¹ Rə̀myɛ́ kwã nɛ́, Zhozwe zɛ̃̀ n byẽ̀ Orɔbɛn ǹdə́ Gaadɛ kwálsɛ́ ǹdə́ Manasɛ kwálá y kə̀kàlà y byǎ bɛ́. ² N wɔ̀ bɛ̀: «Á zwẽ kɔn dɛ̀bɛ́ gakó Cinu Yi tùntùnnə Muyiisi yà ń pɔ ába rə̀ nyí mú, s'á cili ni kɔn dɛ̀bɛ́ gakó à byili ába mɔ́ wẽ́. ³ Byinə nánzhəzhɔ̌ w nə̀ lyɛ̃ mɔ́ wẽ́ kɔn b'e yí zà gwẽ̌, á yə̀ dùr á yẽ̌ á da-byǎ bɛ́ nɛ yé; á pyà s'á tó Cinu á Yi rí nyí rí. ⁴ Èlǎsɛ̃́, Cinu á Yi rí pɔ shìrhə́ á da-byǎ bɛ́ nɛ ǹdə ń gə́ yà ń bwəl be nyí ní. Rə̀myɛ́ ce, èlǎsɛ̃́, á wɔ̌ á k'á kwẽ̀ á zhə̀l á kwə̀ə̀rhé wẽ́, tənà y kɛ̀bɛ́ è wɔ́ ámyɛ̌ nyǎ y wẽ́, Cinu Yi tùntùnnə Muyiisi pɔ ába, Zhɔrdɛ̃ bwǐ y yi-púrhí sõ mó. ⁵ Ámyɛ̌ wúrí á ce jàn nɛ́ á wɛ̀rhɛ́ kɔn dɛ̀bɛ́ Cinu á Yi rí tùntùnnə Muyiisi byili ába mɔ́ e súlí Nyə́ né ń pɔ ába mɔ́ náàcɛ̀nɛ́. Swéné-nə Cinu á Yi rí; tó-nə ń sɔ́msɛ́ gakó, zwẽ-nə ń nyə́ ne, zhí-nə mo, twĩ̌-nə ń yilə ǹd'á wu gakó ǹd'á cìn námpúm.» ⁶ Zhozwe cĩ́ bwəl bə̀ yó n zɛ̃̀ n cĩ́ bi sɔ́má yó; bə lyɛ̃ bə vò bə̀ kwə̀ə̀rhé wẽ́. ⁷ Muyiisi yà ń pɔ cəl Manasɛ kwálá y kə̀kàlà èdù ni Bashã nyí rí wẽ́. Zhozwe zɛ̃̀ n pə cəl è kə̀kàlà y dõ mó ǹdə́ è da-byǎ bɛ nɛ, Zhɔrdɛ̃ bwǐ y tɛ̃́ sõ, yi-zùr wə. Zhozwe súlí n cĩ́ bwəl bə̀ yó ń gə́ tú n ce bə kwẽ̀ bə la bə̀ kwə̀ə̀rhé w yi ní ⁸ N wɔ̀ bɛ: «Kwẽ̀-nà á vò á kwə̀ə̀rhé w ǹdə́ nə̀cɛ̀ndɛ nánzhəzhɔ̌, ǹdə́ vwàmá nánjə̀jóló, ǹdə́ sə̀byǐ, ǹdə́ sánə́má ǹdə́ kàmmɔ ǹdə́ cɔ̀bɔ́ ǹdə́ gàndɛ nánzhəzhɔ̌. Tə́l-nə kɔn dɛ̀bɛ́ á pwà á zwə̀ bé sõ ǹd'á da-byǎ bɛ́. ⁹ Wɔ́ èta Orɔbɛn ǹdə́ Gaadɛ kwálsɛ́ ǹdə́ Manasɛ kwálá y kə̀kàlà y byǎ bɛ́ kɔ̃̌ mɔ́ tó né. Bə̀ zhǐr bə yẽ̌ dwã bɛ́ nɛ Syilo né, Kanaã tənà y wẽ́, bə la Galaadɛ tənà y wẽ́, bə̀ cəl cɛ y wẽ́; cɛ y kɛ̀bɛ́ bə̀ tó