¹ Zhərəzalɛm pyɔ̌ Adonyi-Sɛdɛkɛ tú n bə̀ n nyɛ̀ɛ̀ bə̀ Zhozwe zwẽ Ayi cɔ w sə ń cɔ̀ w lyə́m lyə́m Cinu Yi yilə; sə ń wɛ̀rhɛ́ Ayi ǹd'ô pyɔ̌ mɔ́ ǹdə ń gə́ wɛ̀rhɛ́ Zheriko ǹd'ô pyɔ̌ mɔ́ nɛ́. Ń nyɛ̀ɛ̀ myɛ bə̀ Gabaɔ̃ lyì bí myɛ y'à co dwã yó ǹdə́ sə bə jě bə̀ cəcəl wə. ² Sə rə̀myɛ́ gakó y'à n'ê zɛ̃̀ wu ni dɛ̃́dɛ̃́ bə̀ Gabaɔ̃ y'à wɔ́ cə-fɔ̀lɔ̀, ò y'à wɔ́ pyə̀-cɔ dõ, ò y'à du Ayi, s'ò bala bɛ́ gakó j'à y'à wɔ́ kàndar. ³ Zhərəzalɛm pyɔ̌ Adonyi-Sɛdɛkɛ twĩ̀ bə vò bə wɔ̀ Ebərɔ̃ pyɔ̌ Oyam nɛ ǹdə́ Yərəmɔɔtɛ pyɔ̌ Pyərəyam nɛ ǹdə́ Ləciishi pyɔ̌ Yəfyiyə nɛ e súlí Egəlɔ̃ pyɔ̌ Dəbyiiri ni: ⁴ «Bà-nà á sɛ̃ nɛ nə́ bú ǹdə́ Gabaɔ̃, ò gə́ zɔ dɔbrɛ ǹdə́ Zhozwe ǹdə́ mɔ́ yilə.» ⁵ Amɔrətibá pyǎ bɛ́ bə̀nu yə́, Zhərəzalɛm pyɔ̌ mɔ́, Ebərɔ̃ pyɔ̌ mɔ́, Yərəmɔɔtɛ pyɔ̌ mɔ́, Ləciishi pyɔ̌ mɔ́ ǹdə́ Egəlɔ̃ pyɔ̌ mɔ́ co nyi dwã wa bə zɛ̃̀ bə̀myɛ́ ǹdə́ bə̀ shə̀dɛ́ɛ́sɛ́ gakó vò, bə zù Gabaɔ̃ cɔ w wẽ́, bə bú ǹdə́ wa. ⁶ Gabaɔ̃ lyì bí twĩ̀ bə vò bə wɔ̀ Zhozwe né, Jələgal zulə́ jàà y wẽ́: «Bə̀k'á cẽ ǹ tùntùnnə bé ne sãɔ̃ yé. Bà-nà nə́ sõ làlà á sɛ̃ nə́ba, á zwẽ nə́ba bə Amɔrətibá pyǎ bɛ́ bə̀ ŋwɛ́nɛ́ pyàr rɛ́ w mɔ́ gakó co nyí dwã wa bə m'ê bwí ǹdə́ nə́ba.» ⁷ Zhozwe já n zhì Jələgal nɛ́ n zhǐr ńmyɛ̌ ǹdə́ lyì byɛ̀bɛ́ gakó bə̀ y'à tɛnɛ búlə́ né bú yil mú e súlí shə̀dɛ́-byəsé gakó bə vò. ⁸ Cinu Yi wɔ̀ Zhozwe ne: «Bə̀k'á dùr ywẽ yé, nyǐ à co be ǹ jɔ̃̀ wa; bə̀ mə̀dù ga wàr ń mà n zhì ǹ yé né yé.» ⁹ Zhozwe zhə̀l cəcɛ̃ y námpúm n mə n shí Jələgal, n yí n lyí Amɔrətibá. ¹⁰ Cinu Yi ce bə dùr bə là dwã nɛ yé né, n ce bə búl bə ŋwɛ̀nɛ́ bɛ Gabaɔ̃ nɛ́. N jì bi n mə n vò Bɛtɛ-Orɔ̃ sə-jìlə́ y səta, ń bú ǹdə́ bɛ́ n mə n yí Azɛka ǹdə́ Makəda. ¹¹ Sə bə̀ gə́ y'à n'ê dùr yé né, bə yí Bɛtɛ-Orɔ̃ sɔ̃́-swə́rə́ yi ní, Cinu Yi zhì dɛ̃̌-yi wə n dul be ǹdə́ nə́kul-fwààlɛ̀ bə m'e yí Azɛka; sə bə̀ cùwə̀. Byɛ̀bɛ́ nə́kulə né nə̀ shí dɛ̃̌ ǹdə bədũ̀kwələ ta gu mú k'ê du byɛ̀bɛ́ gu ǹdə́ búlə́-shìmì ní mú. ¹² Zhozwe zɛ̃̀ n zɔ̀m n ce Cinu Yi ni, dɛ̃ rɛ́ tɛ̀bɛ́ Cinu Yi co Amɔrətibá jɔ̃̀ w mɔ́. Ń zɔ̀m Esərayɛl lyì byǎ bɛ́ yírh wə n wɔ̀:«Nə̀nyɔ́nɔ́, swə́rh zhì Gabaɔ̃ yə́-pɛ̀lɛ́ wa, cànà, swə́rh zhì Ayalɔ̃ vɔlɔ w yó!» ¹³ Sə nə̀nyɔ́nɔ́ w swə́rh o zhì, cànà y myɛ zhì jàà èdù kɔn b'e yí Esərayɛl lyì byǎ bɛ́ cĩ́ è jim è zwə̀ bé yó. Nə̀nyɔ́nɔ́ w swə́rh o zhì jàà èdù dɛ̃̌-yi rí cəcəl wə, kɔn yí ǹdə dɛ̃ námpúm ta, sə ò yə̀ pyà o zù làlà yé. Bə̀ kɛ̃ yò w òmyɛ́ Cángá cə́bal mɔ́ sɛ́bɛ́ rɛ́ wẽ́. ¹⁴ Dɛ̃ yə̀ nɛ́ yàl, dɛ̃ rɛ́ rə̀myɛ́ yé né ráá dɛ̃ rɛ́ rə̀myɛ́ kwã nɛ́, rə̀ nyɛrhɛ dwã ǹdə dɛ̃ tɛ̀bɛ́ Cinu Yi zwẽ numbyíní nyí ni mú ta yé; bə̀ Cinu Yi yà nə́ ń sɛ̃ Esərayɛl lyì byǎ bɛ́ nɛ ń bwí búlə́ né. ¹⁵ Rə̀myɛ́ kwã nɛ́, Zhozwe ǹdə́ púlə́púlə́ k'á kwẽ̀ bə vò bə̀ zulə́ jàà y wa, Jələgal nɛ́. Zhozwe ce be gu pyǎ bɛ́ bə̀nu y Makəda nɛ́ ¹⁶ Amɔrətibá pyǎ bɛ́ bə̀nu y y'à dùr bə vò bə shèè myèlé ré wə, Makəda nɛ́. ¹⁷ Sə bə̀ tú bə wɔ̀ Zhozwe ne: «Bə̀ nɔ pyǎ bɛ́ bə̀nu y bə̀ shèè myèlé ré wə, Makəda nɛ́.» ¹⁸ Zhozwe zɛ̃̀ n wɔ̀: «Byíbyílí-nə nə́kul-fwààlɛ̀ á m'á pyi myèlé ré nyí rí, s'á cĩ́ bala rə̀ nyí ni bə yìlì rì. ¹⁹ Sə è gə wɔ́ ámyɛ̌ yilə, á bə̀k'á zhì yé, jǐ-nə á zwə̀ bé, cə̌r-nə byɛ̀bɛ́ bə̀ pú kwã mɔ́ nyí rí; á bə̀k'á yẽ̌ be, bə zù bə̀ cɛmɛ nɛ́ wẽ́ yé, bə̀ Cinu á Yi rí co be á jɔ̃̀ wa. ²⁰ Sə Zhozwe ǹdə́ gə́ tú bə ŋwɛ̀nɛ́ bɛ, bə gu bí lyə́m lyə́m bə zhɛ̀ yi ní, lyì jàlà vwǎrh bə dùr bə zù cɛmɛ nɛ́ nyɛ̀bɛ́ bə̀ y'à lù bə kə́kɛ́lɛ́ nɛ bə̀ m'ê yìlì nì mú wẽ́. ²¹ Dwí rí púlə́púlə́ kwẽ̀ rə bà rə̀ zulə́ jàà y wa, Zhozwe yala nɛ, Makəda nɛ́ ǹdə́ yə̀-zùlə́; lòlò kə́ ń yə̀ Esərayɛl lyì byǎ bɛ́ nyí pyà yé. ²² Rə̀myɛ́ kwã nɛ́, Zhozwe zɛ̃̀ n pə nyí n wɔ̀: «Pul-nə myèlé ré nyí rí s'á vùr pyǎ bɛ́ bə̀nu y byɛ̀bɛ́ á ce pwẽ̀ nè á pɛ̃.» ²³ Bə̀ wɛ̀rhɛ́ èta zhə̀n ga, sə bə̀ vùr pyǎ bɛ́ bə̀nu y myèlé ré wə bə ce pwẽ̀ nè bə zə bɛ bə vò