pɔ nə́ba nyí bə̀ nə́ wɛ̀rhɛ́ mɔ́. Nə́ m'ǎ vò ǹ gə́ la nə́ba tũ̌ má gakó. ¹⁷ Nə́ m'ǎ zwẽ ǹ nyí ni kɔn gakó wẽ́ ǹdə nə́ gə́ zwẽ Muyiisi nyí ni ní. Cinu ǹ Yi rí mà n yə̀ nɛ́ ǹdə́ mɔ́ ǹdə ń gə́ yàl nɛ́ ǹdə́ Muyiisi ní. ¹⁸ Nyə́ né gakó ǹ la nə́ba pɔ mɔ́, lo mɔ̀bɔ́ gakó ń cẽ nə̀ zõ yò ń yə̀ ǹ zɔ̀mà nɛ́ cili, bə m'a gu rə̀-nà-cí. Ǹmyɛ́ wúrí ń zə wu-jɔ̀ sə́ yə̀ bal!»