¹ Cinu Yi yà ń tú n pə shìrhə́ Esərayɛl lyì byǎ bɛ́ nɛ, bə̀ zwə̀ bé bə̀ y'à kə́kɛ́lɛ́ bɛ mɔ́ gakó cəcəl wə. Sə kɔn gə́ dɛnɛ rə̀myɛ́ kwã nɛ́, yó-cìnə́ bé ² Zhozwe byẽ̀ Esərayɛl lyì byǎ bɛ́ púlə́púlə́, náncɛsɛ́, yó-cìnə́ bé, bùr-kárna bɛ́ ǹdə́ nyə́ né byilnə bé ǹdə́ ń byinə né y'à ju ni, ń y'à jǐrh náncɛ, n zɛ̃̀ n wɔ̀ bɛ̀: «À wɔ́ náncɛ, à byinə né ju ní. ³ Á cìcì mú nɔ kɔn dɛ̀bɛ́ gakó Cinu á Yi rí wɛ̀rhɛ́ tənèsé shɛ̀bɛ́ gakó ne á yilə bə̀ wɔ́ Cinu á Yi rí ń bú ǹd'á zwə̀ bé á jàà wà. ⁴ Nyǐ-nə, à ce bə tó tántɛ́ɛ́ dɛnnɛ bə pə cɛmɛ nyɛ̀bɛ́ nə́ yə̀ ŋwɛ̀nɛ́ nə́ zwẽ mó ǹdə́ cɛmɛ nɛ́ nyɛ̀bɛ́ gakó à ŋwɛ̀nɛ́ a zwẽ búlə́ né wẽ́ mó á kwálsɛ́ nɛ, kɔn zhì Zhɔrdɛ̃ bwǐ y ni e m'e yí Mədətərəne y nɛ yi-zùr wə̀. ⁵ Cinu á Yi rí cìcì mú nə́ ń jì bì á nyí ni ń ce kwã nɛ́; ń nə́ ń jì bì mùnì ga ámyɛ̌ b'ǎ zwẽ bə̀ tənà y á cìní ǹdə ń gə́ bwəl ába nyí mú ní. ⁶ Rə̀myɛ́ ce zə-na wu-jɔ̀ nánfɔ̀lɔ̀ s'á wɛ̀rhɛ́ kɔn gakó rə tó kɔn dɛ̀bɛ́ rə̀ kɛ̃ Muyiisi Nyə́ ne sɛ́bɛ́ rɛ́ wẽ́ ne; á bə̀k'á yẽ̌ re, á ywə̀r á vò jə̀-jĩ́ sõ ráá jə̀-gwã̀ sõ yé. ⁷ Á bə̀k'á gùlí dwã nɛ ǹdə́ dwə́ né nə̀ ŋwɛ́nɛ́ á nyí ní mú yé, á bə̀k'á byẽ̀ bə̀ yə né bə̀ nə̀ b'e sɛ̃ ába yé, á bə̀k'á zə ne á m'á dwĩ̀ nyí yé, s'á bə̀k'á wùlì tɛ̃́ nə̀ yé né á m'á cèrhé ne yé. ⁸ S'á gə zhí Cinu á Yi rí dúdú ni ǹd'á gə́ wɛ̀rhɛ́ nɛ́ kɔn b'e yí zà mɔ́ ta, ⁹ Cinu Yi mà n jì dwə́ né nə̀ wɔ́ nánzhəzhɔ̌, è jà nə̀ zhe jàn á yé né. E jà kɔn b'e yí zà mɔ́, lòlò yə̀ ŋwɛ̀nɛ́ n zhì á yé né yé. ¹⁰ Ámyɛ̌ mə̀dù nə́ n jì bə̀ nunə mɔ̀rhɔ̀, bə̀ wɔ́ Cinu á Yi rí ń nə́ ń bwí ǹdə́ bɛ á jàà wa, ǹdə ń gə́ bwəl ába nyí mú ní. ¹¹ Rə̀myɛ́ ce s'ámyɛ̌ dɛ̃̀ á cìn náàcɛ̀nɛ́: swéné-nə Cinu á Yi rí. ¹² S'á gə yẽ̌ ń kùr tó ne á zɛ̃̀ á zə dɔbrɛ ǹdə́ dwə́ dwã bɛ́ nyɛ̀bɛ́ nə̀ ŋwɛ́nɛ́ á yala nɛ mɔ́, á gə jú bə̀ bə̀kwá, á gə gùlí bi, bə̀myɛ́ gùlí ába, ¹³ s'á lwar pamparɛ̃ɛ̃ bə̀ Cinu á Yi rí kə́ ń tá n la bɛ jǔ á yé né yé. Dwə́ né nə̀myɛ́ b'a jǐrh gùndwǐ ǹdə́ cɔ̀bɔ́ á yilə, ywàlá á cěsé yilə ǹdə́ sɔr á yírhə́ né wẽ́, kɔn b'e yí á jé tɛ̃́ cɛ náàcɛ̀nɛ́ kɛ̀bɛ́ Cinu á Yi rí pɔ ába mɔ́ wẽ́. ¹⁴ 1Nyǐ àmyɛ́ n'â lyɛ̃ zà ǹdə kɔn dɛ̀bɛ́ gakó rə̀ ŋwɛ́nɛ́ cɛ y yó mó gə́ n'ê lyɛ̃ nɛ́. S'ámyɛ̌, zwẽ-nə nyí ǹd'á wu gakó ǹd'á cìn-námpúm bə̀ cɛ̀nɛ̀ tɛ̀bɛ́ gakó Cinu á Yi rí bwəl n pə ába mɔ́ rə̀dù ga myɛ yə̀ mɛ̃ nánfò yé. Rə̀ gakó pyìrh á yilə; rə̀ rə̀dù ga myɛ yə̀ mɛ̃ nánfò rə̀ yə̀ pyìrh yé. ¹⁵ Zhə̀nà! ǹdə Cinu á Yi rí gə́ pyìrh cɛ̀nɛ̀ tɛ̀bɛ́ ń bwəl n pə ába mɔ́ nɛ́, èta myɛ ń mà n pyìrh lwɛlɛ tɛ̀bɛ́ ń bwəl n pə ába mɔ́ kɔn b'e yí n ce á jé tɛ̃́ cɛ náàcɛ̀nɛ́ kɛ̀bɛ́ ń pɔ ába mɔ́ wẽ́. ¹⁶ Á gə cɔ̀ Cinu á Yi rí dɔbrɛ́, dɔbrɛ́ ń zɔ ǹd'ába mɔ́, á gə zɛ̃̀ á n'â wùlì tɛ̃́ yə dwã yé né á m'á cèrhé ne, rə̀myɛ́ yi ní Cinu Yi mà n kwè lyim ǹd'ába; s'á m'ǎ jé tɛ̃́ tənà náàcɛ̀nɛ́ kɛ̀bɛ́ ń pɔ ába mɔ́ wẽ́ làlà.»