Zhozwe sõ: wɔ́ Zhərəzalɛm pyɔ̌ mɔ́, Ebərɔ̃ pyɔ̌ mɔ́, Yərəmɔɔtɛ pyɔ̌ mɔ́, Ləciishi pyɔ̌ mɔ́ ǹdə́ Egəlɔ̃ pyɔ̌ mɔ́. ²⁴ Sə bə̀ gə́ tú bə vùr be bə ce pwẽ̀ nè bə m'e vò Zhozwe sõ yi ní, Zhozwe byẽ̀ Esərayɛl lyì byǎ bɛ́ bala bɛ́ gakó, n zɛ̃̀ n wɔ̀ lyì bí byɛ̀bɛ́ bə̀ y'à tɛnɛ búlə́ né bú yil mú yé né cìnə́ bé, bə̀ y'à n'ê tó mo mó ne: «Twẽ̌-nə á yí, cĩ́-nə á nə̀rh pyǎ bɛ́ byɛ̀bɛ́ byə̃sé yóa.» Bə twẽ̌ bə yí, bə̀ cĩ́ bə̀ nə̀rh pyǎ bɛ́ byə̃sé yó. ²⁵ Zhozwe zɛ̃̀ n wɔ̀ bɛ: «Á bə̀k'á dùr ywẽ yé, á wun bə̀k'á gə myɛ yé. Yál-na wu-jɔ̀ cìnə́. Wɔ́ èta Cinu Yi mà n wɛ̀rhɛ́ nɛ́ ǹdə́ á zwə̀ bé byɛ̀bɛ́ gakó á la bú ǹdə́ bɛ mɔ́.» ²⁶ Rə̀myɛ́ kwã nɛ́ Zhozwe gu pyǎ bɛ́, n ce bə jele be dɛ̃̌ cèmé nə̀nu ne; sə bə̀ mɛ̃ dɛ̃̌ cèmé né ne kɔn b'e yí də̀dɛ̀nɛ́. ²⁷ Yi rí gə́ tú rə̀ n'ê zwì yi ní, Zhozwe pə nyí bə̀ bə só be tɛ̃́ cèmé né yó, sə bə ló be myèlé ré tɛ̀bɛ́ bə̀ y'à shèè rə̀ wẽ́ mó wə. Bə zɛ̃̀ bə pyi myèlé ré nyí rí ǹdə́ nə́kul-fwààlɛ̀; rə̀ ná y j'á gwẽ̌ ŋwɛ́nɛ́ gàà kɔn b'e yí zà. ²⁸ Dɛ̃ rɛ́ rə̀myɛ́ yùwə̀, Zhozwe bú n zwẽ Makəda, n gu ò pyɔ̌ mɔ́ ǹd'ô lyì bí gakó ǹdə́ búlə́-shìmì. N cɔ̀ cɔ w, n gu ò lyì bí gakó lyə́m lyə́m Cinu Yi yilə. Ń yə̀ lòlò ne yẽ̌ nã́nyì yé. Ń wɛ̀rhɛ́ Makəda pyɔ̌ mɔ́ ǹdə ń gə́ yà ń wɛ̀rhɛ́ Zheriko pyɔ̌ mɔ́ nɛ́. ²⁹ Zhozwe zhì Makəda nɛ́ n vò Lyəbəna, sə púlə́púlə́ tó mo; sə ń bú ǹdə́ Lyəbəna. ³⁰ Cinu Yi ce Lyəbəna ǹd'ô pyɔ̌ mɔ́ ga jɔ̃̀ wà. Esərayɛl lyì byǎ bɛ́ gu lyì bí byɛ̀bɛ́ bə̀ y'à ŋwɛ́nɛ́ ò wẽ́ mó gakó. È yə̀ ò lò mə̀dù ga myɛ nɛ yẽ̌ nã́nyì yé. Esərayɛl lyì byǎ bɛ́ wɛ̀rhɛ́ ò pyɔ̌ mɔ́ ǹdə bə̀ gə́ y'à wɛ̀rhɛ́ Zheriko pyɔ̌ mɔ́ nɛ́. ³¹ Zhozwe zhì Lyəbəna nɛ́ n vò Ləciishi, sə púlə́púlə́ tó mo. N pú cɔ w, n zɛ̃̀ n bú ǹdə́ wa. ³² Cinu Yi ce Ləciishi jɔ̃̀ wà. Esərayɛl lyì byǎ bɛ́ bú e zwẽ w dwã nə̀lyè dɛ̃ rɛ́ yùwə̀; Esərayɛl lyì byǎ bɛ́ gu lyì bí bə̀ y'à ŋwɛ́nɛ́ ò wẽ́ mó gakó ǹdə́ búlə́-shìmì ǹdə e gə́ y'à wɛ̀rhɛ́ Lyəbəna nɛ́ ta. ³³ Rə̀myɛ́ yi ní, Gɛzɛɛrɛ pyɔ̌ Oram zɛ̃̀ n vò ń la Ləciishi ni sãɔ̃ n bú, sə Zhozwe gu ńmyɛ̌ ǹdə́ ń lyì bí, ń yə̀ ń lò mə̀dù ga myɛ nɛ yẽ̌ nã́nyì yé. ³⁴ Zhozwe zhì Ləciishi ní n vò Egəlɔ̃, sə Esərayɛl lyì byǎ bɛ́ púlə́púlə́ tó mo; bə pú cɔ w, bə zɛ̃̀ bə bú ǹdə́ wa. ³⁵ Bə zwẽ cɔ w dɛ̃ rɛ́ rə̀myɛ́ yù w cìcì, bə gu ò lyì bí gakó ǹdə́ búlə́-shìmì. N gu lyì byɛ̀bɛ́ gakó bə y'à ŋwɛ́nɛ́ cɔ w wẽ́ mó dɛ̃ rɛ́ rə̀myɛ́ yùwə̀ cìcì Cinu Yi yilə ǹdə ń gə́ yà ń wɛ̀rhɛ́ Ləciishi ní ta. ³⁶ Zhozwe zhì Egəlɔ̃ nɛ́ n vò Ebərɔ̃, sə púlə́púlə́ tó mo; sə ń bú ǹdə́ Ebərɔ̃. ³⁷ Bə zwẽ Ebərɔ̃ cɔ w, bə gu ò lyì bí, ò pyɔ̌ mɔ́ ǹd'ô cɛmɛ nɛ́ ǹdə́ lyì bí byɛ̀bɛ́ gakó bə̀ y'à ŋwɛ́nɛ́ nə̀ wẽ́ mó ǹdə́ búlə́-shìmì. Ń yə̀ lò mə̀dù ga myɛ nɛ yẽ̌ nã́nyì yé; kɔn yàl ǹdə ń gə́ yà ń wɛ̀rhɛ́ Egəlɔ̃ nɛ́. Ń cɔ̀ cɔ w, n gu ò lyì bí gakó lyə́m lyə́m Cinu Yi yilə. ³⁸ Rə̀myɛ́ kwã nɛ́, Zhozwe pyìrhí n zǎ Dəbyiiri, sə Esərayɛl lyì byǎ bɛ́ tó mo, sə ń bú ǹdə́ Dəbyiiri. ³⁹ N zwẽ Dəbyiiri ǹd'ô pyɔ̌ mɔ́ ǹd'ô cɛmɛ nɛ́. Bə gu ò lyì bí byɛ̀bɛ́ gakó bə̀ y'à ŋwɛ́nɛ́ ò wẽ́ mó ǹdə́ búlə́-shìmì, Cinu Yi yilə. Zhozwe yə̀ lò mə̀dù ga myɛ nɛ yẽ̌ nã́nyì yé. Ń wɛ̀rhɛ́ Dəbyiiri ǹd'ô pyɔ̌ mɔ́ ǹdə ń gə́ yà ń wɛ̀rhɛ́ Ebərɔ̃ ǹdə́ Lyəbəna ǹd'ô pyɔ̌ mɔ́ nɛ. ⁴⁰ Zhozwe zwẽ tənà y gakó: pyàr rɛ́ nyí rí, Nəgɛɛvɛ nyí rí, pyàr rɛ́ kùr w pyǎlsɛ́ nyí rí, pyàr rɛ́ nə̀bán rɛ́ nyí rí ǹdə́ nə̀ pyǎ bɛ́ gakó. Ń yə̀ lò mə̀dù ga myɛ nɛ yẽ̌ nãnyì yé, ń gu kò-nyì gakó Cinu Yi yilə ǹdə Cinu, Esərayɛl lyì byǎ bɛ́ Yi rí, gə́ yà ń pɔ nyí ní. ⁴¹ Zhozwe ŋwɛ̀nɛ́ bɛ kɔn gə́ zhì Kədɛshɛ-Barənəya e m'e yí Gaza e súlí kɔn gə́ zhì Gɔshɛn tənà y nyí rí e m'e yí Gabaɔ̃ mɔ́. ⁴² Ń tó dwã n zwẽ pyǎ bɛ́ bé ǹdə́ bə̀ tənèsé ga twər rə̀dù, bə̀ Cinu Esərayɛl lyì byǎ bɛ́ Yi rí y'à n'ê sɛ̃ nɛ rə̀ bwí búlə́ bú yi ní. ⁴³ Rə̀myɛ́ kwã nɛ́, Zhozwe ǹdə́ púlə́púlə́ k'á kwẽ̀ bə vò bə̀ zulə́ jàà y wa, Jələgal nɛ́.