¹ Zhozwe cĩ́ Esərayɛl lyì byǎ bɛ́ kwálsɛ́ gakó dwã yó Shəshɛm nɛ́, n zɛ̃̀ n byẽ̀ Esərayɛl lyì byǎ bɛ́ náncɛsɛ́, yó-cìnə́ bé, bù-kárna bɛ́ ǹdə́ nyə́ ne byilnə bé, bə bə̀ Yi yé né. ² Zhozwe zɛ̃̀ n wɔ̀ lyì-zhǎ bɛ́ gakó ne: «Nyǐ-nə Cinu Yi, Esərayɛl lyì byǎ bɛ́ Yi rí nyí rí: Shãã ga, wɔ́ Efəraatɛ, Bù-fwɛ̀lɛ̀ y èpákɛ̀ á dabá, Abəraam ǹdə́ Nəwɔrɛ da Təraa, jòm né, sə bə̀ y'à n'ê cèrhé yə dwã. ³ À zɔ á da Abəraham á shí Bù-fwɛ̀lɛ̀ y èpákɛ̀, a ce n byɛrhɛ Kanaã tənà y púlə́púlə́, a ce ń dwí rí pù, a pɔ mɔ Yəzakɛ. ⁴ À pɔ Zhakɔɔbɛ ǹdə́ Ezəyu Yəzakɛ nɛ, a zɛ̃̀ a pə Səyiiri pyɔ̀ w Ezəyu ni n cìní. Zhakɔɔbɛ ǹdə́ ń byǎ bɛ́ zɛ̃̀ bə vò Ezhibti.5 Rə̀myɛ́ kwã nɛ́ à twĩ̀ Muyiisi ǹdə́ Aarɔ̃, a tó kɔn dɛ̀bɛ́ à wɛ̀rhɛ́ Ezhibti ni dɛnnɛ, a pə w còrhò-tum. Sə rə̀myɛ́ kwã nɛ́, a zɛ̃̀ a ce á shə́r gàà. ⁵ Rə̀myɛ́ kwã nɛ́ à twĩ̀ Muyiisi ǹdə́ Aarɔ̃, a tó kɔn dɛ̀bɛ́ à wɛ̀rhɛ́ Ezhibti ni dɛnnɛ, a pə w còrhò-tum. Sə rə̀myɛ́ kwã nɛ́, a zɛ̃̀ a ce á shə́r gàà. ⁶ À ce á dabá shə́r Ezhibti ní, á zɛ̃̀ á b'ǎ yí vwal-gɔ nə̀-fɔ̀lɔ̀ w nyí ni. Ezhibti lyì bí jì á dabá ǹdə́ lùr eshərh-vwə̃tur ǹdə́ eshə-jòmnə bə m'e yí vwal-gɔ nə̀-fɔ̀lɔ̀ w nyí ni. ⁷ Á dabá wǔrh bə ce Cinu Yi ni. Cinu Yi ce cə-byín yə̀ ámyɛ̌ ǹdə́ Ezhibti lyì bí cəcəl wə, n ce nə̀-fɔ̀lɔ̀ w nɛ̃̌ mɔ́ lyì bi tɛ̃́. Á yírhə́ nɔ kɔn dɛ̀bɛ́ gakó à wɛ̀rhɛ́ Ezhibti ni mú. Á mɛ̃ gɔ-elũ èpòlò w wẽ́ dwã nánzhəzhɔ̌. ⁸ À zɔ ába a vò Amɔrətibá bə̀ ŋwɛ́nɛ́ Zhɔrdɛ̃ bwǐ y yi-púrhí sõ tənà y wẽ́, sə bə̀ bú ǹd'ába. À co be á jɔ̃̀ wà, s'á zwẽ bə̀ tənà y á cìní, à gu bi lyə́m lyə́m á yé né. ⁹ Cəpɔɔrɛ byǐ Balaakɛ, Mɔwaabɛ pyɔ̌ mɔ́, du tɛ̃́, ń la bú ǹdə́ Esərayɛl lyì byǎ bɛ́. N twĩ̀ bə̀ vò bə byẽ̀ Bəwɔɔrɛ byǐ Balaamɛ mùnì ga n bwəl lwɛlɛ n pə ába. ¹⁰ Sə à yə̀ yǎl a cili Balaamɛ yé. Ń gaga mɔ́ kə́ n bwəl cɛ̀nɛ̀ n pə ába, a m'a zwẽ ába ń jɔ̃̀ wa. ¹¹ Á byɛrhɛ Zhɔrdɛ̃ bwǐ y á yí Zheriko. Zheriko cǐnnə bé, Amɔrətibá, Pərəzhitibá, Kanaã lyì bí, Yititibá, Gərəgəshitibá, Yivyitibá ǹdə́ Zhəbuzhitibá, bú ǹd'ába s'à co be á jɔ̃̀ wa. ¹² À twĩ̀ tù-bəlyẽlyẽẽse dwí á yé né sə jì Amɔrətibá pyǎ bɛ́ bə̀lyè y sə ce pyépyé á yala nɛ. È yə̀ yàl ǹdə́ á búlə́-shìmì ráá ǹd'á twərh yé. ¹³ . À pɔ ába tənà y kɛ̀bɛ́ á yə̀ è wẽ́ lyɛ̀ɛ̀ yé, ǹdə́ cɛmɛ nɛ́ nyɛ̀bɛ́ á yə̀ lwì mú á j'ǎ ŋwɛ́nɛ́ nə̀ wẽ́, e súlí də̀vɛ̃́ -cèmé ǹdə́ olyivyə́ə́ré, á yə̀ zhele mó, á j'ǎ n'á jí nə̀ byǎ! ¹⁴ Rə̀myɛ́ ce, èlǎsɛ̃́, nyám-na Cinu Yi, cèrhé-nə mo wu-põ̀ ǹdə́ zhə̀n wẽ́. Vǔr-nə yə né nyɛ̀bɛ́ á dabá cèrhé Bù-fwɛ̀lɛ̀ y èpákɛ̀ ǹdə́ Ezhibti ní mú á cəcəl wə, s'á cèrhé Cinu Yi. ¹⁵ Sə á gə t'á yǎl á cèrhé Cinu Yi, s'á cír yi rí tɛ̀bɛ́ á n'â yǎl á cèrhé mó zà: yə nyɛ̀bɛ́ á dabá cèrhé ǹdə́ bə̀ y'à ŋwɛ́nɛ́ Bù-fwɛ̀lɛ̀ y èpákɛ̀ ráá Amɔrətibá á ŋwɛ́nɛ́ bə̀ cɔ w wẽ́ mó yə né. È gə wɔ́ àmyɛ́ ǹd'ǎ kɛ̀lɛ́ y lyì bí yilə, nə́myɛ̌ wɔ́ Cinu Yi nə́ b'ǎ cèrhé.» ¹⁶ Lyì-zhǎ bɛ́ lyár bə wɔ̀: «Bə̀kúku dóó òmyɛ́ mɔ́ la yál nə́ gə yẽ̌ Cinu Yi ni, nə́ zɛ̃̀ nə́ n'é cèrhé yə dwã! ¹⁷ Wɔ́ Cinu ń wɔ́ nə́ Yi, ńmyɛ̌ ń ce nə́myɛ̌ ǹdə́ nə́ dabá shə́r Ezhibti tənà y wa, yómde-jè y né. Ń wɛ̀rhɛ́ myaarhɛ nánfwààlɛ nə́ yírhə́ na: ń yìlì nə́ba sɔ́má y nə́ kwè mó yó ǹdə́ dwə́ né nyɛ̀bɛ́ nə́ tó nə̀ cəcəl w nə́ lyɛ̃ mɔ́ wẽ́. ¹⁸ Cinu Yi jì dwə́ né gakó nə́ yé né, kɔn du Amɔrətibá bə̀ jě tənà y wẽ́ mó. Nə́myɛ b'ǎ cèrhé Cinu Yi bə̀ wɔ́ ńmyɛ̌ ń wɔ́ nə́ Yi.» ¹⁹ Zhozwe wɔ̀ lyì-zhǎ bɛ́ nɛ: «Á wàr á m'ǎ cèrhé Cinu Yi yé, bə̀ ń wɔ́ Yi rí tɛ̀bɛ́ rə̀ bə dõ zhe, ń wɔ́ Yi rí tɛ̀bɛ́ rə̀ n'ê yǎl bə̀ bə̀ swéné rə̀ dúdú, ń tá ń la á nyí-ni-cõ mó ǹd'á dwə́ə́ré yò shɔ̀nɔ́ yé. ²⁰ Á gə tú á yẽ̌ Cinu Yi ni á zɛ̃̀ á n'â cèrhé yə dwã, ń mà n pə ába còrhò-tum; ń mà n ce á jé tɛ̃́ cɛ̀nɛ̀ tɛ̀bɛ́ ń