Muyiisi dɛnnɛ bə nə ǹdə Cinu Yi gə́ yà ń pɔ nyí ní mú. ¹⁰ Bə̀ gə́ tú bə yí Gələlɔtɛ Zhɔrdɛ̃ bwǐ y səta, Kanaã tənà y wẽ́ Orɔbɛn ǹdə́ Gaadɛ kwálsɛ́ ǹdə́ Manasɛ kwálá y kə̀kàlà y byǎ bɛ́ zɛ̃̀ bə̀ lù vwĩ̀-jùlú nánfɔ̀lɔ̀ dɛ̃́dɛ̃́ Zhɔrdɛ̃ bwǐ y yala nɛ. ¹¹ Esərayɛl lyì byǎ bɛ́ nyɛ̀ɛ̀ bə̀ y'à n'ê wə̀lə̀: «Orɔbɛn ǹdə́ Gaadɛ kwálsɛ́ ǹdə́ Manasɛ kwálá y kə̀kàlà y byǎ bɛ́ lù vwĩ̀-jùlú Kanaã tənà y yé né, Gələlɔtɛ nɛ́ Zhɔrdɛ̃ bwǐ y yala nɛ, kɔn k'â bàn səta.» ¹² Bə̀ gə́ nyɛ̀ɛ̀ rɛ̀, bə byẽ̀ dwã Syilo né mùnì bə vò bə bú ǹdə́ bɛ. ¹³ Bə twĩ̀ vwĩ̀-zwə́lnə Eləyazaarɛ byǐ Pyənaasɛ Orɔbɛn ǹdə́ Gaadɛ kwálsɛ́ ǹdə́ Manasɛ kwálá y kə̀kàlà y byǎ bɛ́ sõ; ¹⁴ e súlí yé né cìnə́ shíyə́, bə tó mo, kwálá gakó yé né cə́bal mə̀dù kɔn mɛrhɛ dwã ǹdə Esərayɛl lyì byǎ bɛ́ kwálsɛ́ yó w ga; kɔn tó ǹdə Esərayɛl lyì byǎ bɛ́ gə́ bɔ̀n jì jì ní, bə̀myɛ́ mə̀dù gakó y'à wɔ́ jì-cə́bal Esərayɛl lyì byǎ bɛ́ jìsí wẽ́. ¹⁵ Bə bə̀ bə nə Orɔbɛn ǹdə́ Gaadɛ kwálsɛ́ ǹdə́ Manasɛ kwálá y kə̀kàlà y byǎ bɛ́ Galaadɛ tənà y wa, bə̀ zɛ̃̀ bə wɔ̀ bɛ̀: ¹⁶ «Nyǐ-nə Cinu Yi dwí rí púlə́púlə́ nyí rí: «Bə̀kúku dóó ǹdə́ kɔ̀bɔ́ á m'á gwar Esərayɛl lyì byǎ bɛ́ Yi rí èta? Bə̀kɔ́n yil á yẽ̌ Cinu kùr tó ne á m'á lwì vwĩ̀-jùlú? Bə̀kɔ́n yil á cẽ Cinu nyí ni zà? ¹⁷ Nə́ dóó w Pəwɔrɛ (cf. Nb 25,5-10) nɛ́ yə̀ nə́ba yí? Kɔn b'e yí zà, ǹdə́ màbyóó y'à pú Cinu Yi dwí rí tɛ̃́ ga, nə́ gwẽ̌ yə̀ ò wẽ́ shə́r nə́ zhɛ̀ yé. ¹⁸ Ámyɛ̌, zɛ̃̀ á n'á yẽ̌ Cinu Yi kùr tó ne zà! Á n'á cẽ Cinu Yi nyí ni zà! Nəkɔl dɛ̃ rɛ́, wɔ́ ńmyɛ̌ ń mà n kwè lyim ǹdə́ Esərayɛl lyì byǎ bɛ́ dwí rí púlə́púlə́. ¹⁹ Tənà y kɛ̀bɛ́ á cǐ mú gə zhe jìmdi s'á byɛrhɛ á vò tənà y kɛ̀bɛ́ Cinu Yi cǐ mú wẽ́, ń jì y gə́ ŋwɛ́nɛ́ mə̀gã̌ mɔ́; zwẽ-nə cəl nə́ cəcəl wə, s'á bə̀k'à cẽ Cinu Yi nyí ni yé, á bə̀k'á cẽ nə́ nyí ni, á zɛ̃̀ á m'á lwì vwĩ̀-jùlú dõ, Cinu nə́ Yi vwĩ̀-jùlú w yala nɛ yé. ²⁰ Zhɛraa byǐ Akã gə́ yà ń kwè kɔn rɛ́ tɛ̀bɛ́ bə̀ y'à mə̌ sə bə cɔ̀ Cinu Yi yil mú yi ní, Cinu lyi-shùùrí də̀ Esərayɛl lyì byǎ bɛ́ dwí rí púlə́púlə́ yó w rə̀ ló né nà? E súlí myɛ è yə̀ yàl ń dúdú ń cù ń dóó w yil yé.» ²¹ Orɔbɛn ǹdə́ Gaadɛ kwálsɛ́ ǹdə́ Manasɛ kwálá y kə̀kàlà y byǎ bɛ́ lyár Esərayɛl lyì byǎ bɛ́ jìsí yé né cìnə́ bé bə wɔ̀: ²² «Yə né Yi rí, Cinu Yi, yə né Yi rí yě re, sə Esərayɛl lyì byǎ bɛ́ mà lwar rɛ! È gə wɔ́ Cinu Yi nyí ni nə́ cẽ né, è gə wɔ́ gwár nə́ gwar mɔ sə ń bə̀ká n zwẽ nə́ba zà dɛ̃ rɛ́ yé! ²³ Nə́ gə lù nə́ vwĩ̀-jùlú w sə nə́ m'e yẽ̌ Cinu Yi kùr tó ne yilə, e súlí nə́ la m'é pə vwə̃̀ námpúmə́ cɛ̃́ɛ̃́ ǹdə́ pansɛ yilə, e súlí è gə wɔ́ nə́ la m'é zwə́l yə̀-zùlə́ vwə̃̀ yilə, sə Cinu Yi bwə̀rh nə́ba. ²⁴ Nyǐ è də̀ rə̀myɛ́ yil yé. Wɔ́ wu-zɛ̃̀ɛ̃́ e ce nə́ wɛ̀rhɛ́ èta: nə́ bùl bə̀ nəkɔl dɛ̃ rɛ́, á byǎ bɛ́ wɔ̌ bə̀ wə̀l nə́ byǎ bɛ́ nɛ: ‹Bə̀kɔ́n rə̀ ŋwɛ́nɛ́ ámyɛ̌ ǹdə́ Cinu Yi, Esərayɛl lyì byǎ bɛ́ Yi rí bwə̌l wə? ²⁵ Cinu Yi cĩ́ swɛ̃́ nə́myɛ̌ ǹd'ámyɛ̌ Orɔbɛn ǹdə́ Gaadɛ byǎ bɛ́ cəcəl wə, wɔ Zhɔrdɛ̃ bwǐ yə́. Á bə cəl zhe Cinu Yi byẽ́ yé!› Á byǎ bɛ́ m'à cìrh nə́ byǎ bɛ́ bə cẽ́, bə̀ k'ê t'â la Cinu Yi nyám yé. ²⁶ Wɔ́ rə̀myɛ́ e ce nə́ zɛ̃̀ nə́ wɔ̀ nə́ cìn nì: «Kɔn n'ê nyɛ́ɛ́ bə̀ nə́ lú vwĩ̀-jùlù w kɔ̀bɔ́, è də̀ vwə̃̀ námpúmə́ cɛ̃́ɛ̃́ yil ráá vwə̃̀ dwã yil yé; ²⁷ wɔ́ mùnì ga o yə̀ zhə̀n pɔ myɔrhɔ nə́myɛ̌ ǹd'ámyɛ̌ cəcəl wə, nə́ byǎ bɛ́ cəcəl wə, ò n'ô byili b'è wɔ́ Cinu Yi nə́ n'é cèrhé ǹdə́ nə́ vwə̃̀ námpúmə́ cɛ̃́ɛ̃́ e súlí nə́ vwə̃̀ né dwã bɛ́ ǹdə́ nə́ yə̀-zùlə́ vwə̃̀ né; èta, nəkɔl dɛ̃ rɛ́, á byǎ bɛ́ t'â la nə́ byǎ bɛ́ nɛ wál bə̀ bə̀ bə cəl zhe Cinu Yi byẽ́ yé. ²⁸ Nə́ wə̀l nə́ cìn nì: ‹Bə̀ gə zɔ̀m èta bə ce nə́myɛ̌ ǹdə́ nə́ byǎ bɛ́ nɛ nəkɔl dɛ̃ rɛ́, nə́ m'ǎ wɔ̀ bə̀ bə̀ nyǐ Cinu Yi vwĩ̀-jùlú w gaga mɔ́ nə́ dabá lù mú gə́ nyɛ̌ nɛ́; è də̀ vwə̃̀ námpúmə́ cɛ̃́ɛ̃́ yil yé, è də̀ vwə̃̀ dwã yil yé. Wɔ́ zhə̀n pɔ myɔrhɔ nə́myɛ̌ ǹd'ámyɛ̌ cəcəl w yilə. ²⁹ Bə̀kúku dóó w òmyɛ́ mɔ́ la yál, nə́ gə cẽ Cinu Yi nyí ni, nə́ súlí nə́ yẽ̌ ń kùr tó ne, nə́ zɛ̃̀ nə́ lù vwĩ̀-jùlú vwə̃̀ námpúmə́ cɛ̃́ɛ̃́ yilə, ǹdə́ pansɛ ǹdə́ vwə̃̀ dwã yilə, nə́ yẽ̌ Cinu nə́ Yi rí vwĩ̀-jùlú w kɔ̀bɔ́ ò ŋwɛ́nɛ́ ń kòrhó w yé né mó ne!› ³⁰ Vwĩ̀-zwə́lnə Pyənaasɛ ǹdə́ dwí rí yé né cìnə́ bé ǹdə́ Esərayɛl lyì byǎ bɛ́ jìsí yé né cìnə́ bé bə̀ y'à ŋwɛ́nɛ́ ǹdə́ mo mɔ́ gə́ nyɛ̀ɛ̀ Orɔbɛn ǹdə́ Gaadɛ ǹdə́ Manasɛ byǎ bɛ́ nyì-zɔ̀mà nɛ́ nyɛ̀bɛ́ èta mɔ́, bə̀ wun yàl nyàn. ³¹ Vwĩ̀-zwə́lnə Eləyazaarɛ byǐ Pyənaasɛ zɛ̃̀ n wɔ̀ Orɔbɛn ǹdə́ Gaadɛ ǹdə́ Manasɛ byǎ bɛ́ nɛ: «Nə́ yě zà bə̀ Cinu Yi ŋwɛ́nɛ́ nə́ cəcəl wə, á gə́ yə̀ Cinu Yi gwar mɔ́ yilə. Èta á zwẽ Cinu Yi jɔ̃̀ wà.» ³² Vwĩ̀-zwə́lnə Eləyazaarɛ byǐ Pyənaasɛ ǹdə́ yé né cìnə́ bé zhǐr bə yẽ̌ Orɔbɛn ǹdə́ Gaadɛ byǎ bɛ́ nɛ, bə kwẽ̀ bə shí Galaadɛ tənà y wa bə bə̀ Kanaã tənà y wa, sõ, bə̀ cĩ́ bi kɔn dɛ̀bɛ́ bə̀ nɔ mɔ́. ³³ Esərayɛl lyì byǎ bɛ́ wun yə̀ nyàn, bə zɛ̃̀ bə ce Yi nə̀báná. Bə j'á yẽ̌ búlə́ né bə̀ y'à la vò bə bú ǹdə́ Orɔbɛn ǹdə́ Gaadɛ byǎ bɛ́ mɔ́, sə bə súlí bə cɔ̀ cɔ w bə̀ y'à ŋwɛ́nɛ́ ò wẽ́ mó yò w ne o tu tɛ̃́. ³⁴ Orɔbɛn ǹdə́ Gaadɛ byǎ bɛ́ ce vwĩ̀-jùlù w yil bə̀ «ò n'ô pɛ zhə̀n nə́ cəcəl w bə̀ Cinu wɔ́ Yi.»