¹ Esərayɛl lyì byǎ bɛ́ dwí rí púlə́púlə́ tú dwã yó Shilo né. Sə bə̀ y'à pú Yi kòrhó w gàà. Bə̀ y'à zhe ŋwɔ̀nɔ́ tənà y yó wə. ² Kwálsɛ shàlpyɛ̀ y'à dàl cəcəl wə, sə̀ y'à gwẽ̌ yə̀ cəl nɛ yé. ³ Zhozwe zɛ̃̀ n wɔ̀ nɛ: «Á nə m'ǎ jòm á dɛ̃̀ kɔn b'e yí dǒ, éfòró á vò á zwẽ tənà y kɛ̀bɛ́ Cinu, á dabá Yi rí, pɔ ába mɔ́ á cìní?» ⁴ Cír-nə bala bə̀tɔ̀ kwálá gakó wẽ́, àmyɛ́ m'à zɛ̃̀ a twĩ̀ bì. Bə̀ m'à vò bə byɛ́lɛ́ tənà y, sə bə m'à byili kɔn gə́ b'à mɛrhɛ ǹdə́ bə̀ cəl né, sə bə k'á kwẽ̀ bə bə̀ à sõ. ⁵ Sə Levyitibá t'â la cəl nɔ á cəcəl w yé, bə̀ bə̀myɛ́ cəl ré wɔ́ Cinu vwĩ̀-zwə́lnə tum rí. È gə wɔ́ Gaadɛ ǹdə́ Orɔbɛn e súlí Manasɛ kwálá kə̀kàlà y yilə, bə nɔ bə̀ cəl ré Cinu Yi tùntùnnə Muyiisi pɔ bɛ, Zhɔrdɛ̃ bwǐ y yi-púrhí sõ.» ⁶ Ámyɛ̌ kɛ̃-na á m'á byili tənà y gə́ wɔ́ nɛ́, kɔn tó dwã ǹdə́ tòló kùrə̀ nyàlpyɛ̀ y nɛ, á z'á b'ǎ pɛ̃ nyɔ̀nɔ̀. À m'à tə́ tántɛ́ɛ́ nyɔ̀nɔ̀, Cinu nə́ Yi rí yé né, á yilə. ⁷ Sə Levyitibá t'â la cəl nɔ á cəcəl w yé, bə̀ bə̀myɛ́ cəl ré wɔ́ Cinu vwĩ̀-zwə́lnə tum rí. È gə wɔ́ Gaadɛ ǹdə́ Orɔbɛn e súlí Manasɛ kwálá kə̀kàlà y yilə, bə nɔ bə̀ cəl ré Cinu Yi tùntùnnə Muyiisi pɔ bɛ, Zhɔrdɛ̃ bwǐ y yi-púrhí sõ.» ⁸ Bala bɛ́ byɛ̀bɛ́ bə̀ cír mú shí tɛ̃́ bə zɛ̃̀ bə lyɛ̃ bə vò. Zhozwe pə nyí byɛ̀bɛ́ bə̀ y'à la kãɔ̃ bə m'e byili tənà y gə́ wɔ́ nɛ ma mɔ́ nɛ n wɔ̀: «Zhəl-nə, á tó tənà y wẽ́ á byɛ́lɛ́ ya, á kɛ̃ á m'á b'ǎ byili è gə́ wɔ́ nɛ́ mɔ́, s'á k'á kwẽ̀ á b'à sõ; à m'à zɛ̃̀ a tə́ tántɛ́ɛ́ nyɔ̀nɔ̀, Shilo né, Cinu Yi yé né, á yilə. ⁹ Sə bala bɛ́ bə̀myɛ́ mɔ́ zhə̀lə̀, bə tó tənà y wẽ́ bə lyɛ̃, bə kɛ̃ è gə́ wɔ́ nɛ́, kɔn tó dwã ǹdə́ cɛmɛ nɛ́ tə́l tòló kùrə̀ nyàlpyɛ̀. Bə zɛ̃̀ bə vò Zhozwe sõ èlasɛ̃́, Shilo né, zulə́ jàà y wa. ¹⁰ Zhozwe tə́ tántɛ́ɛ́ Shilo né, Cinu Yi yé né, bə̀ yilə. N zɛ̃̀ n tə̀ tənà y n pə nɛ, kɔn tó dwã ǹdə́ bə̀ gə́ jě jě né. ¹¹ Cəl ré tántɛ́ɛ́ y zɔ mɔ́ yàl Bɛ̃zhamɛ kwálá y byǎ bɛ́ cəl kɔn mɛrhɛ dwã ǹdə́ bə̀ jìsí. Bə̀ cəl-tənà y y'à ŋwɛ́nɛ́ Zhəda byǎ bɛ́ tənà y ǹdə́ Zhozefu byǎ bɛ́ tənà y cəcəl wə. ¹² Jə̀-gwã̀ sõ mó, bə̀ swɛ̃́ rɛ́ y'à zhì Zhɔrdɛ̃ bwǐ y ni, rə kwẽ̌ rə̀ vò Zheriko sarh nɛ, jə̀-gwã̀ sõ, rə jì pyàr rɛ́ wa, yi-zùr səta, rə lyɛ̃ rə vò rə gu yó èpòlò w ne, Bɛtɛ-Awɛn nɛ́. ¹³ Rə̀ y'à zhì gàà rə vò Luuzi sarh nɛ, jə̀-jĩ́ sõ, è n'ê yǎl e wɔ̀ bə̀ Bətɛl; rə̀ y'à só rə bà Atərɔtɛ-Adaarɛ, pyɔ̀ w ò ŋwɛ́nɛ́ Bɛtɛ-Orɔ̃ tənà y è wɔ́ Tɛ̃́-sõ mó yó, jə̀-jĩ́ sõ. ¹⁴ Rə̀ y'à lwəl rə gwɛ̃́ kɔn zǎ yi-zùr wə̀ rə zǎ jə̀-jĩ́ səta, kɔn zhì pyɔ̀ w ò ŋwɛ́nɛ́ Bɛtɛ-Orɔ̃ yé né jə̀-jĩ́ sõ mó; rə zɛ̃̀ rə lyɛ̃ rə yí Cərəyatɛ-Baal, bə̀ n'ê súlí bə̀ byẽ̀ bə̀ Cərəyatɛ-Yərəyim ò wɔ́ Zhəda byǎ bɛ́ cɔ. Wɔ́ kɔn gə́ zǎ yi-zùr mú èta. ¹⁵ Kɔn zǎ jə̀-jĩ́ sõ, swɛ̃́ rɛ́ y'à n'ê ji kùr Cərəyatɛ-Yərəyim ní; rə lyɛ̃ rə twèlé rə zǎ Yəyim ǹdə́ Nəfətwa bwǐ y nàná bɛ́ nə̀-bùlì y səta. ¹⁶ Rə̀ y'à só rə vò pyɔ̀ w ò zhǐ Bɛn-Yənome pyə̀-gɔ́rɔ́ w yé né yó-gurə́ y səta, ǹdə́ Erəfəyitibá vɔlɔ w wẽ́, jə̀-gwã̀ sõ. Rə só Yənome nə̀-gɔ̀lɔ̀ w Zəbəzhitibá sarh nɛ, jə̀-jĩ́ sõ, rə zɛ̃̀ rə só rə bə̀ Eyin-Orəgwɛl. ¹⁷ Rə̀ y'à gwɛ̃́ jə̀-gwã̀ sõ rə lyɛ̃ rə yí Eyin-Shəmɛshɛ ǹdə́ Gələlɔtɛ, Adumyimi sə-jìlə́ y yé né, rə zɛ̃̀ rə só rə bə̀ Orɔbɛn byǐ Bɔwanɛ Nə́kulu w ni. ¹⁸ Rə tó ò sarh nɛ, jə̀-gwã̀ sõ, Araba yé né, rə zɛ̃̀ rə só rə bə̀ Araba səta. ¹⁹ Swɛ̃́ rɛ́ y'à n'ê tó Bɛtɛ-Ogəla sarh nɛ, jə̀-gwã̀ sõ, rə lyɛ̃ rə yí Nə̀kwə̃̌ nə̀-fɔ̀lɔ̀ w kə̀kàlà y è zù tənà y wẽ́ mó ne, jə̀-gwã̀ sõ, Zhɔrdɛ̃ bwǐ y yó-gúrə́ y sõ. È wɔ́ jə̀-jĩ́ sõ mó swɛ̃́ rɛ́ èta. ²⁰ Yi-púrhí sõ swɛ̃́ rɛ́ y'à wɔ́ Zhɔrdɛ̃ bwǐ yə́. Wɔ́ Bɛ̃zhamɛ byǎ bɛ́ cəl ré ǹdə́ rə̀ swã́ nɛ́ nə̀ kə́kɛ́lɛ́ y èta kɔn mɛrhɛ dwã ǹdə bə̀ jìsí. ²¹ Bɛ̃zhamɛ kwálá y byǎ bɛ́ cɛmɛ nɛ́ kɔn mɛrhɛ dwã ǹdə́ bə̀ jìsí y'à wɔ́: Zheriko, Bɛtɛ-Ogəla, Emɛkɛ-Kəshisi, ²² Bɛtɛ-Araba, Kəmərəyim, Bətɛl, ²³ Abyim, Para, Ofəra, ²⁴ Kəfar-Amɔna, Ofəni, Gəba: cɛmɛ shí ǹdə́ nə̀lyè ǹdə́ nə̀ cə-bwǎlsɛ́. ²⁵ Gabaɔ̃, Arama, Bɛɛrɔtɛ, ²⁶ 26 Myəsəpɛ, Kəfəra, Mɔsa, ²⁷ Erəkɛm, Yərəpəyɛl, Tarala, ²⁸ Səla, Elɛɛfɛ, Zhəbuzhiti mú, è n'ê yǎl e wɔ̀ Zhərəzalɛm, Jəbəya, Cərəyatɛ-Yərim: cɛmɛ shí ǹdə́ nə̀na ǹdə́ nə̀ cə-bwǎlsɛ́. Wɔ́ èta Bɛ̃zhamɛ byǎ bɛ́ cəl ré yàl nɛ́, kɔn mɛrhɛ dwã ǹdə́ bə̀ jìsí.