¹ Cinu Yi zɛ̃̀ n wɔ̀ Zhozwe ne: ² «Wál nɛ: «Cír-nə cɛmɛ nyɛ̀bɛ́ à tó Muyiisi dɛnnɛ a zɔ̀m nə̀ zɔ̀mà ǹd'ába mɔ́, nə yə̀ shòò jààsɛ̀ á yilə. ³ Èta, lò mɔ̀bɔ́ ń lyàrh lò, ń yə̀ ń gu mú pyà, mà n dùr n vò gàà, sə nə̀ m'à yə̀ á shòò jààsɛ̀ lò mɔ̀bɔ́ ń nə́ ń yǎl n cĩ́ jal mɔ́ mə̀ ló tɛ̃́ mɔ́ jim mú yé né. ⁴ Gurə y mà e dùr e zǎ cɛmɛ nɛ́ nə̀myɛ́ òdù wə, e yí e zhì ò bwə̀ə̀rə̀ y nyí ni, e cĩ́ è yò w cɔ w òmyɛ́ náncɛsɛ́ nɛ; bə̀ m'à zwẽ y cɔ w wẽ́, bə̀ yala nɛ, sə bə̀ m'à pɛ y jàà e jòm ǹdə́ bɛ. ⁵ Sə mɔ̀bɔ́ ń nə́ ń yǎl n cĩ́ jal mɔ́ mə̀ ló tɛ̃́ mɔ́ jim rí gə twèlé y gàà, cɔ w náncɛsɛ́ t'â la gurə y vǔr bə pɔ̃ yé, bə̀ wɔ́ lyárh ń lyàrh ń dõ mó, è də̀ ń yà ń jɛ̀nɛ̀ ń súl mu yil yé. ⁶ Gurə y mà e jòm cɔ w òmyɛ́ wẽ́ kɔn b'e yí bə zə y bə bùr dwí rí yé né, e súlí kɔn b'e yí yi rí rə̀myɛ́ vwĩ̀-zwə́lnə náncɛ y cu. Rə̀myɛ́ kwã nɛ́, è mà e kwẽ̀ e vò è cɔ̀ w wa, è sõ kɛ̀lɛ́ wa, cɔ w kɔ̀bɔ́ è zhì ò wẽ́ e dùr mú wə.» ⁷ Bə̀ zɛ̃̀ bə cír Kədɛshɛ Gəlile né Nəfətəlyi pyàr rɛ́ wa ǹdə́ Shəshɛm Efərəyim pyàr rɛ́ wa ǹdə́ Cərəyatɛ-Arəba, bə̀ n'ê súlí bə̀ byẽ̀ bə̀ Ebərɔ̃, Zhəda pyàr rɛ́ wa, rə̀myɛ́ yilə. ⁸ Zhɔrdɛ̃ bwǐ y èpákɛ̀, kɔn mɛrhɛ dwã ǹdə́ Zheriko, yi-púrhí sõ, bə̀ cír Bəsɛɛrɛ èpòlò w wə, ǹdə́ Orɔbɛn kwálá y tə̀na y è wɔ́ jə́-è-zɛ̃̀-dɛ̃̌ mɔ́ ǹdə́ Aramɔɔtɛ Galaadɛ nɛ́ Gaadɛ kwálá y wẽ́; e súlí Gɔlã Bashã nɛ́, Manasɛ kwálá y wẽ́. ⁹ Wɔ́ cɛmɛ nɛ́ nə̀myɛ́ bə̀ cír gakó yilə, ǹdə́ zhə-bal mɔ̀bɔ́ ń ŋwɛ́nɛ́ bə̀ cəcəl w mó yilə, mùnì ga lò mɔ̀bɔ́ gakó ń lyàrh lò ŋwɛ̀nɛ́ n vò n shèè nə̀ wẽ́: èta lò mó mɔ̀bɔ́ ń nə́ ń yǎl n cĩ́ jal mɔ́ mə̀ ló tɛ̃́ mɔ́ jim tá ń la mɔ gu ǹdə́ bə̀ yə̀ jɛ̀nɛ̀ bə zə mɔ bə bùr dwí rí yé né yé.