wɛ̀rhɛ́ ába mɔ́ kwã nɛ́.» ²¹ Lyì-zhǎ bɛ́ wɔ̀ Zhozwe ne: «Gaga, wɔ́ Cinu Yi nə́myɛ̌ la còrhó.» ²² Zhozwe zɛ̃̀ n wɔ̀ bɛ: «Ámyɛ̌ á wɔ́ á cìcì zhə̀n-cìnə́ bə̀ wɔ́ Cinu Yi á cír á la còrhó.» Bə lyár bə wɔ̀: «Nə́ wɔ́ rə̀ zhə̀n-cìnə́.» ²³ «Rə̀myɛ ce, èlǎsɛ̃́ vǔr-nə zhələ bé yə né, nə̀ ŋwɛ́nɛ́ á cəcəl w mó, s'á pyìrhí á wun ní nə zǎ Cinu, Esərayɛl lyì byǎ bɛ́ Yi rí.» ²⁴ Lyì-zhǎ bɛ́ wɔ̀ Zhozwe ne: «Nə́ b'ǎ cèrhé Cinu nə́ Yi rí, sə nə́ m'ǎ cili ń cəl ré.» ²⁵ Dɛ̃ rɛ́ rə̀myɛ́ yùwə̀, Zhozwe zə lyì-zhǎ bɛ́ n bwəl nyí. N vùr nyə́ ǹdə́ lùl-e-púrse Shəshɛm nɛ́ bə̀ yilə. ²⁶ Zhozwe kɛ̃ zɔ̀mà nɛ́ nə̀myɛ́ Yi Nyə́ ne sɛ́bɛ́ rɛ́ wẽ́. N kwè nə́kul-fɔ̀lɔ̀ n cìì tɛ̃́ gàà, shɛ́ɛ́nɛa kùr wə̀, Cinu Yi jì y wẽ́. ²⁷ Zhozwe zɛ̃̀ n wɔ̀ lyì-zhǎ bɛ́ gakó ne: «Nyǐ-nə, nə́kulu w kɔ̀bɔ́ m'à yə̀ zhə̀n pɔ kɔna nə́ shò kwã nɛ́, b'ò nyɛ̀ɛ̀ Cinu Yi zɔ̀mà nɛ́ gakó, ń gə́ tú ń nə́ ń zɔ̀m ǹdə́ nə́ba mɔ́ yi ní. Ò m'a yə̀ zhə̀n pɔ kɔna á shò kwã nɛ́ mùnì ga á bə̀k'á zhɛ̃̀ á Yi rí yé.» ²⁸ Zhozwe zɛ̃̀ n ce dwí rí kwɛ̃̀, lò gakó vò ń cəl-tənà y wẽ́. ²⁹ Ywẽ̀ né nə̀myɛ́ kwã nɛ́, Nuuni byǐ Zhozwe, Cinu Yi tùntùnnə mó tú n bə̀ n cì ǹdə́ ń zhe byinə zɔ̌m ǹdə́ shíyə́. ³⁰ Bə ce mó ń cəl-tənà y wẽ́, Təmənatɛ-Sɛraa nɛ́, Efərəyim pyàr rɛ́ wa, Gaashɛ pyɔ̀ w jə̀-gwã̀ sõ. ³¹ Esərayɛl lyì byǎ bɛ́ cèrhé Cinu Yi, Zhozwe ǹdə́ náncɛsɛ́ sə̀ y'à pú mu mú e jà sə̀ y'à yě kɔn dɛ̀bɛ́ gakó Cinu y'à wɛ̀rhɛ́ yil mú, nyǔ mú púlə́púlə́ yi ní. ³² E gə wɔ́ Zhozefu yala nɛ́ Esərayɛl lyì byǎ bɛ́ y'à kwè bə m'e shí Ezhibti mú, bə̀ shèè nè Shəshɛm nɛ́, cɛ y nyí rí Zhakɔɔbɛ yà ń yè sə̀byì-kùlsì zɔ̌m, Shəshɛm da Amɔɔrɛ byǎ bɛ́ sõ mó wẽ́; nyí rí rə̀myɛ́ súlí rə yə̀ Zhozefu byǎ bɛ́ cəl ré wẽ́. ³³ Aarɔ̃ byǐ Eləyazaarɛ tú n bə̀ n cì sə bə̀ co mo ń byǐ Pyənaasɛ pyɛ̀lɛ́ y yó. Bə̀ y'à pɔ mɔ pyɛ̀lɛ́ èmyɛ́ mɔ́ Efərəyim pyàr rɛ́ wa.