¹ Asɔɔrɛ pyɔ̌ Yabɛ̃ gə́ tú n nyɛ̀ɛ̀ bə̀ Zhozwe bú ǹdə́ pyǎ bɛ́ n zwẽ bə̀ tənèsé, ń twĩ̀ tùntúmə́ Madɔ̃ pyɔ̌ Yɔbabɛ ǹdə́ Shəmərɔ̃ pyɔ̌ e súlí Akəshəfɛ pyɔ̌ mɔ́ sõ. ² N súlí n twĩ̀ tùntúmə́ pyǎ bɛ́ byɛ̀bɛ́ bə̀ y'à ŋwɛ́nɛ́ jə̀-gwã̀ sõ pyàr rɛ́ nyí rí wẽ́ mó sõ; ǹdə́ byɛ̀bɛ́ bə̀ y'à ŋwɛ́nɛ́ Araba nɛ́ ǹdə́ Cənərɔtɛa bù-fwɛ̀lɛ̀ y jə̀-jĩ́ sõ mó sõ; ǹdə́ byɛ̀bɛ́ bə̀ y'à ŋwɛ́nɛ́ pyàr rɛ́ kùr w pyǎlsɛ́ nyí rí wẽ́ mó sõ; e súlí byɛ̀bɛ́ bə̀ y'à ŋwɛ́nɛ́ Dɔɔrɛ jə́ y wẽ́ yi-zùr w mú sõ. ³ Kanaã lyì bí y'à ŋwɛ́nɛ́ yi-púrhí ǹdə́ yi-zùrh wə̀; Amɔrətibá, Yititibá, Pərəzhitibá ǹdə́ Zhəbuzhitibá y'à ŋwɛ́nɛ́ pyàr rɛ́ wa; Yivyitibá y'à jě Erəmɔ̃ pyɔ̀ w kùr wə̀, Myəsəpa tənà y wa. ⁴ Bə zɛ̃̀ bə du, bə̀myɛ́ ǹdə́ bə̀ shə̀dɛ́ɛ́sɛ́ gakó, dwí nánzhəzhɔ̌ ǹdə nə̀-fɔ̀lɔ̀ nyí nyɔ̀rhɔ́ byǎ ta, ǹdə́ shəshərh ǹdə́ búlə́ eshərh-vwə̃turb nánzhɔ̌. ⁵ Pyǎ bɛ́ bə̀myɛ́ gakó pə nyí dwã nɛ bə̀ bə̀ bə jà dwã, bə̀ b'e zul Myərɔm nàná bɛ́ nyí ni bə la m'e bú ǹdə́ Esərayɛl lyì byǎ bɛ́. ⁶ Cinu Yi wɔ̀ Zhozwe ne: «Bə̀k'á dùr bə̀ ywẽ yé, bə̀ nəkɔl dɛ̃ rɛ́, yi rí tɛ̀bɛ́ èta mɔ́ cìcì, à m'à ce bə̀ gakó Esərayɛl lyì byǎ bɛ́ bí jɔ̃̀ wa, náncùùrì. Ǹ m'ǎ gõ̀ bə̀ shəshesé nə̀-gwěsé ń súlí ń ji bə̀ búlə́ eshərh-vwə̃tur rí myǐn.» ⁷ Zhozwe ǹdə́ lyì bí byɛ̀bɛ́ gakó bə̀ tɛnɛ búlə́ né bú yil mú bə̀ bə lyí bi Myərɔm nàná bɛ́ nyí ni, bə j'a zù bə̀ yó bə bú ǹdə́ bɛ. ⁸ Cinu Yi ce be bə̀ jɔ̃̀ wa, sə bə̀ ŋwɛ̀nɛ́ bɛ, bə jì bi bə m'e yí Sədɔ̃ Cə-fɔ̀lɔ̀ wá, ǹdə́ Myəsərəfɔtɛ-Məyim e súlí Myəsəpɛ jə́ y wə, yi-púrhí wə. Bə̀ gu bi, bə̀ yə̀ mə̀dù ga myɛ nɛ yẽ̌ nã́nyì yé. ⁹ Zhozwe wɛ̀rhɛ́ bɛ kɔn dɛ̀bɛ́ Cinu Yi yà ń wə̀l mo bə̀ ń wɛ̀rhɛ́ mɔ́: ń gòm bə̀ shəshesé nə̀-gwěsé, n súlí n ji bə̀ búlə́ eshərh-vwə̃tur rí myǐn. ¹⁰ Rə̀myɛ́ yi ní, Zhozwe ká n kwẽ̀ n bə̀ n bú n zwẽ Asɔɔrɛ. N gu ò pyɔ̌ mɔ́ ǹdə́ búlə́ shù. Shãã ga, Asɔɔrɛ y'à wɔ́ pyǎ bɛ́ bə̀myɛ́ gə́ y'à cǐ ní mú nyí rí púlə́púlə́ cə-fɔ̀lɔ̀ wá. ¹¹ Bə gu lyì bí byɛ̀bɛ́ gakó bə̀ y'à ŋwɛ́nɛ́ ò wẽ́ mó ǹdə́ búlə́-shìmì Cinu Yi yilə mùnì ga bə ce bə jé tɛ̃́ lyə́m lyə́m. Kò-nyi rə̀dù ga myɛ yə̀ dàl yé; bə zɛ̃̀ bə ji Asɔɔrɛ myǐn. ¹² Zhozwe zwẽ pyǎ bɛ́ bə̀myɛ́ cɛmɛ nɛ́ gakó ǹdə́ nə̀ pyǎ bɛ́ gakó; n zɛ̃̀ n gu nə̀ pyǎ bɛ́ ǹdə́ búlə́ shù. N gu bi Cinu Yi yilə ǹdə Cinu Yi tùntùnnə Muyiisi gə́ yà ń pɔ nyí ní. ¹³ Sə Esərayɛl lyì byǎ bɛ́ yə̀ cɛmɛ nɛ́ nyɛ̀bɛ́ nə̀ y'à ŋwɛ́nɛ́ jì-bwə̀ə̀ré də̀dwə́lə́ yó mó òdù ga myǐn ji yé, è gə də̀ Asɔɔrɛ dúdú Zhozwe ju myǐn. ¹⁴ Esərayɛl lyì byǎ bɛ́ pwà wẽ̀ tɛ̀bɛ́ bə zwẽ cɛmɛ nɛ́ nə̀myɛ́ wẽ́ búlə́ né yi ni mú, ǹdə́ vwàmá nɛ́, bə̀ cìcì yilə. Sə bə̀ gu numbyínsí gakó lyə́m lyə́m ǹdə́ búlə́-shìmì. Bə̀ yə̀ kò-nyì rə̀dù ga myɛ nɛ yẽ̌ yé. ¹⁵ Cinu Yi tùntùnnə Muyiisi yà ń byili Zhozwe ne kɔn dɛ̀bɛ́ gakó Cinu Yi yà ń pɔ ńmyɛ̌ nɛ rə̀ nyí mú. Sə Zhozwe yə̀ kaka nɛ yẽ̌ rə tu tɛ̃́ Cinu Yi nyə́ né nə̀myɛ́ mɔ́ wẽ́ yé. ¹⁶ Zhozwe zwẽ tənà y èmyɛ́ mɔ́ púlə́púlə́: Pyààrɛ́ nyí rí ǹdə́ Nəgɛɛvɛ púlə́púlə́ nyí rí ǹdə́ Gɔshɛn tənà y púlə́púlə́, ǹdə́ pyàr rɛ́ kùr w pyǎlsɛ́ y nyí rí, Araba, Esərayɛl lyì byǎ bɛ́ pyɔ̀ wá, ǹd'ô tɛ̃́-sõ nyí rí. ¹⁷ Zhozwe zɔ, kɔn zhì Alakɛ pyɔ̀ w ò zhǐ dɛ̃̌ kɔn zǎ Səyiiri səta mɔ́ e m'e yí Baal-Gaadɛ, Lyəbã jə́ y wə, Erəmɔ̃ pyɔ̀ w kùr wə̀, pyǎ bɛ́ gakó, n ŋwɛ̀nɛ́ bɛ n zɛ̃̀ n gu bi. ¹⁸ Zhozwe bú ǹdə́ pyǎ bɛ́ bə̀myɛ́ gakó, dwã nánzhəzhɔ̌. ¹⁹ Cɔ òdù ga yə̀ nɛ́ yàl ò pyà yə̀-zùlə́ ǹdə́ Esərayɛl lyì byǎ bɛ́, è gə də̀ Yivyitibá dúdú bə̀ jě Gabaɔ̃ nɛ́ mɔ́. Esərayɛl lyì byǎ bɛ́ tó búlə́ dɛnnɛ bə m'e zwẽ cɛmɛ nɛ́ dwã bɛ́ gakó. ²⁰ Cinu Yi yà ń gu ń wẽ́ n kù bə̀ wun ní mùnì ga bə bú ǹdə́ sə n tó rə̀ dɛnnɛ n ce bə gu bi lyə́m lyə́m ńmyɛ̌ yilə. Èta bə̀ t'á la bə̀ nɔ̀nɔ̀ dǔr yé, sə bə ŋwɛ̀nɛ́ bə gu bi lyə́m lyə́m ǹdə Cinu Yi gə́ yà ń pɔ nyí Muyiisi ni ní. ²¹ Rə̀myɛ́ yi ní, Zhozwe tú n gu Anəcitibá bə̀ y'à ŋwɛ́nɛ́ pyàr rɛ́ w mɔ́, ǹdə́ Ebərɔ̃ nɛ́, Dəbyiiri ǹdə́ Anaabɛ nɛ́ e súlí Zhəda ǹdə́ Esərayɛl lyì byǎ bɛ́ pyàr rɛ́ gakó yó. Zhozwe gu bi, n cɔ̀ bə̀ cɛmɛ nɛ́ lyə́m lyə́m Cinu Yi yilə. ²² Anəcitibá mə̀dù ga myɛ yə̀ dàl tənà y wẽ́ yé. Sə bə̀ y'à gwẽ̌ ŋwɛ́nɛ́ Gaza nɛ́, Gaatɛ ǹdə́ Ashədɔɔdɛ nɛ́. ²³ Zhozwe zwẽ tənà y púlə́púlə́ kɔn gakó tó ǹdə Cinu Yi gə́ yà ń wə̀l Muyiisi ni ní. N zɛ̃̀ n kwè y n pə Esərayɛl lyì byǎ bɛ́ nɛ, n tə̀ y kwálá gakó ǹdə́ è cəl. Sə rə̀myɛ́ kwã nɛ́, tənà y shǐrh ǹdə́ búlə́ né bú.